AKP ភ្នំពេញ ថ្ងៃទី០៤ ខែកញ្ញា ឆ្នាំ២០២៥--ក្រុមខេត្តត្បូងឃ្មុំ និងក្រុមមន្ទីរអប់រំ យុវជន និងកីឡាខេត្តកំពង់ចាមប្រជែងបាន៣ពិន្ទុដូចៗគ្នា បន្ទាប់ពីបានយកឈ្នះលើគូប្រកួតរៀងៗខ្លួន នៅក្នុងការប្រកួតសន្សំពិន្ទុក្នុងពូល គកាលពីល្ងាចថ្ងៃទី០៣ ខែកញ្ញា ឆ្នាំ២០២៥ នៃពានរង្វាន់សម្តេចតេជោ ហ៊ុន សែន ថ្នាក់ខេត្ត រដូវកាល ២០២៥-២០២៦។

ក្រុមខេត្តត្បូឃ្មុំ ដែលរកបាន៣ពិន្ទុនេះ គឺបានយកឈ្នះក្រុមមន្ទីរអប់រំខេត្តព្រៃវែង ដោយលទ្ធផល ៨-២ ខណៈក្រុមមន្ទីរអប់រំ យុវជន និងកីឡាខេត្តកំពង់ចាមដែលដណ្តើមបាន៣ពិន្ទុដែរនេះ គឺបន្ទាប់ពីបានយកឈ្នះលើក្រុមភ្ញៀវ ក្រុមមន្ទីរអប់រំខេត្តស្វាយរៀង ដោយលទ្ធផលបច្ចេកទេស ៤-០។ សម្រាប់២ប្រកួតនេះ គឺលេងសន្សំពិន្ទុក្នុងពូល គ ហើយក្រោយឆ្លងកាត់៤ប្រកួតដូចគ្នា គឺក្រុមខេត្តត្បូងឃ្មុំបន្តក្តោបក្តាប់លើកំពូលតារាងបណ្តោះអាសន្ន ក្រោយឈ្នះ៤ប្រកួត មាន១២ពិន្ទុ ខណៈក្រុមមន្ទីរអប់រំខេត្តកំពង់ចាម ឈរលេខ២ មាន៩ពិន្ទុ ក្រោយឈ្នះ៣ និងចាញ់១។ ចំពោះមន្ទីអប់រំ ខេត្តស្វាយរៀង ឈរលេខ៤ ក្រោយឈ្នះ១ និងចាញ់៣ ស្របពេលដែលក្រុមមន្ទីរអប់រំខេត្តព្រៃវែង ឈរបាតតារាង ក្នុងចំណោម៤ក្រុម ក្នុងពូល គ ក្រោយចាញ់ទាំង៤ប្រកួត។

គួរបញ្ជាក់ថា ការប្រកួតបាល់ទាត់ពានរង្វាន់សម្តេចតេជោ ថ្នាក់ខេត្ត ឆ្នាំ២០២៥-២០២៦ មានក្រុមតំណាងរាជធានីខេត្តសរុប ១៩ក្រុមចូលរួម ដោយចែកចេញជា៥ពូល ហើយដំណើរការប្រកួតវគ្គជម្រុះក្នុងពូលទាំង៥ ចាប់ពីថ្ងៃទី២២ ខែកក្កដា ដល់ថ្ងៃទី១៤ ខែធ្នូ ឆ្នាំ២០២៥។ ក្រុមទាំងអស់ក្នុងពូលទាំង៥ ត្រូវប្រកួតសន្សំពិន្ទុវិលជុំក្នុងពូលរៀងៗខ្លួន ចំនួន២ជើង ក្នុងដី និងក្រៅដី ដើម្បីស្វែងរកចំណាត់ថ្នាក់លេខ១ និងលេខ២ ក្នុងពូលនីមួយៗឡើងជុំបន្ត នឹងបន្តប្រកួតទៅវគ្គពាក់កណ្តាលផ្តាច់ព្រ័ត្រ និងផ្តាច់ព្រ័ត្រ។ ក្រុមជ័យលាភីថ្នាក់ខេត្តនឹងត្រូវឡើងទៅប្រកួតជម្រុះបន្តជាមួយក្រុមនានាដែលកំពុងឈរជើងក្នុងក្របខ័ណ្ឌលីគកំពូលកម្ពុជា ឬជម្រើសជើងឯកខេមបូឌានព្រីមៀរលីគ ១១ក្រុម ហៅថា ការប្រកួតពានរង្វាន់សម្តេចតេជោ ហ៊ុន សែន ថ្នាក់ជាតិ៕

ដោយ ហេង ណាលីន (រូបភាព៖ Hun Sen Cup)