AKP ភ្នំពេញ ថ្ងៃទី០៩ ខែកញ្ញា ឆ្នាំ២០២៥ -- ទីក្រុង​ប៉េកាំង​បាន​ព្រមាន​កាល​ពីពេលថ្មីៗនេះថា ទីក្រុង​ម៉ានីល​នឹងទទួលខុសត្រូវចំពោះ​ការ​ឆ្លង​កាត់ហួស​ខ្សែ​បន្ទាត់​ក្រហម​របស់​ប្រទេស​ចិន​ជុំវិញ​បញ្ហា​ទាក់​ទង​នឹង​កោះ​តៃវ៉ាន់ ដោយ​បាន​ថ្កោល​ទោស​មន្ត្រី​ជាន់​ខ្ពស់​ហ្វីលីពីន​ចំពោះ​ការ​ប្រជែង​ផលប្រយោជន៍​ស្នូល​របស់​ចិន។

អ្នកនាំពាក្យក្រសួងការបរទេសចិន លោក គូ ចៃគុន (Guo Jiakun)បាននិយាយថា ប្រទេសហ្វីលីពីនដែលបន្តទទួលយកការកត់សម្គាល់ប្រកបដោយអាកប្បកិរិយាខុសឆ្គង និងញុះញង់នោះ បានបំពានទៅលើការប្តេជ្ញាចិត្តរបស់ខ្លួនចំពោះបញ្ហាដែលទាក់ទងនឹងកោះតៃវ៉ាន់ និងបទដ្ឋានជាមូលដ្ឋាននៃទំនាក់ទំនងអន្តរជាតិ។

លោក គូ បាននិយាយនៅក្នុងសន្និសីទសារព័ត៌មានប្រចាំថ្ងៃមួយថា«(ហ្វីលីពីន) បានបន្តធ្វើឱ្យខូចទំនាក់ទំនងរបស់ខ្លួនជាមួយប្រទេសចិន និងដើរហួសខ្សែបន្ទាត់ក្រហមរបស់ប្រទេសចិន។ ហ្វីលីពីននឹងត្រូវទទួលខុសត្រូវសម្រាប់រឿងនេះ។ ផលវិបាកទាំងអស់ដែលអាចកើតចេញពីកាយវិការនេះនឹងត្រូវទទួលខុសត្រូវដោយហ្វីលីពីន»។

ការកត់សម្គាល់របស់លោក គូ ខាងលើនេះបានធ្វើឡើងបន្ទាប់ពីរបាយការណ៍ព័ត៌មានមួយបានដកស្រង់សម្តីរដ្ឋមន្ត្រីការពារជាតិហ្វីលីពីនលោក ហ្គីលបឺតតូ តេអូដូរ៉ូ ជេអ (Gilberto Teodoro Jr) ដែលបាននិយាយកាលពីថ្ងៃពុធសប្តាហ៍មុនថា ប្រទេសចិន «មិនគួរដាក់» បន្ទាត់ក្រហមរបស់ខ្លួនលើប្រទេសហ្វីលីពីននោះទេ។ លោក តេអូដូរ៉ូ បានធ្វើអត្ថាធិប្បាយខាងលើនេះក្នុងពេលដែលលោក លីន ជាលុង (Lin Chialung) ប្រធាននាយកដ្ឋានកិច្ចការបរទេសនៃអាជ្ញាធរកោះតៃវ៉ាន់បានបំពេញដំណើរទស្សនកិច្ចទៅកាន់ប្រទេសហ្វីលីពីនកាលពីពេលថ្មីៗនេះ។

ប្រទេសចិន​ធ្លាប់​បាន​បញ្ជាក់​យ៉ាង​ច្បាស់​ពី​ការ​ប្រឆាំង​យ៉ាង​ម៉ឺងម៉ាត់​របស់​ខ្លួន​ចំពោះ​ហ្វីលីពីន​ដែល​អនុញ្ញាតឱ្យ​លោក លីន បំពេញទស្សនកិច្ចនេះ។

អ្នកនាំពាក្យក្រសួងការបរទេសចិនរូបនេះបាននិយាយកាលពីចុងខែមុនថា តាមរយៈការអនុញ្ញាតឱ្យមានដំណើរទស្សនកិច្ចនេះ ហ្វីលីពីនបានផ្តល់នូវវេទិកាមួយសម្រាប់អ្នកបំបែកខ្លួន «ឯករាជ្យតៃវ៉ាន់» ដើម្បីចូលរួមក្នុងសកម្មភាពប្រឆាំងនឹងប្រទេសចិន៕

ដោយ៖ យា ចិន្តាខន្តី (ប្រភព៖ ឆាយណាដេលី)