AKP ភ្នំពេញ ថ្ងៃទី០៨ ខែកញ្ញា ឆ្នាំ២០២៥ -- រដ្ឋមន្ត្រីក្រសួងកសិកម្មឥណ្ឌូណេស៊ី លោក អេនឌី អាំរ៉ាន់ ស៊ូឡៃមេន (Andi Amran Sulaiman)បានបញ្ជាក់សារជាថ្មីកាលពីថ្ងៃទី០៥ ខែកញ្ញា ឆ្នាំ២០២៥ថា ប្រទេសឥណ្ឌូណេស៊ីនឹងមិននាំចូលអង្ករទេរហូតដល់ដំណាច់ឆ្នាំ២០២៥។

លោក ស៊ូឡៃមេន បាន​បញ្ជាក់​ថា ក្នុង​រយៈពេល​ពីរ​ឆ្នាំ​កន្លង​មក​នេះរដ្ឋាភិបាល​ឥណ្ឌូណេស៊ី​បាន​នាំ​ចូល​អង្ករ​ជា​ប្រចាំ​ដើម្បី​ពង្រឹង​ទុនបម្រុង​ជាតិ។

ទោះជាយ៉ាងណាក៏ដោយ ឥណ្ឌូណេស៊ីមិនបាននាំចូលអង្ករទេនៅក្នុងឆ្នាំនេះ បើទោះបីជាមានវិបត្តិស្បៀងអាហារពិភពលោកក៏ដោយ នេះ​ក៏​ព្រោះ​តែ​ស្តុក​អង្ករ​របស់​ប្រទេសនេះនាពេល​បច្ចុប្បន្ន​មាន​ចំនួន​ប្រហែល៤លាន​តោន ដែល​ជា​តួលេខ​ច្រើនជាងពីរ​ដង​កាល​ពី​ឆ្នាំ​មុន។

យោងតាមទិន្នន័យពីការិយាល័យស្ថិតិឥណ្ឌូណេស៊ី (BPS) និងអង្គការស្បៀងអាហារ និងកសិកម្ម (FAO) បានឱ្យដឹងថា ការប្រមូលផលស្រូវឆ្នាំ២០២៥ ត្រូវបានព្យាករណ៍ថានឹងឈានដល់ចំនួន ៣៤-៣៥លានតោនដែលកើនឡើង ៤លានតោនបើប្រៀបធៀបទៅនឹងឆ្នាំមុន។

ការកើនឡើង ៤លានតោននេះក៏បានបង្កើនប្រាក់ចំណូលរបស់កសិករចំនួន ៦០លានលានរូពី (៣,៦ពាន់លានដុល្លារអាម៉េរិក) ផងដែរ។ លោកបានពន្យល់ថា ក្រោមគំនិតផ្តួចផ្តើមរបស់លោកប្រធានាធិបតីឥណ្ឌូណេស៊ីតាមរយៈការកែសម្រួលបទប្បញ្ញត្តិ ការកែលម្អកន្លែងផលិត និងការបន្ធូរបន្ថយការទិញជី បានធ្វើឱ្យការផលិតមានភាពប្រសើរឡើង៕

ដោយ៖ យា ចិន្តាខន្តី (ប្រភព៖ VNA)