AKP ភ្នំពេញ ថ្ងៃទី០៣ ខែកញ្ញា ឆ្នាំ២០២៥ -- ក្រសួងសុខាភិបាលនៅតំបន់ហ្គាហ្សាបាននិយាយកាលពីថ្ងៃអង្គារថា មនុស្សចំនួន ១៨៥នាក់ ដែលរួមមានទាំងកុមារ ១២នាក់ បានស្លាប់ដោយសារការអត់ឃ្លាននៅក្នុងខែសីហា ដែលជាតួលេខខ្ពស់បំផុតប្រចាំខែដែលបានកត់ត្រាចាប់តាំងពីសង្គ្រាមរបស់អ៊ីស្រាអែលលើតំបន់នេះបានចាប់ផ្តើមជិតពីរឆ្នាំមុនមក។

ក្រសួងបាននិយាយថា ការស្លាប់ចំនួន ៧០នាក់បានកើតឡើងបន្ទាប់ពីប្រព័ន្ធត្រួតពិនិត្យភាពអត់ឃ្លានដែលគាំទ្រដោយអង្គការសហប្រជាជាតិដែលរួមបញ្ចូលគ្នានូវចំណាត់ថ្នាក់ដំណាក់កាលសន្តិសុខស្បៀង (IPC) បានប្រកាសជាផ្លូវការនូវតំបន់ហ្គាហ្សាជាតំបន់ទុរ្ភិក្សកាលពីខែមុន។

មន្ត្រីសុខាភិបាលបានរាយការណ៍ថា កុមារជាង ៤៣.០០០នាក់ដែលមានអាយុក្រោម ៥ឆ្នាំកំពុងទទួលរងកង្វះអាហារូបត្ថម្ភ រួមជាមួយស្ត្រីមានផ្ទៃពោះ និងបំបៅដោះកូនចំនួន ៥៥.០០០នាក់។

ពួកគេបាននិយាយបន្ថែមថា ៦៧% នៃស្ត្រីមានផ្ទៃពោះបច្ចុប្បន្ននេះមានភាពស្លេកស្លាំងខ្លាំង ដែលជាអត្រាគួរឱ្យព្រួយបារម្ភបំផុតដែលត្រូវបានកត់ត្រាក្នុងរយៈពេលជាច្រើនឆ្នាំកន្លងមកនេះ។

ក្រសួងបានព្រមានពីផលវិបាកមហន្តរាយ ប្រសិនបើអាហារសង្គ្រោះបន្ទាន់ និងការផ្គត់ផ្គង់ឱសថពេទ្យមិនត្រូវបានចែកចាយភ្លាមៗ ដោយបានលើកឡើងពីការកើនឡើងយ៉ាងឆាប់រហ័សនៃករណីស្លាប់ទាក់ទងនឹងការអត់ឃ្លាន។

អ៊ីស្រាអែលបានសម្លាប់ជនជាតិប៉ាឡេស្ទីនជាង ៦៣.៥០០នាក់នៅតំបន់ហ្គាហ្សាចាប់តាំងពីខែតុលា ឆ្នាំ២០២៣ មក។ យុទ្ធនាការយោធាបានបំផ្លិចបំផ្លាញតំបន់ជុំវិញដែលកំពុងប្រឈមនឹងគ្រោះទុរ្ភិក្ស។

កាលពីខែវិច្ឆិកាឆ្នាំមុន តុលាការឧក្រិដ្ឋកម្មអន្តរជាតិបានចេញដីកាចាប់ខ្លួននាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ(Benjamin Netanyahu) និងអតីតរដ្ឋមន្ត្រីការពារជាតិ លោក យ៉ូវ ហ្កាល់លែនត៍ (Yoav Gallant) ពីបទឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិនៅក្នុងតំបន់ហ្គាហ្សា។

អ៊ីស្រាអែល​ក៏​ប្រឈមមុខ​នឹង​សំណុំរឿង​ប្រល័យពូជសាសន៍​នៅ​តុលាការ​យុត្តិធម៌​អន្តរជាតិ​សម្រាប់​សង្រ្គាម​នៅ​ក្នុង​តំបន់​ព័ទ្ធជុំវិញផងដែរ៕

ដោយ៖ យា ចិន្ដាខន្ដី (ប្រភព៖ AA-AKP)