AKP ភ្នំពេញ ថ្ងៃទី០៨ ខែកញ្ញា ឆ្នាំ២០២៥ -- យោងតាមទិន្នន័យពីក្រុមហ៊ុនផ្លូវដែករដ្ឋចិន (China Railway) បានឱ្យដឹងថា ប្រទេសចិនបានប្រតិបត្តិការរថភ្លើងទេសចរណ៍ជាង ៥០០គ្រឿងនៅក្នុងរដូវក្តៅនេះ។

លោក ហ្ស៊ូ វេនហ្សុង (Zhu Wenzhong) ប្រធាននាយកដ្ឋានដឹកជញ្ជូនអ្នកដំណើរនៅក្រុមហ៊ុនផ្លូវដែករដ្ឋចិន បាននិយាយថា រថភ្លើងទេសចរណ៍ផ្តល់ជូននូវដំណើរកម្សាន្តដែលស្របតាមតម្រូវការរបស់ក្រុមទេសចរណ៍ជាមួយនឹងផ្លូវដែលអាចបត់បែនបាន កន្លែងឈប់ច្រើនគោលដៅ និងឱកាសទស្សនាទេសភាពស្អាតៗក្នុងអំឡុងពេលធ្វើដំណើរឆ្លងកាត់។

ក្នុងចំណោមសេវាកម្មឯកទេសទាំងនោះ រថភ្លើងទេសចរណ៍ពណ៌ប្រាក់ផ្តល់ជូនជាពិសេសដល់អ្នកដំណើរដែលមានវ័យចំណាស់ដើម្បីបំពេញតម្រូវការ និងចំណង់ចំណូលចិត្តតែមួយគត់របស់ពួកគេ។

រថភ្លើងទេសចរណ៍ដែលមានលក្ខណៈពិសេសសម្រាប់មនុស្សចាស់បានចាកចេញពីស្ថានីយ៍រថភ្លើងហាប៊ីន ក្នុងទីក្រុងហាប៊ីន នៅភាគឦសាននៃខេត្តហីឡូងជាំង ប្រទេសចិន កាលពីថ្ងៃទី២២ ខែសីហាឆ្នាំ២០២៥ ដើម្បីជួយគាំទ្រដល់ទេសចរណ៍រដូវក្តៅរបស់ខេត្ត។

លោក លី ដុង (Li Dong) អគ្គនាយករងនៃក្រុមហ៊ុនទេសចរណ៍ និងវប្បធម៌ផ្លូវដែកហាប៊ីន បាននិយាយថា ក្រុមហ៊ុនផ្លូវហាប៊ីនផ្លូវដែកចិន បានជំរុញយ៉ាងសកម្មនៃការរួមបញ្ចូលផ្លូវដែក និងទេសចរណ៍ចាប់តាំងពីការចាប់ផ្តើមនៃរដូវក្តៅមក។

ដើម្បីឆ្លើយតបទៅនឹងតម្រូវការទីផ្សារ ក្រុមហ៊ុនបានណែនាំផលិតផលទេសចរណ៍ប្រកបដោយនវានុវត្តន៍ ដំណើរការរថភ្លើងទេសចរណ៍សម្រាប់មនុស្សវ័យចំណាស់ទៅកាន់គោលដៅនានារួមមាន ខេត្តស៊ីឈួន ទីក្រុងឆុងជីង ទីក្រុងហុងកុង ទីក្រុងម៉ាកាវ និងទីក្រុងអាសាន ក្នុងតំបន់ស្វយ័តម៉ុងហ្គោលីខាងក្នុង។

ស្ថិតនៅចំកណ្តាលនៃភ្នំឃីនកាន់ ឧទ្យានព្រៃឈើជាតិអាសានមានព្រៃឈើដ៏បរិសុទ្ធ ទេសភាពភ្នំភ្លើង ទឹកហូរក្តៅ និងតំបន់ដីសើម ដែលធ្វើឱ្យវាក្លាយជាកន្លែងទេសចរណ៍អេកូឡូស៊ីដ៏ទាក់ទាញ។

លោក លុយ យូ (Liu Yu) អនុប្រធានផ្នែកទីផ្សារនៃឧទ្យានព្រៃឈើជាតិអាសាន បាននិយាយថា រថភ្លើងទេសចរណ៍បានបង្កើនចំនួនភ្ញៀវទេសចរទៅកាន់តំបន់ទេសភាពអាសាន។

រថភ្លើងទេសចរណ៍តភ្ជាប់ទីក្រុងភាគខាងត្បូងជាច្រើនរបស់ប្រទេសចិនដោយផ្ទាល់ទៅកាន់តំបន់អាសាន ដោយយកឈ្នះទៅលើការដឹកជញ្ជូនធម្មតាដែលនៅមានកម្រិត និងចូលទៅកាន់ទីផ្សារឆ្ងាយៗ ដូចជាតំបន់ដីសណ្ដទន្លេយ៉ាងសេជាដើម។ សេវាកម្មនេះកាត់បន្ថយការកកស្ទះនៃការដឹកជញ្ជូន និងទាក់ទាញភ្ញៀវទេសចរយ៉ាងច្រើនពីភាគខាងត្បូងប្រទេសចិន។

តំបន់ទេសភាពអាសាន បានស្វាគមន៍ភ្ញៀវទេសចរប្រហែល២៣.០០០នាក់ទៅទស្សនាតាមរយៈរថភ្លើងទេសចរណ៍ចំនួន ៨៥ជើងចាប់តាំងពីដើមឆ្នាំនេះ ដោយបង្កើតបានប្រាក់ចំណូលជាង ២៥លានយន់(៣,៥លានដុល្លារអាម៉េរិក) តាមរយៈការចំណាយទេសចរណ៍ក្នុងស្រុកដែលរួមមានទាំងការស្នាក់នៅ អាហារ និងការកម្សាន្តផ្សេងៗ៕

ដោយ៖ យា ចិន្តាខន្តី (ប្រភព៖ BRNN)