AKP ភ្នំពេញ ថ្ងៃទី០៩ ខែកញ្ញា ឆ្នាំ២០២៥ -- វិមានក្រឹមឡាំងបាននិយាយថានៅក្នុងកិច្ចប្រជុំកំពូលវិសាមញ្ញតាមប្រព័ន្ធអនឡាញកាលពីថ្ងៃចន្ទ បណ្តាមេដឹកនាំនៃប្រទេសជាសមាជិកប្រ៊ីកស៍ (BRICS) បានពិភាក្សាគ្នាអំពីកិច្ចសហប្រតិបត្តិការលើវិស័យពាណិជ្ជកម្ម សេដ្ឋកិច្ច និងវិស័យផ្សេងៗទៀតដោយគិតគូរអំពីស្ថានភាពបច្ចុប្បន្ននៅក្នុងសេដ្ឋកិច្ចពិភពលោក។

វិមានក្រឹមឡាំងបាននិយាយនៅក្នុងសេចក្តីថ្លែងការណ៍មួយនៅលើបណ្តាញតេឡេក្រាមថា «បញ្ហានៃកិច្ចសហប្រតិបត្តិការរវាងបណ្តាប្រទេសជាសមាជិកប្រ៊ីកស៍ក្នុងវិស័យពាណិជ្ជកម្ម សេដ្ឋកិច្ច ហិរញ្ញវត្ថុ ការវិនិយោគនិងវិស័យផ្សេងទៀត ត្រូវបានពិភាក្សាដោយគិតគូរអំពីស្ថានភាពបច្ចុប្បន្ននៅក្នុងសេដ្ឋកិច្ចពិភពលោក»។

ប្រទេសប្រេស៊ីល តាមគំនិតផ្តួចផ្តើមរបស់លោកប្រធានាធិបតី ល្វីស អ៊ីណាស៊ីអូ លូឡា ដា ស៊ីលវ៉ា (Luiz Inacio Lula da Silva) បានរៀបចំកិច្ចប្រជុំកំពូលវិសាមញ្ញតាមប្រព័ន្ធអនឡាញនៃប្រទេសជាសមាជិកប្រ៊ីកស៍កាលពីថ្ងៃចន្ទ ដើម្បីពិភាក្សាអំពីគោលនយោបាយពាណិជ្ជកម្មរបស់ប្រធានាធិបតីអាម៉េរិក លោក ដូណាល់ ត្រាំ (Donald Trump)។

ប្រ៊ីកស៍ គឺជាសមាគមអន្តររដ្ឋាភិបាលដែលត្រូវបានបង្កើតឡើងក្នុងឆ្នាំ២០០៦ ដោយប្រទេសរុស្ស៊ី ចិន ឥណ្ឌា និងប្រេស៊ីល ជាមួយនឹងប្រទេសអាហ្រ្វិកខាងត្បូងចូលរួមនៅក្នុងឆ្នាំ២០១១។ នៅដើមឆ្នាំ២០២៤ មានរដ្ឋជាច្រើនទៀតបានចូលជាសមាជិកក្រុមប្រទេសប្រ៊ីកស៍។ នៅពេលមុននេះជំនួយការប្រធានាធិបតីរុស្ស៊ី លោក យូរី យូស្សាកូវ (Yuri Ushakov) បាននិយាយថា ប្រទេសបេឡារុស្ស បូលីវី កាហ្សាក់ស្ថាន ថៃ គុយបា អ៊ូហ្គង់ដាម៉ាឡេស៊ី អ៊ូសបេគីស្ថាន និងប្រទេសដទៃទៀតបានក្លាយជារដ្ឋដៃគូរបស់ប្រ៊ីកស៍ជាផ្លូវការនៅថ្ងៃទី០១ ខែមករា ឆ្នាំ២០២៥។ នៅថ្ងៃទី០៦ ខែមករាឆ្នាំ២០២៦ រដ្ឋាភិបាលប្រេស៊ីលដែលបានចូលកាន់តំណែងជាប្រធានរបស់សមាគមន៍នេះ ដោយបានប្រកាសពីការចូលជាសមាជិកភាពពេញលេញរបស់ប្រទេសឥណ្ឌូណេស៊ីទៅក្នុងក្រុមប្រទេសប្រ៊ីកស៍៕

ដោយ៖ យា ចិន្តាខន្តី (ប្រភព៖ ស្ពុតនីក)