AKP ភ្នំពេញ ថ្ងៃទី០៣ ខែកញ្ញា ឆ្នាំ២០២៥ -- ប្រធានក្រុមប្រឹក្សាសហភាពអឺរ៉ុប លោក អានតូញ៉ូ កូស្តា (Antonio Costa) ប្រធានាធិបតីស្លូវេនី លោកស្រី ណាតាសា ភីក មូសារ (Natasa Pirc Musar) និងរដ្ឋមន្ត្រីការបរទេសស្លូវេនី លោក តាន់ចា ហ្វាជុន (Tanja Fajon) កាលពីថ្ងៃចន្ទបានជំរុញឱ្យមានសន្តិភាពនៅតំបន់ហ្គាហ្សាក្នុងអំឡុងពេលវេទិកា Bled Strategic Forum ដែលជាការប្រមូលផ្តុំគោលនយោបាយការបរទេសដ៏លេចធ្លោបំផុតរបស់ប្រទេសស្លូវេនី។

លោក ហ្វាជុន ដែលបានបើកវេទិការយៈពេល ២ថ្ងៃនៅក្នុងរមណីយដ្ឋាន Alpine នៃតំបន់ Bled បាននិយាយថា បទឈប់បាញ់នៅតំបន់ហ្គាហ្សាគឺមានភាព «បន្ទាន់» ដោយលោកបានសង្កត់ធ្ងន់ថាចំណាប់ខ្មាំងត្រូវតែដោះលែង ហើយជំនួយមនុស្សធម៌ត្រូវតែអនុញ្ញាតឱ្យចូលទៅជួយ។

លោក កូស្តា បានគូសបញ្ជាក់ថា ខណៈពេលដែលអ៊ីស្រាអែលមានសិទ្ធិការពារខ្លួន នេះមិនអាចបង្ហាញអំពីភាពត្រឹមត្រូវនៃ «ការបំផ្លិចបំផ្លាញហេដ្ឋារចនាសម្ព័ន្ធស៊ីវិល ឬការដាក់ទណ្ឌកម្មរួមនៃប្រជាជនទាំងមូល» នោះទេ។ លោកបានអំពាវនាវឱ្យមានបទឈប់បាញ់ជាបន្ទាន់ និងប្រកបដោយនិរន្តរភាព ការផ្ដល់ជំនួយមនុស្សធម៌ដោយគ្មានការរារាំង ការបញ្ឈប់សកម្មភាពតាំងទីលំនៅខុសច្បាប់ និងការប្តេជ្ញាចិត្តជាអន្តរជាតិជាថ្មីចំពោះដំណោះស្រាយរដ្ឋពីរ។

លោកស្រី មូសារ បានកត់សម្គាល់ថា «តាមរយៈការដោះស្រាយជាមួយតំបន់ហ្គាហ្សា យើងបង្ហាញឱ្យឃើញថាតើយើងជានរណា ... ការដោះស្រាយនៅតំបន់ហ្គាហ្សារបស់យើងឆ្លុះបញ្ចាំងពីការយល់ដឹងអំពីមនុស្សជាតិរបស់យើង»។

លោក ហ្វាជុន បាននិយាយថា ស្ថានការណ៍នៅតំបន់ហ្គាហ្សាគឺ«ហួសពីការស្មានជារៀងរាល់ថ្ងៃ» ដោយសារតែ «ការទម្លាក់គ្រាប់បែកឥតឈប់ឈរ និងការអត់ឃ្លាន» ដោយលោកបានបញ្ជាក់ម្តងទៀតថា សន្តិភាពត្រូវតែទាមទារយុត្តិធម៌ ហើយ «ដំណោះស្រាយរដ្ឋពីរដែលអាចសម្រេចបានគឺជាផ្លូវតែមួយគត់ឆ្ពោះទៅមុខ»។

ប្រទេសស្លូវេនីបានទទួលស្គាល់រដ្ឋប៉ាឡេស្ទីនក្នុងខែមិថុនា ឆ្នាំ២០២៤ហើយបច្ចុប្បន្នជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ៕

ដោយ៖ មូល មិនា (ប្រភព៖ ស៊ីនហួ)