AKP ភ្នំពេញ ថ្ងៃទី០១ ខែកញ្ញា ឆ្នាំ២០២៥ -- គណៈរដ្ឋមន្ត្រីរបស់ប្រទេសថៃបានតែងតាំងឧបនាយករដ្ឋមន្រ្តី លោក ភុមថាំ វេឆាយ៉ាឆៃ (Phumtham Wechayachai) ជានាយករដ្ឋមន្ត្រីស្តីទីបន្ទាប់ពីលោកស្រី ផែថុងថាន ស៊ីណាវ៉ាត្រា (Paetongtarn Shinawatra) ត្រូវបានបណ្តេញចេញពីតំណែងដោយសេចក្តីសម្រេចរបស់តុលាការធម្មនុញ្ញថៃ។

លោក ជូសាក់ ស៊ីរីនីល (Chusak Sirinil) រដ្ឋមន្ត្រី​នៃ​ទីស្តីការ​នាយក​រដ្ឋមន្ត្រីថៃ​បាន​ប្រកាស​ពី​សេចក្តី​សម្រេច​នេះ​កាលពី​ថ្ងៃ​ទី៣០ ខែ​សីហាឆ្នាំ២០២៥ បន្ទាប់​ពី​កិច្ច​ប្រជុំ​គណៈរដ្ឋមន្ត្រី​ពិសេសមួយ ដែល​លោក​បណ្ឌិតព្រហ្មមីន លើតស៊ូរីដេច (Prommin Lertsuridej) ត្រូវ​បាន​តែង​តាំង​ជា​អគ្គលេខាធិការ​នាយក​រដ្ឋមន្ត្រី។

លោក ជូសាក់ បាននិយាយថា គណៈរដ្ឋមន្រ្តីក៏បានអនុម័តទៅលើក្របខណ្ឌដ៏តឹងរឹងមួយសម្រាប់សកម្មភាពក្នុងអំឡុងពេលអន្តរកាលនាពេលបច្ចុប្បន្ននេះផងដែរ ដើម្បីធានាបាននូវស្ថិរភាពដោយមិនលើសពីដែនកំណត់នៃអាណត្តិរបស់ខ្លួន។

ក្រោមបទប្បញ្ញត្តិនេះ បន្ទាប់ពីតុលាការធម្មនុញ្ញបានបណ្តេញលោកស្រី ផែថុងថាន ស៊ីណាវ៉ត្រា ចេញពីតំណែង គណៈរដ្ឋមន្ត្រីថៃបន្តគ្រប់គ្រងក្នុងសមត្ថភាពស្តីទីរហូតដល់រដ្ឋបាលថ្មីចូលកាន់តំណែង។

កាលពីថ្ងៃទី២៩ ខែសីហា ឆ្នាំ២០២៥ តុលាការធម្មនុញ្ញថៃបានបណ្តេញនាយករដ្ឋមន្ត្រីថៃ លោកស្រី ផែថុងថាន ស៊ីណាវ៉ាត្រា ចេញពីតំណែងពីបទរំលោភក្រមសីលធម៌។

ករណី​នេះ​កើត​ចេញ​ពី​ការ​ចោទ​ប្រកាន់​ពី​បទ​រំលោភ​ក្រមសីលធម៌​យ៉ាង​ធ្ងន់ធ្ងរ បន្ទាប់​ពី​ការបែកធ្លាយការ​សន្ទនា​តាម​ទូរស័ព្ទ​រវាង​លោកស្រី ផែថុងថាន និង​ប្រធាន​ព្រឹទ្ធសភា​កម្ពុជា សម្តេចអគ្គសេនាបតីតេជោ ហ៊ុន សែន។

តុលាការបានដកស្រង់សម្តីរបស់លោកស្រី ផែថុងថានដែលបាននិយាយទៅកាន់សម្តេចតេជោ ហ៊ុន សែន អំពីមេបញ្ជាការភូមិភាគទី២ គឺលោកឧត្តមសេនីយ៍ ប៊ូនស៊ីន ផាតក្លាង (Boonsin Padklang) ដែលជាការបង្ហាញពីភាពទន់ខ្សោយនៃនយោបាយផ្ទៃក្នុងរបស់ប្រទេសថៃ៕

ដោយ៖ យា ចិន្ដាខន្ដី (ប្រភព៖ VNA)