AKP ភ្នំពេញ ថ្ងៃទី០៨ ខែកញ្ញា ឆ្នាំ២០២៥ -- យោងតាមក្រសួងពាណិជ្ជកម្មឧស្សាហកម្ម និងថាមពលរបស់ប្រទេសកូរ៉េខាងត្បូង បានឱ្យដឹងថាការនាំចេញរបស់កូរ៉េខាងត្បូងទៅកាន់អាស៊ាន បានកើនឡើងដល់១០,៨៩ពាន់លានដុល្លារអាម៉េរិកនៅក្នុងខែសីហា ដែលកើនឡើង ១១,៩% បើធៀបទៅនឹងឆ្នាំមុន។

ទន្ទឹមនឹងនេះដែរ ការនាំចេញទៅកាន់សហរដ្ឋអាមេរិកបានធ្លាក់ចុះ១២% ហើយការនាំចេញទៅកាន់ប្រទេសចិនបានធ្លាក់ចុះ ២,៩% ក្នុងអំឡុងពេលដូចគ្នានេះ ដែលឆ្លុះបញ្ចាំងពីផលប៉ះពាល់នៃពន្ធគយរបស់សហរដ្ឋអាមេរិក និងបង្កើនការព្រួយបារម្ភចំពោះការធ្លាក់ចុះនៃការនាំចេញកាន់តែទូលំទូលាយ។ ទោះជាយ៉ាងណាក៏ដោយ ការកើនឡើងនៃការនាំចេញទៅកាន់អាស៊ានបានធ្វើឱ្យការនាំចេញសរុបរបស់កូរ៉េខាងត្បូងទៅកាន់កម្រិតវិជ្ជមានមួយ។

តម្លៃនៃការនាំចេញរបស់កូរ៉េខាងត្បូងទៅកាន់អាស៊ាន ដែលតាមទម្លាប់បានជាប់ចំណាត់ថ្នាក់លេខ៣ បន្ទាប់ពីការនាំចេញទៅកាន់ប្រទេសចិន និងសហរដ្ឋអាមេរិកនោះ បានលើសពីការនាំចេញទៅកាន់សហរដ្ឋអាមេរិកសម្រាប់ខែកក្កដា និងខែសីហាកន្លងទៅ។

ក្រុមអ្នកវិភាគបាននិយាយថា ការកើនឡើងនៃការវិនិយោគលើផ្នែកបញ្ញាសិប្បនិមិ្មត (AI) និងមជ្ឈមណ្ឌលទិន្នន័យ បានជំរុញឱ្យមានតម្រូវការខ្លាំងនៅទូទាំងទីផ្សារអេឡិចត្រូនិករបស់អាស៊ាន។

ការផលិតនាវា និងផលិតផលប្រេងក៏ជំរុញដល់កំណើនផងដែរ។ការនាំចេញនាវាបានកើនឡើងជិត ៣៦០% ខណៈដែលការនាំចេញប្រេងចម្រាញ់បានកើនឡើង ១៦,៣% ។ ការ​នាំ​ចេញ​គីមី​ឥន្ធនៈ​បាន​កើន​ឡើង១៣,៤% បើ​ទោះ​បីជា​កំណើន​ត្រូវ​បាន​ទប់​ស្កាត់​ដោយ​ការ​ប្រកួត​ប្រជែង​ខាងតម្លៃ​យ៉ាង​ខ្លាំង​ពី​អ្នក​ផលិត​ចិនក៏ដោយ។

ក្រុមហ៊ុនធំៗរបស់កូរ៉េខាងត្បូង ដូចជាក្រុមហ៊ុនយានយន្តហ៊ីយ៉ាន់ដាយនិងក្រុមហ៊ុន POSCO កំពុងពង្រីកការបោះជំហានរបស់ពួកគេនៅក្នុងតំបន់អាស៊ីអាគ្នេយ៍ដោយការសាងសង់រោងចក្រ និងមជ្ឈមណ្ឌលនាំចេញនៅក្នុងប្រទេសម៉ាឡេស៊ី ឥណ្ឌូណេស៊ី និងវៀតណាម ដោយពង្រឹងតួនាទីរបស់កូរ៉េខាងត្បូងនៅក្នុងខ្សែសង្វាក់ផ្គត់ផ្គង់ក្នុងតំបន់។

អ្នក​ជំនាញបាន​ព្យាករណ៍​ថា នៅ​ទី​បំផុត ​អាស៊ាន​អាច​វ៉ាដាច់​ទាំងសហរដ្ឋ​អាមេរិក និង​ចិន ដើម្បី​ក្លាយ​ជា​ទិសដៅ​នាំ​ចេញ​ធំ​ជាង​គេ​របស់​កូរ៉េខាងត្បូង។ ចំនួនប្រជាជនវ័យក្មេង វណ្ណៈកណ្តាលដែលកំពុងកើនឡើងយ៉ាងឆាប់រហ័ស និងការផ្លាស់ប្តូរឌីជីថលដែលកំពុងបង្កើនល្បឿន កំពុងធ្វើឱ្យតំបន់នេះក្លាយជាទីផ្សារដ៏គួរឱ្យទាក់ទាញកាន់តែខ្លាំងឡើងសម្រាប់ទំនិញកូរ៉េខាងត្បូង៕

ដោយ៖ យា ចិន្តាខន្តី (ប្រភព៖ VNA)