AKP ភ្នំពេញ ថ្ងៃទី០៣ ខែកញ្ញា ឆ្នាំ២០២៥ -- ប្រធានាធិបតីចិន លោក ស៊ី ជីនពីង (Xi Jinping) និងប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) កាលពីថ្ងៃអង្គារ បានសន្យាធ្វើឱ្យកាន់តែស៊ីជម្រៅនូវភាពជាដៃគូយុទ្ធសាស្ត្រគ្រប់ជ្រុងជ្រោយទ្វេភាគី ក្នុងអំឡុងពេលនៃកិច្ចពិភាក្សានៅទីក្រុងប៉េកាំង ដោយបានសង្កត់ធ្ងន់ទៅលើអ្វីដែលពួកគេបានពិពណ៌នាថាជាកម្រិតនៃការជឿទុកចិត្ត និងកិច្ចសហប្រតិបត្តិការផ្នែកនយោបាយដែលមិនធ្លាប់មានពីមុនមក។ នេះបើយោងតាមវិមានក្រឹមឡាំង។

ក្នុងអំឡុងពេលនៃកិច្ចប្រជុំនៅមហាសាលប្រជាជន លោក ស៊ី បានសាទរចំពោះលោក ពូទីន ថាជាមិត្តយូរអង្វែង ដោយលោកបាននិយាយថាទំនាក់ទំនងរវាងប្រទេសចិន និងរុស្ស៊ី បានឈរលើការសាកល្បងនៃកាលៈទេសៈអន្តរជាតិ ហើយឥឡូវនេះបានធ្វើជាគំរូនៃទំនាក់ទំនងអន្តររដ្ឋផងដែរ។

លោកបាននិយាយថា ប្រទេសទាំងពីរបានប្តេជ្ញាចិត្តដើម្បីគាំទ្រលទ្ធផលនៃសង្គ្រាមលោកលើកទី២ និងធ្វើការរួមគ្នាសម្រាប់ប្រព័ន្ធអភិបាលកិច្ចសកលលោកដែលមានភាពត្រឹមត្រូវ និងសមហេតុផលបន្ថែមទៀត។

លោក ស៊ី ក៏បានបង្ហាញអំពីឆន្ទៈរបស់ប្រទេសចិនក្នុងការបង្កើនការផ្លាស់ប្តូរកម្រិតខ្ពស់ជាមួយរុស្ស៊ី គាំទ្រគ្នាទៅវិញទៅមក ការអភិវឌ្ឍ និងការសម្របសម្រួលគោលជំហរភ្លាមៗទៅលើបញ្ហាទាក់ទងនឹងផលប្រយោជន៍ស្នូល និងកង្វល់សំខាន់ៗរបស់ប្រទេសទាំងពីរ ព្រមទាំងជំរុញការអភិវឌ្ឍកាន់តែខ្លាំងនៃទំនាក់ទំនងចិន និងរុស្ស៊ី។ នេះបើយោងតាមទីភ្នាក់ងារសារព័ត៌មានរដ្ឋស៊ីនហួរបស់ចិន។

ចំណែកលោក ពូទីន បាននិយាយថា ទំនាក់ទំនងរុស្ស៊ី-ចិន គឺស្ថិតក្នុងកម្រិតខ្ពស់ដែលមិនធ្លាប់មានពីមុនមក ដោយកត់សម្គាល់ពីការចងចាំនៃភាពជាបងប្អូនក្នុងសម័យសង្រ្គាម និងជំនួយទៅវិញទៅមកដែលបានបង្កើតមូលដ្ឋានគ្រឹះនៃភាពជាដៃគូនាពេលបច្ចុប្បន្ននេះ។

លោកបាននិយាយថា «យើងនៅជាមួយគ្នានៅពេលនោះ យើងនៅជាមួយគ្នាឥឡូវនេះ» ដោយបានអរគុណចំពោះលោក ស៊ី សម្រាប់ការអញ្ជើញនិងបង្ហាញពីទំនុកចិត្តទៅលើលទ្ធផលនៃកិច្ចពិភាក្សា។

វិមានក្រឹមឡាំងបាននិយាយថា របៀបវារៈនៃកិច្ចពិភាក្សារួមមាន ការពង្រឹងភាពជាដៃគូទូលំទូលាយ និងអន្តរកម្មយុទ្ធសាស្ត្រ ជំរុញកិច្ចសហប្រតិបត្តិការជាក់ស្តែង និងការបង្កើនការសម្របសម្រួលលើវេទិកាពហុភាគី រួមជាមួយនឹងបញ្ហាក្នុងតំបន់ និងពិភពលោក។

មេដឹកនាំទាំងពីរក៏ត្រូវបានគេរំពឹងផងដែរថានឹងពិភាក្សាអំពីសង្គ្រាមអ៊ុយក្រែន និងកិច្ចប្រជុំកំពូលកាលពីខែមុនរវាងលោក ពូទីន និងប្រធានាធិបតីសហរដ្ឋអាមេរិក លោក ដូណាល់ ត្រាំ នៅទីក្រុងអេនកូរ៉េក រដ្ឋអាឡាស្កា៕

ដោយ៖ យា ចិន្ដាខន្ដី (ប្រភព៖ AA-AKP)