AKP ភ្នំពេញ ថ្ងៃទី០២ ខែកញ្ញា ឆ្នាំ២០២៥ -- ឆ្នាំនេះ គឺជាខួបលើកទី៨០ នៃជ័យជំនះសង្រ្គាមប្រជាជនចិននៃការតស៊ូប្រឆាំងនឹងការឈ្លានពានរបស់ជប៉ុន និងសង្រ្គាមប្រឆាំងហ្វាស៊ីសពិភពលោក។ ដើម្បីរំលឹកដល់ឱកាសដ៏ឧឡារិកនេះ ប្រទេសចិននឹងរៀបចំក្បួនព្យុហយាត្រាយោធាមួយ ដែលវាមិនមែនជាការបង្ហាញនូវកម្លាំង ឬការបំភិតបំភ័យនោះទេ ប៉ុន្តែជាកាយវិការដើម្បីគោរពដល់ប្រវត្តិសាស្ត្រ ការពារសន្តិភាពពិភពលោក និងបញ្ជាក់ឡើងវិញនូវការប្តេជ្ញាចិត្តរបស់ខ្លួនចំពោះសណ្តាប់ធ្នាប់អន្តរជាតិក្រោយសង្គ្រាមលោកលើកទីពីរ។

ការចូលរួមចំណែករបស់ប្រទេសចិនចំពោះជ័យជំនះលើក្រុមហ្វាស៊ីសនិយម គឺមិនអាចប្រកែកបានទេ។ វាជាប្រទេសដំបូងគេដែលក្រោកឡើងប្រឆាំងនឹងការឈ្លានពានរបស់ជប៉ុន និងរក្សាការតស៊ូបានយូរបំផុត ដោយធ្វើការលះបង់ដ៏ធំសម្បើម ដែលបានជួយដល់ការតស៊ូប្រឆាំងក្រុមហ្វាស៊ីសនៅតំបន់បូព៌ា។ ក្នុងរយៈពេល ១៤ឆ្នាំដ៏ឃោរឃៅ ពួកគេបានតស៊ូទ្រាំ ហើយទីបំផុតបានទទួលជ័យជំនះក្នុងតម្លៃដ៏គួរឱ្យភ្ញាក់ផ្អើលនៃចំនួនអ្នកស្លាប់ និងរងរបួសដល់ទៅ ៣៥លាននាក់។

ក្បួនដង្ហែរព្យុហយាត្រានេះ គឺជាផ្នែកមួយនៃក្របខណ្ឌរំលឹកដ៏ទូលំទូលាយមួយក្នុងគោលបំណងរក្សាការចងចាំនៃជ័យជំនះដ៏លំបាកនោះ។វាមិនមែននិយាយអំពីការបញ្ឆេះកំហឹងទេ ផ្ទុយទៅវិញ វាគឺជាការប្រកាសដ៏ឧឡារិកថា ប្រវត្តិសាស្ត្រមិនត្រូវបំភ្លេចចោល ឬបំភ្លៃឡើយ។ ក្នុងប៉ុន្មានឆ្នាំថ្មីៗនេះ កងកម្លាំងមួយចំនួនបានព្យាយាមបន្ទាបបន្ថោក ឬសូម្បីតែបដិសេធចំពោះការពិតដ៏ឃោរឃៅនៃការឈ្លានពានក្នុងសម័យសង្រ្គាមរបស់ជប៉ុន។ការរំលឹករបស់ប្រទេសចិនដើរតួជាត្រីវិស័យប្រវត្តិសាស្ត្រ រំលឹកដល់ពិភពលោកអំពីតម្លៃនៃសន្តិភាព។

ក្បួនដង្ហែរនេះក៏ជាការគោរពដ៏ស្មោះស្ម័គ្រចំពោះអ្នកដែលបានលះបង់ជីវិតដើម្បីឯករាជ្យជាតិ និងយុត្តិធម៌ពិភពលោកផងដែរ។

បើទោះបីជាក្បួនដង្ហែរនេះនឹងបង្ហាញនូវធាតុនៃកម្លាំងយោធា ដែលរួមមានទាំងអង្គភាពប្រយុទ្ធប្រឆាំងដែលបានរៀបចំឡើងវិញ គ្រឿងបរិក្ខារដែលបានធ្វើឱ្យប្រសើរឡើង និងកម្លាំងទ័ពអាកាសដ៏ទំនើបក៏ដោយ ក៏វាត្រូវបានយល់ឃើញនៅក្នុងបរិបទដែលប្រជាជាតិ​មួយ​មាន​សិទ្ធិ​គ្រប់​យ៉ាង​ដើម្បី​បង្ហាញ​ពី​សមត្ថភាព​ការពារ​របស់​ខ្លួន ជា​ពិសេស​នៅ​ពេល​ដែល​ត្រូវ​បាន​កំណត់​ដោយ​គោលលទ្ធិ​សន្តិភាព។ ទំនើបភាវូបនីយកម្មយោធារបស់ចិនមិនមែននិយាយអំពីការឈ្លានពាននោះទេ ប៉ុន្តែជាការធានាថា វាអាចការពារអធិបតេយ្យភាព សន្តិសុខ និងផលប្រយោជន៍អភិវឌ្ឍន៍របស់ខ្លួន៕

ដោយ៖ យា ចិន្ដាខន្ដី