AKP ភ្នំពេញ ថ្ងៃទី០៩ ខែកញ្ញា ឆ្នាំ២០២៥ -- នាយករដ្ឋមន្ត្រីអេស្ប៉ាញលោក ភែដ្រូ សេនឆេ (Pedro Sanchez) បានប្រកាសកាលពីថ្ងៃចន្ទអំពីវិធានការថ្មីចំនួន៩ ក្នុងគោលបំណងបញ្ឈប់អំពើប្រល័យពូជសាសន៍នៅតំបន់ហ្គាហ្សា។

លោក សេនឆេ បាននិយាយនៅក្នុងសុន្ទរកថាតាមទូរទស្សន៍ថា «អ្វីដែលអ៊ីស្រាអែលកំពុងធ្វើ គឺមិនមែនជាការការពារខ្លួនទេ វាកំពុងបំផ្លាញប្រជាជនដែលគ្មានការការពារ»។

លោកបាននិយាយថា បើទោះបីជាប្រទេសអេស្ប៉ាញបាននិងកំពុងអនុវត្តការហាមឃាត់ការនាំចេញសព្វាវុធទៅកាន់ប្រទេសអ៊ីស្រាអែលចាប់តាំងពីឆ្នាំ២០២៣ មកហើយនោះក៏ដោយ ក៏រដ្ឋាភិបាលនឹងចេញច្បាប់ជាបន្ទាន់នូវការហាមឃាត់ជាអចិន្ត្រៃយ៍។

ទីក្រុងម៉ាឌ្រីដក៏នឹងហាមឃាត់នាវាដឹកជញ្ជូនប្រេងឥន្ធនៈទៅកាន់កងកម្លាំងអ៊ីស្រាអែលមិនឱ្យប្រើប្រាស់កំពង់ផែអេស្ប៉ាញផងដែរ។យន្តហោះដែលផ្ទុកសម្ភារៈការពារនឹងត្រូវបានហាមឃាត់ពីដែនអាកាសអេស្ប៉ាញ។

លោក សេនឆេ បាននិយាយបន្ថែមថា មនុស្សដែលពាក់ព័ន្ធដោយផ្ទាល់នៅក្នុងអំពើប្រល័យពូជសាសន៍ ការរំលោភសិទ្ធិមនុស្ស និងឧក្រិដ្ឋកម្មសង្គ្រាមនៅក្នុងតំបន់ហ្គាហ្សា នឹងត្រូវបានហាមឃាត់មិនឱ្យចូលប្រទេសអេស្ប៉ាញ។

ប្រទេសអេស្បាញក៏នឹងបង្កើនការរួមចំណែករបស់ខ្លួនដល់ទីភ្នាក់ងារអង្គការសហប្រជាជាតិសម្រាប់ជនភៀសខ្លួនប៉ាឡេស្ទីន (UNRWA) នូវថវិកាចំនួន ១០លានអឺរ៉ូ (១១,៧លានដុល្លារអាម៉េរិក) និងប្តេជ្ញាផ្តល់ជំនួយមនុស្សធម៌បន្ថែមចំនួន ១៥០លានអឺរ៉ូសម្រាប់តំបន់ហ្គាហ្សានៅក្នុងឆ្នាំ២០២៦ ផងដែរ។

លោក សេនឆេ បាននិយាយថា «យើងដឹងថា វិធានការទាំងនេះនឹងមិនគ្រប់គ្រាន់ដើម្បីបញ្ចប់ឧក្រិដ្ឋកម្មសង្គ្រាមនោះទេ ប៉ុន្តែយើងសង្ឃឹមថាវិធានការទាំងនេះនឹងត្រូវបានប្រើប្រាស់ដើម្បីដាក់សម្ពាធដល់នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu)និងសម្រាលទុក្ខលំបាករបស់ប្រជាជនប៉ាឡេស្ទីន»។ លោកបាននិយាយបន្ថែមថា ប្រទេស​អេស្ប៉ាញ​តែ​មួយ​គត់​មិន​អាច​បញ្ឈប់​សង្គ្រាម​បានទេប៉ុន្តែ​នោះក៏មិន​មាន​ន័យ​ថា​យើង​មិន​អាច​ព្យាយាមធ្វើវា​បាន​នោះដែរ៕

ដោយ៖ យា ចិន្តាខន្តី (ប្រភព៖ AA-AKP)