AKP ភ្នំពេញ ថ្ងៃទី០៣ ខែកញ្ញា ឆ្នាំ២០២៥ -- កាសែត Jakarta Globe បានរាយការណ៍ថា ប្រធានាធិបតីឥណ្ឌូណេស៊ី លោក ប្រាបូវ៉ូ ស៊ូប៊ីអាន់តូ (Prabowo Subianto) បានប្តេជ្ញាកាលពីថ្ងៃចន្ទថានឹងមិនដកថយសូម្បីតែមួយជំហាន បន្ទាប់ពីមានការតវ៉ាដោយហិង្សានៅក្នុងប្រទេស ដែលបានបណ្តាលឱ្យមនុស្សយ៉ាងហោចណាស់បួននាក់បានស្លាប់។

បន្ទាប់ពីបានទៅសួរសុខទុក្ខជនរងគ្រោះនៅមន្ទីរពេទ្យនៅភាគខាងកើតទីក្រុងហ្សាកាតា លោក ប្រាបូវ៉ូ បាននិយាយថា អំពើហិង្សាត្រូវបានបង្កឡើងដោយ «កុបកម្ម មិនមែនក្រុមបាតុករទេ» ដោយលោកបានចោទប្រកាន់ក្រុមទាំងនោះថាប៉ុនប៉ងធ្វើឱ្យប្រទេសជាតិមានអស្ថិរភាព។

ចាប់តាំងពីការប៉ះទង្គិចគ្នាបានចាប់ផ្តើមមក មនុស្ស ៤៣នាក់ត្រូវបានបញ្ជូនទៅសម្រាកព្យាបាលនៅមន្ទីរពេទ្យ ដោយ ១៦នាក់ត្រូវបានអនុញ្ញាតឱ្យចេញហើយ និង ១៧នាក់ទៀតកំពុងស្ថិតក្រោមការមើលថែដោយក្នុងនោះមានមន្ត្រីប៉ូលីសចំនួន ១៤នាក់ និងជនស៊ីវិលចំនួន ៣នាក់។ជនរងគ្រោះ​ម្នាក់​ជា​ស្ត្រី​ដែលកំពុងធ្វើដំណើរ​ទៅ​ផ្សារ​បាន​រងរបួស​បាក់​ភ្លៅ​ពេលដែល​ក្រុម​ចោរបាន​ឆក់​យក​ម៉ូតូ​របស់​នាង​។

លោក ប្រាបូវ៉ូ បាននិយាយថា «គោលបំណងរបស់ពួកគេ គឺមិនមែនដើម្បីបញ្ចេញនូវសេចក្តីប្រាថ្នានោះទេ។ គោលបំណងរបស់ពួកគេ គឺធ្វើឱ្យមានភាពវឹកវរ រំខានដល់ការរស់នៅរបស់ប្រជាជន និងបំផ្លាញកិច្ចខិតខំប្រឹងប្រែងអភិវឌ្ឍន៍ជាតិក្នុងគោលបំណងបញ្ចប់ភាពក្រីក្រ»។

លោកប្រធានាធិបតីបានបញ្ជាឱ្យអគ្គស្នងការនគរបាលជាតិ លោក លីស្ទីយ៉ូ សីហ្គីត ប្រាបូវ៉ូ (Listyo Sigit Prabowo) ផ្តល់ការលើកទឹកចិត្តជាពិសេសដល់មន្ត្រីដែលរងរបួសក្នុងការប៉ះទង្គិចគ្នា ដែលភាគច្រើនបានទទួលរងរបួសធ្ងន់ធ្ងរ រួមទាំងការបាក់ឆ្អឹងលលាដ៍ក្បាល បាក់ដៃជើង និងប៉ះពាល់ដល់សរីរាង្គដែលបង្កឱ្យរងការខូចខាតជាដើម។

លោក ប្រាបូវ៉ូ ក៏បានថ្កោលទោសចំពោះការបំផ្លិចបំផ្លាញអគារសភាក្នុងទីក្រុងហ្សាកាតាផងដែរ ដោយបានហៅវាថាជាការវាយប្រហារទៅលើលទ្ធិប្រជាធិបតេយ្យ។

លោកបាននិយាយថា «អគារសភាតំណាងឱ្យអធិបតេយ្យភាពជាតិ។ការដុតបំផ្លាញវាជាការបង្ហាញពីចេតនាមិនមែនដើម្បីតវ៉ាទេ ប៉ុន្តែដើម្បីបង្កើតភាពចលាចល»។

លោក​បាន​បន្ថែម​ថា «ខ្ញុំ​នឹង​មិន​ដក​ថយ​ទេសូម្បី​តែ​មួយ​ជំហាន ខ្ញុំ​ជឿ​ថាប្រជាជន​នៅ​ជាមួយ​ខ្ញុំ»។

លោក ប្រាបូវ៉ូ បានប្រកាសកាលពីថ្ងៃអាទិត្យថា គណបក្សនយោបាយបានសម្រេចចិត្តលុបចោលអត្ថប្រយោជន៍ និងឯកសិទ្ធិមួយចំនួនសម្រាប់សមាជិកសភា។

លោកបាននិយាយ​ថា គណបក្ស​បាន​ទទួល​យក​អត្ថប្រយោជន៍​នោះ រួម​ទាំង​ចំនួន​ប្រាក់​ឧបត្ថម្ភ​ដល់​សមាជិក​សភានឹង​ត្រូវបាន​កាត់​បន្ថយ និង​ផ្អាក​ដំណើរ​ទស្សនកិច្ច​ការងារទៅ​បរទេស។

លោក ប្រាបូវ៉ូ ក៏​បាន​លុប​ចោល​ការ​ធ្វើ​ដំណើរ​របស់​លោក​ទៅ​ប្រទេស​ចិនផងដែរ ​ដោយ​សារតែ​ការ​តវ៉ា​នៅ​ក្នុង​ទីក្រុង​មួយ​ចំនួន​ក្នុង​ប្រទេស​ឥណ្ឌូណេស៊ី ដែល​ក្រុម​បាតុករ​បាន​ដុត​អគារស្ថាប័ន​នីតិប្បញ្ញត្តិ​ក្នុង​តំបន់។

ការ​តវ៉ា​ដែល​បាន​ចាប់​ផ្តើម​កាល​ពី​សប្តាហ៍​មុន​បាន​កំណត់​គោល​ដៅទៅលើ​ប្រាក់​ឧបត្ថម្ភ​របស់​សមាជិក​សភា។ សកម្មភាពរបស់ប៉ូលិសបានជំរុញឱ្យមានការតវ៉ាកាន់តែច្រើនឡើង បន្ទាប់ពីអ្នករត់ម៉ូតូដឹកអាហារម្នាក់អាយុ២១ឆ្នាំ ឈ្មោះ អាហ្វាន់ គើនីអាវ៉ាន់ (Affan Kurniawan) ត្រូវបានសម្លាប់បន្ទាប់ពីត្រូវបានរថយន្តពាសដែករបស់ប៉ូលិសបុកកាលពីថ្ងៃព្រហស្បតិ៍។

មនុស្សយ៉ាងហោចណាស់បីនាក់ផ្សេងទៀតត្រូវបានសម្លាប់កាលពីថ្ងៃសុក្រនៅក្នុងការតវ៉ាដោយហិង្សានៅទូទាំងប្រទេស៕

ដោយ៖ យា ចិន្ដាខន្ដី (ប្រភព៖ AA-AKP)