AKP ភ្នំពេញ ថ្ងៃទី០៥ ខែកញ្ញា ឆ្នាំ២០២៥ -- មន្ត្រីជាន់ខ្ពស់មួយរូបរបស់ម៉ាឡេស៊ីបាននិយាយថា ប្រទេសម៉ាឡេស៊ីប្តេជ្ញាធ្វើជាម្ចាស់ផ្ទះប្រកបដោយជោគជ័យនូវកិច្ចប្រជុំកំពូលអាស៊ានលើកទី៤៧ និងកិច្ចប្រជុំកំពូលពាក់ព័ន្ធនៅខែក្រោយ។

បន្ទាប់ពីការជជែកដេញដោលទៅលើផែនការម៉ាឡេស៊ីលើកទី១៣ (13MP) នៅព្រឹទ្ធសភាម៉ាឡេស៊ីកាលពីថ្ងៃទី០៣ ខែកញ្ញា ឆ្នាំ២០២៥ អនុរដ្ឋមន្ត្រីក្រសួងការបរទេសម៉ាឡេស៊ី លោក ម៉ូហាម៉ាដ អាឡាមីន (Mohamad Alamin) បាននិយាយថា វត្តមានរបស់មេដឹកនាំពិភពលោកនៅខែក្រោយនេះនឹងលើកមុខមាត់របស់ប្រទេសម៉ាឡេស៊ី ដែលជាមជ្ឈមណ្ឌលការទូតក្នុងតំបន់ដែលគួរឱ្យគោរព ខណៈដែលវាក៏ជាការបញ្ជាក់ពីការប្តេជ្ញាចិត្តរបស់ប្រទេសមួយនេះចំពោះសន្តិភាព ស្ថិរភាព និងវិបុលភាពទាំងក្នុងកម្រិតតំបន់ និងពិភពលោក។

លោកបានកត់សម្គាល់ថា គោលនយោបាយការបរទេសរបស់ម៉ាឡេស៊ី ដែលឯករាជ្យ និងអព្យាក្រឹត ហើយឈរលើវិធីសាស្រ្តជាគោលការណ៍ និងជាក់ស្តែង នឹងបន្តពង្រឹងគោលជំហររបស់ប្រទេសមួយនេះនៅលើឆាកពិភពលោក។

លោកបានបញ្ជាក់ទៀតថា ការធ្វើជាម្ចាស់ផ្ទះនៃកិច្ចប្រជុំកំពូលអាស៊ានលើកទី៤៦ កិច្ចប្រជុំកំពូលក្រុមប្រឹក្សាសហប្រតិបត្តិការអាស៊ាន-ឈូងសមុទ្រលើកទី២ (GCC) កិច្ចប្រជុំកំពូលអាស៊ាន-GCC-ចិន ក៏ដូចជាកិច្ចប្រជុំរដ្ឋមន្ត្រីការបរទេសអាស៊ាន និងកិច្ចប្រជុំពាក់ព័ន្ធនានា បានដើរតួជាវេទិការដ៏សំខាន់សម្រាប់រដ្ឋជាសមាជិកអាស៊ានក្នុងការបញ្ចេញនូវការព្រួយបារម្ភយ៉ាងខ្លាំងចំពោះបញ្ហាប្រឈមរបស់ពិភពលោកនាពេលបច្ចុប្បន្ន។

លោកបាននិយាយថា ទាំងនេះរួមមានភាពតានតឹងផ្នែកភូមិសាស្ត្រនយោបាយ ការប្រែប្រួលអាកាសធាតុ ភាពមិនប្រាកដប្រជានៃសេដ្ឋកិច្ចសកលលោក និងវិបត្តិមនុស្សធម៌ដូចជានៅក្នុងប្រទេសមីយ៉ាន់ម៉ា និងប៉ាឡេស្ទីនជាដើម។

លោកបាននិយាយថា ប្រទេសម៉ាឡេស៊ីបានសង្កត់ធ្ងន់ទៅលើតម្រូវការសម្រាប់អាស៊ានក្នុងការពង្រឹងការរួបរួមផ្ទៃក្នុង ចាត់វិធានការយ៉ាងម៉ឺងម៉ាត់ទៅលើបញ្ហាដែលធ្វើឱ្យខូចដល់សាមគ្គីភាព និងភាពជឿជាក់របស់ខ្លួន ហើយនៅតែជាគោលការណ៍ក្នុងការបញ្ជាក់ពីគោលជំហររបស់តំបន់នេះចំពោះបញ្ហាពិភពលោក៕

ដោយ៖ យា ចិន្តាខន្តី (ប្រភព៖ VNA)