AKP ភ្នំពេញ ថ្ងៃទី០៩ ខែកញ្ញា ឆ្នាំ២០២៥ -- ប្រទេសអ៊ីស្រាអែល​បាន​ដាក់​បម្រាម​ចូលទៅក្នុងប្រទេស និង​ទណ្ឌកម្ម​ផ្ទាល់ខ្លួនទៅ​លើ​មន្ត្រី​ជាន់ខ្ពស់អេស្ប៉ាញ​ ២​រូប​កាលពី​ថ្ងៃ​ចន្ទ ​ជុំវិញ​ការ​រិះគន់​យ៉ាង​ខ្លាំង​របស់​ពួកគេ​ចំពោះ​ការអនុវត្ត​របស់​អ៊ីស្រាអែល​នៅ​តំបន់ហ្គាហ្សាស្រ្ទីប និង​តំបន់វេសប៊ែង។

រដ្ឋមន្ត្រីក្រសួងការបរទេស លោក ជីដេអន សាអារ (Gideon Saar)បាននិយាយនៅក្នុងសេចក្តីថ្លែងការណ៍មួយនៅបណ្តាញសង្គមអ៊ិច (X) របស់សហរដ្ឋអាមេរិកថា «អ៊ីស្រាអែលនឹងមិនរក្សាទំនាក់ទំនងណាមួយជាមួយឧបនាយករដ្ឋមន្ត្រី និងជារដ្ឋមន្ត្រីក្រសួងការងារអេស្ប៉ាញ លោក យ៉ូលែនដា ដាយអាហ្ស (Yolanda Diaz) ទេ»។

លោក​បាន​និយាយ​ថា លោក Diaz ដែល​ជា​សមាជិក​នៃ​បក្ស​កុម្មុយនិស្ត​អេស្ប៉ាញ ក៏​នឹង​ត្រូវ​ហាមឃាត់​មិន​ឲ្យ​ចូល​ក្នុង​ប្រទេស​អ៊ីស្រាអែល​ដែរ។

លោក ដាយអាហ្ស បានរិះគន់សង្គ្រាមប្រល័យពូជសាសន៍របស់អ៊ីស្រាអែលនៅតំបន់ហ្គាហ្សា និងការរំលោភលើកិច្ចព្រមព្រៀងបទឈប់បាញ់ជាមួយលីបង់ ដោយអំពាវនាវឱ្យដាក់ទណ្ឌកម្មអន្តរជាតិ និងការហាមឃាត់សព្វាវុធលើអ៊ីស្រាអែលជុំវិញការអនុវត្តរបស់ខ្លួន។

លោក សាអារ បាននិយាយថា «ទណ្ឌកម្មស្រដៀងគ្នានេះក៏នឹងត្រូវដាក់ចេញប្រឆាំងនឹងលោក ស៊ីរ៉ា​ រ៉ាហ្គោ (Sira Rago) រដ្ឋមន្ត្រីក្រសួងយុវជននិងកុមារមកពីគណបក្សតែមួយរបស់អេស្ប៉ាញផងដែរ។ ការចូលទៅក្នុងប្រទេសអ៊ីស្រាអែលនឹងត្រូវបានហាមឃាត់ ហើយអ៊ីស្រាអែលនឹងមិនមានទំនាក់ទំនងណាមួយជាមួយមន្រ្តីទាំងនោះទេ»។

លោក រ៉ាហ្គោ ក៏បានពណ៌នាចំពោះអ៊ីស្រាអែលថា ជារដ្ឋប្រល័យពូជសាសន៍ជុំវិញសកម្មភាពយោធារបស់ខ្លួននៅក្នុងតំបន់ហ្គាហ្សា ហើយបានអំពាវនាវឱ្យសហភាពអឺរ៉ុបកាត់ផ្តាច់ទំនាក់ទំនងទាំងអស់ជាមួយអ៊ីស្រាអែល និងដាក់ទណ្ឌកម្ម។

លោក សាអារ បាននិយាយថា កិច្ចពិភាក្សាបន្ថែមទៀតទាក់ទងនឹងការហាមប្រាមមន្ត្រីបរទេសនឹងត្រូវធ្វើឡើងជាមួយនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu)។

កាលពីថ្ងៃចន្ទ នាយករដ្ឋមន្ត្រីអេស្ប៉ាញ លោក ភេដ្រូ សេនឆេ (Pedro Sanchez) បានប្រកាសនូវវិធានការថ្មីចំនួន៩ ក្នុងគោលបំណងបញ្ឈប់អំពើប្រល័យពូជសាសន៍នៅតំបន់ហ្គាហ្សា ដែលរួមមានទាំងការហាមឃាត់ជាអចិន្ត្រៃយ៍ទៅលើការនាំចេញសព្វាវុធទៅកាន់ប្រទេសអ៊ីស្រាអែលផងដែរ។

ក្នុងរយៈពេលប៉ុន្មានខែថ្មីៗនេះ អ៊ីស្រាអែលបានហាមឃាត់ការចូលទៅក្នុងប្រទេសរបស់មន្ត្រី និងសកម្មជនលោកខាងលិចជាច្រើនរូប ដែលបង្ហាញពីសាមគ្គីភាពជាមួយប៉ាឡេស្ទីន និងរិះគន់សកម្មភាពយោធាអ៊ីស្រាអែលនៅតំបន់ហ្គាហ្សាស្ទ្រីប។

អ៊ីស្រាអែលបានសម្លាប់ជនជាតិប៉ាឡេស្ទីនជាង ៦៤.០០០នាក់នៅក្នុងការវាយលុកដ៏ឃោរឃៅមួយនៅតំបន់ហ្គាហ្សាចាប់តាំងពីខែតុលាឆ្នាំ២០២៣ មក៕

ដោយ៖ យា ចិន្តាខន្តី (ប្រភព៖ AA-AKP)