AKP ក្វាងស៊ី ថ្ងៃទី០២ ខែកញ្ញា ឆ្នាំ២០២៥ -- តំបន់សហប្រតិបត្តិការទេសចរណ៍ឆ្លងព្រំដែនទឹកធ្លាក់ឌើទៀន-បានស៊ក ចិន-វៀតណាម ត្រូវបានបង្កើតឡើងដោយតំបន់ស្វយ័តក្វាងស៊ី ហ្ស័ង នៃប្រទេសចិន និងខេត្តកៅបាងនៃប្រទេសវៀតណាម បន្ទាប់ពីការចុះហត្ថលេខាលើកិច្ចព្រមព្រៀងរវាងរដ្ឋាភិបាលនៃសាធារណៈរដ្ឋប្រជាមានិតចិន និងរដ្ឋាភិបាលនៃសាធារណៈរដ្ឋសង្គមនិយមវៀតណាម ស្តីពីកិច្ចសហប្រតិបត្តិការក្នុងវិស័យការពារ និងអភិវឌ្ឍន៍ធនធានទេសចរណ៍នៃទឹកធ្លាក់ឌើទៀន-បានស៊ក នៅក្នុងឆ្នាំ២០១៥ ដោយវាក្លាយជាតំបន់សហប្រតិបត្តិការទេសចរណ៍ឆ្លងព្រំដែនដំបូងគេនៅក្នុងប្រទេសចិន។ នៅក្នុងតំបន់នេះ អ្នកទស្សនាអាចរីករាយជាមួយបទពិសោធន៍ពិសេសនៃ «សំបុត្រមួយប្រទេសពីរ» បន្ទាប់ពីបញ្ចប់នីតិវិធីចូល និងចេញចាំបាច់មួយចំនួន។

កាលពីថ្ងៃទី១៤ ខែតុលា ឆ្នាំ២០២៤ សេចក្តីថ្លែងការណ៍រួមរវាងសាធារណៈរដ្ឋប្រជាមានិតចិន និងសាធារណៈរដ្ឋសង្គមនិយមវៀតណាមភាគីទាំងពីរបានប្រកាសប្រតិបត្តិការជាផ្លូវការនៃតំបន់សហប្រតិបត្តិការទេសចរណ៍ឆ្លងព្រំដែនទឹកធ្លាក់ឌើទៀន-បានស៊ក ដោយលើកទឹកចិត្តភ្ញៀវទេសចរនៃប្រទេសទាំងពីរទៅទស្សនាគោលដៅរបស់គ្នាទៅវិញទៅមកនិងជំរុញការស្តារឡើងវិញឱ្យបានយ៉ាងឆាប់រហ័ស និងកិច្ចសហប្រតិបត្តិការដឹកជញ្ជូនតាមផ្លូវអាកាស។

ទឹកធ្លាក់ឌើទៀន-បានស៊ក មានទីតាំងនៅផ្នែកខាងលើនៃទន្លេGuichun ជាប់ព្រំដែនចិន និងវៀតណាម និងជាទឹកធ្លាក់ឆ្លងជាតិដ៏ធំបំផុតនៅអាស៊ី និងធំជាងគេលំដាប់ទីបួនក្នុងពិភពលោក។ ទឹកជ្រោះនេះត្រូវបានតភ្ជាប់ជាមួយទឹកធ្លាក់បានស៊ក ដែលនៅជាប់គ្នាក្នុងប្រទេសវៀតណាម ដោយបង្កើតបានជាទេសភាពឆ្លងប្រទេសតែមួយគត់។ ទឹកធ្លាក់នេះមានកម្ពស់ប្រហែល ៧០ម៉ែត្រ និងទទឹងប្រហែល ២០០ម៉ែត្រ។ ទឹកធ្លាក់នេះបាន​ហូរ​ចុះ​មក​ពី​ទី​ខ្ពស់​​ជា​ស្រទាប់​ៗ និងមានកន្លែងទេសភាពមួយចំនួនទៀត ដូចជាតំបន់បង្គោលព្រំដែនចិន-វៀតណាមលេខ៨៣៦ និងតំបន់ទេសចរណ៍ទន្លេGuichun ដែលនៅក្បែរនោះ។

ភ្ញៀវទេសចរណ៍អាចជិះទូកកម្សាន្តដើម្បីរីករាយនឹងទេសភាពដ៏ស្រស់ស្អាតនៅសងខាងទន្លេ Guichun និងមានអារម្មណ៍ថាមានទំនៀមទម្លាប់ពិសេសនៅតាមព្រំដែនរវាងចិន និងវៀតណាម។ ពួកគេក៏អាចទស្សនាភូមិហ្ស័ង និងភូមិយ៉ៅ ដើម្បីស្វែងយល់អំពីវប្បធម៌ ទំនៀមទម្លាប់ និងទម្លាប់នៃការធ្វើចំណាកស្រុករបស់ជនជាតិដើមភាគតិចក្នុងតំបន់នោះផងដែរ៕

ដោយ៖ យា ចិន្ដាខន្ដី