AKP ភ្នំពេញ ថ្ងៃទី០៤ ខែកញ្ញា ឆ្នាំ២០២៥ -- រដ្ឋមន្ត្រីប្រេងអ៊ីរ៉ង់ លោក ម៉ូហ៍សេន ប៉ាក់នេចាដ (Mohsen Paknejad) បាននិយាយកាលពីថ្ងៃពុធថា ការនាំចេញប្រេងរបស់ប្រទេសបានកើនឡើងជិត ៦៣០.០០០បារ៉ែលក្នុងមួយខែ ក្នុងអំឡុងពេល ៤ខែដំបូងនៃឆ្នាំប្រតិទិនអ៊ីរ៉ង់បច្ចុប្បន្ន បើធៀបនឹងរយៈពេលដូចគ្នាកាលពីឆ្នាំមុន។

យោងតាមទីភ្នាក់ងារសារព័ត៌មាន Shana របស់ក្រសួងប្រេង បានឱ្យដឹងថា ថ្លែងនៅខាងក្រៅកិច្ចប្រជុំគណៈរដ្ឋមន្ត្រីក្នុងទីក្រុងតេអេរ៉ង់ លោក ប៉ាក់នេចាដ បាននិយាយថា ប្រទេសអ៊ីរ៉ង់មិនប្រឈមមុខនឹងការលំបាកក្នុងការលក់ប្រេងឆៅរបស់ខ្លួន។

លោករដ្ឋមន្ត្រីមិនបានបង្ហាញពីកម្រិតនៃការផលិត ឬការនាំចេញប្រេងបច្ចុប្បន្នទេ ប៉ុន្តែលោកបានកត់សម្គាល់ថា សមត្ថភាពផលិតកម្មត្រូវបានកំណត់គោលដៅឱ្យឈានដល់ ៤,៨លានបារ៉ែលក្នុងមួយថ្ងៃនៅខែមីនា ឆ្នាំ២០២៩។

ការកើនឡើងនៃការនាំចេញនេះបានកើតឡើង បើទោះបីជាការដាក់ទណ្ឌកម្មរបស់សហរដ្ឋអាមេរិកលើវិស័យប្រេង និងគីមីឥន្ធនៈរបស់ប្រទេសអ៊ីរ៉ង់ ដែលត្រូវបានរឹតបន្តឹងក្នុងឆ្នាំ២០១៨បន្ទាប់ពីទីក្រុងវ៉ាស៊ីនតោនបានដកខ្លួនចេញពីកិច្ចព្រមព្រៀងនុយក្លេអ៊ែរ ដែលត្រូវបានគេស្គាល់ជាផ្លូវការថាជាផែនការសកម្មភាពទូលំទូលាយរួម។

ដោយឡែកពីគ្នា នាយកប្រតិបត្តិក្រុមហ៊ុនជាតិគីមីឥន្ធនៈជាតិ (NPC) លោក ហាសសាន់ អាប់បាសហ្សាដេហ៍ (Hassan Abbaszadeh) បាននិយាយថា ប្រទេសអ៊ីរ៉ង់បានផលិតគីមីឥន្ធនៈចំនួន ៣២លានតោននៅចន្លោះពីថ្ងៃទី២១ ខែមីនា ដល់ថ្ងៃទី២២ ខែសីហា ឆ្នាំ២០២៥។ ក្នុងចំណោមនោះ មាន ១៣លានតោនដែលមានតម្លៃ ៥,៥ប៊ីលានដុល្លារអាម៉េរិកត្រូវបាននាំចេញ៕

ដោយ៖ មូល មិនា (ប្រភព៖ ស៊ីនហួ)