AKP ភ្នំពេញ ថ្ងៃទី២៧ ខែសីហា ឆ្នាំ២០២៥ -- នាយករដ្ឋមន្ត្រីប៉ូឡូញលោក ដូណាល់ ទូក (Donald Tusk) បានជួបពិភាក្សាជាមួយនាយករដ្ឋមន្ត្រីកាណាដា លោក ម៉ាក ខានេយ (Mark Carney) កាលពីថ្ងៃចន្ទ អំពីកិច្ចសហប្រតិបត្តិការក្នុងវិស័យយុទ្ធសាស្ត្រ សេដ្ឋកិច្ច និងសន្តិសុខ។

លោក ទូក បាននិយាយថា ប្រទេសប៉ូឡូញត្រូវការ «ដៃគូដែលអាចទុកចិត្តបានត្រៀមខ្លួនជាស្រេចសម្រាប់កិច្ចសហប្រតិបត្តិការជិតស្និទ្ធ»នៅក្នុងវិស័យនុយក្លេអ៊ែរ និងថាមពលកកើតឡើងវិញដែលជាបទពិសោធន៍របស់ប្រទេសកាណាដា។

លោក​បាន​បន្ថែម​ថា ទំនាក់ទំនង​រវាង​ប្រទេស​ទាំង​ពីរ​គឺ​ជិត​ស្និទ្ធ​រួច​ហើយ​ដោយ​សារ​ផលប្រយោជន៍​រួម​របស់​ពួកគេ។ លោកបានបន្ដ​​ថា ភាគី​ទាំង​ពីរ​បាន​បញ្ជាក់​ជា​ថ្មី​ក្នុង​ការ​បន្ត​គាំទ្រ​អ៊ុយក្រែន។

យោងតាមសេចក្តីថ្លែងការណ៍ដែលបានចេញផ្សាយ បន្ទាប់ពីកិច្ចប្រជុំនោះ ប្រទេសប៉ូឡូញ និងកាណាដានឹងចាប់ផ្តើមការពិគ្រោះយោបល់ទ្វេភាគីប្រចាំឆ្នាំ ដើម្បីអនុវត្តន៍ភាពជាដៃគូយុទ្ធសាស្ត្រដែលប្រសើរឡើងរបស់ពួកគេ៕

ដោយ៖ មូល មិនា (ប្រភព៖ ស៊ីនហួ)