AKP ភ្នំពេញ ថ្ងៃទី០៩ ខែកញ្ញា ឆ្នាំ២០២៥ -- ក្រសួងសុខាភិបាលបាននិយាយកាលពីថ្ងៃចន្ទថា ជនជាតិប៉ាឡេស្ទីនចំនួន ៦នាក់បន្ថែមទៀត ដែលរួមមានទាំងកុមារចំនួន ២នាក់ផងនោះបានស្លាប់ដោយសារការអត់ឃ្លាន និងកង្វះអាហារូបត្ថម្ភធ្ងន់ធ្ងរនៅក្នុងតំបន់ហ្គាហ្សាស្ទ្រីប ដែលរារាំងដោយអ៊ីស្រាអែលក្នុងរយៈពេល ២៤ម៉ោងចុងក្រោយនេះ។

ក្រសួងបាននិយាយបន្ថែមថា អ្នកស្លាប់ថ្មីនោះបាននាំមកនូវករណីស្លាប់ទាក់ទងនឹងគ្រោះទុរ្ភិក្សចាប់តាំងពីខែតុលា ឆ្នាំ២០២៣ មក ឈានដល់ចំនួនសរុប ៣៩៣នាក់ ដោយក្នុងនោះមានកុមារចំនួន ១៤០នាក់។

យោងតាមក្រសួងនោះ បានឱ្យដឹងថា ករណីស្លាប់ចំនួន ១១៥នាក់ដែលក្នុងនោះមានកុមារចំនួន ២៥នាក់ បានកើតឡើងបន្ទាប់ពីប្រព័ន្ធត្រួតពិនិត្យភាពអត់ឃ្លានដែលគាំទ្រដោយអង្គការសហប្រជាជាតិ បានប្រកាសជាផ្លូវការនូវតំបន់ហ្គាហ្សាជាតំបន់ទុរ្ភិក្សកាលពីខែមុនមក។

អ៊ីស្រាអែលបានសម្លាប់ជនជាតិប៉ាឡេស្ទីនជាង ៦៤.៣០០នាក់នៅក្នុងការវាយលុកដ៏ឃោរឃៅនៅតំបន់ហ្គាហ្សា ចាប់តាំងពីខែតុលា ឆ្នាំ២០២៣ដោយយុទ្ធនាការយោធានោះបានបំផ្លិចបំផ្លាញតំបន់ជុំវិញ។

កាលពីខែវិច្ឆិកាឆ្នាំមុន តុលាការឧក្រិដ្ឋកម្មអន្តរជាតិបានចេញដីកាចាប់ខ្លួននាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ(Benjamin Netanyahu) និងអតីតរដ្ឋមន្ត្រីការពារជាតិអ៊ីស្រាអែល លោក យ៉ៅ ហ្កាល់លេនត៍ (Yoav Gallant) ពីបទឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិនៅក្នុងតំបន់ហ្គាហ្សា។

អ៊ីស្រាអែល​ក៏​ប្រឈមមុខ​នឹង​សំណុំរឿង​ប្រល័យពូជសាសន៍​នៅ​តុលាការ​យុត្តិធម៌​អន្តរជាតិ​សម្រាប់​សង្រ្គាម​នៅ​ក្នុង​តំបន់​ព័ទ្ធជុំវិញផងដែរ៕

ដោយ៖ យា ចិន្តាខន្តី (ប្រភព៖ AA-AKP)