AKP ភ្នំពេញ ថ្ងៃទី២៧ ខែសីហា ឆ្នាំ២០២៥ -- យោងតាមទូរទស្សន៍រដ្ឋរបស់ប្រទេសអេហ្ស៊ីបបានរាយការណ៍ថា ប្រទេសអេហ្ស៊ីបកាលពីថ្ងៃអង្គារបានបញ្ជូនក្បួនរថយន្តជំនួយមនុស្សធម៌ចំនួន ២០០គ្រឿងដែលដឹកសម្ភារៈសង្គ្រោះចំនួន ២.៧០០តោនដែលឆ្លងកាត់ទីក្រុងរ៉ាហ្វាហ៍នៃប្រទេសអេហ្ស៊ីបឆ្ពោះទៅកាន់ច្រកកេរឹម សាឡុម (Kerem Shalom) ។

យោងតាមរបាយការណ៍បានឱ្យដឹងថា ជំនួយនេះ រួមទាំងការផ្គត់ផ្គង់ស្បៀងអាហារដែលផ្តល់ដោយកម្មវិធីស្បៀងអាហារពិភពលោក រួមជាមួយនឹងប្រេងឥន្ធនៈ ថ្នាំពេទ្យ និងការផ្គត់ផ្គង់ផ្នែកវេជ្ជសាស្រ្តផ្សេងទៀតនឹងរង់ចាំការត្រួតពិនិត្យដោយអាជ្ញាធរអ៊ីស្រាអែល មុនពេលបញ្ជូនចូលទៅក្នុងតំបន់ហ្គាហ្សាស្ទ្រីប។

នេះគឺជាក្បួនលើកទី២៣ ដែលត្រូវបានបញ្ជូនក្រោមគំនិតផ្តួចផ្តើមមួយដែលបានចាប់ផ្តើមនៅថ្ងៃទី២៧ ខែកក្កដា និងដំណើរការដោយសមាគមអឌ្ឍចន្ទក្រហមអេហ្ស៊ីប។ ដំណាក់កាលសន្តិសុខស្បៀងរួមបញ្ចូលគ្នាដែលគាំទ្រដោយអង្គការសហប្រជាជាតិបានបញ្ជាក់ពីភាពអត់ឃ្លាននៅក្នុងផ្នែកខ្លះនៃតំបន់ហ្គាហ្សា ដោយបង្ហាញពីភាពអត់ឃ្លានខ្លាំង និងកង្វះខាតចាំបាច់សំខាន់ៗ រួមទាំងអាហារ ថ្នាំពេទ្យ និងប្រេងឥន្ធនៈ។

យោងតាមក្រសួងការបរទេសអេហ្ស៊ីបកាលពីសប្តាហ៍មុនបានឱ្យដឹងថា ប្រទេសអេហ្ស៊ីបបានផ្តល់ជំនួយជាង ៧០% នៃជំនួយសរុបដែលផ្តល់ដល់តំបន់ហ្គាហ្សា ចាប់តាំងពីជម្លោះរវាងក្រុមហាម៉ាស់ និងអ៊ីស្រាអែលបានចាប់ផ្តើមនៅក្នុងខែតុលា ឆ្នាំ២០២៣ ជាមួយនឹងការផ្គត់ផ្គង់ជំនួយជាង៥៥០.០០០តោនត្រូវបានដឹកជញ្ជូនដោយឡានដឹកទំនិញរាប់ពាន់គ្រឿងខណៈដែលរថយន្តដឹកទំនិញប្រហែល ៥.០០០គ្រឿងនៅតែរង់ចាំនៅខាងប្រទេសអេហ្ស៊ីបនៃច្រកឆ្លងកាត់ទីក្រុងរ៉ាហ្វាហ៍។

អាជ្ញាធរសុខាភិបាលតំបន់ហ្គាហ្សាបាននិយាយកាលពីថ្ងៃអង្គារថាក្នុងរយៈពេល ២២ខែកន្លងមកនេះ យុទ្ធនាការយោធារបស់អ៊ីស្រាអែលនៅតំបន់ហ្គាហ្សាបានសម្លាប់ជនជាតិប៉ាឡេស្ទីនចំនួន ៦២.៨១៩នាក់ និងរបួស១៥៨.៦២៩នាក់ផ្សេងទៀត ហើយបានបំផ្លិចបំផ្លាញយ៉ាងច្រើនដល់ហេដ្ឋារចនាសម្ព័ន្ធ និងស្ថានភាពមនុស្សធម៌កាន់តែអាក្រក់ទៅៗ។

ក្នុងរយៈពេល ២៤ម៉ោងកន្លងមកនេះ មន្ទីរពេទ្យតំបន់ហ្គាហ្សាបានទទួលសាកសពចំនួន ៧៥នាក់ និងមនុស្សចំនួន ៣៧០នាក់រងរបួស។ អាជ្ញាធរសុខាភិបាលបានបន្ថែមថា «ជនរងគ្រោះជាច្រើននៅតែជាប់នៅក្រោមគំនរបាក់បែក និងនៅតាមដងផ្លូវ ដោយក្រុមសង្គ្រោះបន្ទាន់ និងកងការពារស៊ីវិលមិនអាចធ្វើដំណើរទៅដល់បានទេ»៕

ដោយ៖ មូល មិនា (ប្រភព៖ ភីបផលដេលី)