AKP ភ្នំពេញ ថ្ងៃទី២៧ ខែសីហា ឆ្នាំ២០២៥ -- រដ្ឋមន្ត្រីការបរទេសចិនលោក វ៉ាង យី (Wang Yi) បានជួបជាមួយ លោក ផាក យ៊ុងស៊ូហ្គ (Park Byeong-seug) បេសកជនពិសេសរបស់ប្រធានាធិបតីកូរ៉េខាងត្បូង លោកលី ជេយ៉ុង (Lee Jae-myung) នៅទីក្រុងប៉េកាំង។

លោក វ៉ាង ជាសមាជិកការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិន បានកត់សម្គាល់ថា បន្ទាប់ពីសម្ពោធរដ្ឋាភិបាលកូរ៉េខាងត្បូងថ្មី លោក ស៊ី ជីនពីង (Xi Jinping) បានសន្ទនាតាមទូរស័ព្ទជាមួយប្រធានាធិបតីកូរ៉េខាងត្បូង លោក លី ជេយ៉ុង ក្នុងអំឡុងពេលដែលពួកគេបានឈានដល់ការឯកភាពសំខាន់លើការលើកកម្ពស់ភាពជាដៃគូសហប្រតិបត្តិការយុទ្ធសាស្ត្រចិន-កូរ៉េខាងត្បូង ឱ្យកាន់តែខ្ពស់ឡើង ហើយចង្អុលបង្ហាញទិសដៅសម្រាប់ការអភិវឌ្ឍនៃជំហានបន្ទាប់។

លោក វ៉ាង បានកត់សម្គាល់ថា ប្រទេសចិនរក្សាស្ថិរភាព និងបន្តនៅក្នុងគោលនយោបាយរបស់ខ្លួនជាមួយប្រទេសកូរ៉េខាងត្បូង ដោយលោកបានជំរុញឱ្យភាគីទាំងពីរប្រកាន់ខ្ជាប់នូវការបង្កើតទំនាក់ទំនងការទូត ប្រកាន់ខ្ជាប់នូវទិសដៅនៃមិត្តភាព ពង្រីកផលប្រយោជន៍រួម ជំរុញសុច្ឆន្ទៈកាន់តែច្រើនដោះស្រាយបញ្ហា និងជំរុញការអភិវឌ្ឍប្រកបដោយស្ថិរភាព និងយូរអង្វែងនៃទំនាក់ទំនងទ្វេភាគី។

លោក វ៉ាង បាននិយាយថា ឆ្នាំនេះ គឺជាខួបលើកទី៨០ នៃជ័យជំនះក្នុងសង្គ្រាមប្រជាជនចិនប្រឆាំងនឹងការឈ្លានពានរបស់ប្រទេសជប៉ុន និងសង្រ្គាមប្រឆាំងហ្វាស៊ីសពិភពលោក ក៏ដូចជាខួបលើកទី៨០ នៃការរំដោះឧបទ្វីបកូរ៉េ ដោយលោកបានបន្ថែមថា ប្រទេសចិនមានឆន្ទៈក្នុងការធ្វើការជាមួយប្រទេស និងប្រជាជនដែលស្រឡាញ់សន្តិភាពទាំងអស់ ដើម្បីរួមគ្នាការពារលទ្ធផលនៃជ័យជំនះនៃសង្គ្រាមលោកលើកទី២ និងយុត្តិធម៌អន្តរជាតិ។

លោក ផាក យ៊ុងស៊ូហ្គ បានស្នើឱ្យលោក វ៉ាង បញ្ជូនលិខិតរបស់ប្រធានាធិបតីកូរ៉េខាងត្បូង លោក លី ជេយ៉ុង ទៅកាន់ប្រធានាធិបតីចិន លោក ស៊ី ជីនពីង ។

លោកបានមានប្រសាសន៍ថា រដ្ឋាភិបាលកូរ៉េខាងត្បូងថ្មីបានយកចិត្តទុកដាក់យ៉ាងខ្លាំងចំពោះការអភិវឌ្ឍទំនាក់ទំនងជាមួយប្រទេសចិន ហើយមានឆន្ទៈក្នុងការធ្វើការរួមគ្នាជាមួយប្រទេសចិន ដើម្បីអនុវត្តន៍ការឯកភាពដែលប្រមុខរដ្ឋទាំងពីរសម្រេចបាន បង្កើនការផ្លាស់ប្តូរកម្រិតកំពូល ពង្រីកកិច្ចសហប្រតិបត្តិការជាក់ស្តែងសម្រាប់ពេលអនាគត បង្កើនការផ្លាស់ប្ដូរប្រជាជន និងប្រជាជន និងវប្បធម៌ក្នុងវិស័យអប់រំ យុវជន និងវិស័យផ្សេងៗទៀត ព្រមទាំងនាំមកនូវភាពជាដៃគូសហប្រតិបត្តិការយុទ្ធសាស្ត្ររវាងប្រទេសកូរ៉េខាងត្បូង និងចិនឡើងវិញ។

​​លោក​បាន​បន្ថែមថា ប្រទេសកូរ៉េខាងត្បូង​តែងតែ​គោរព​គោលការណ៍​ចិន​តែមួយ ហើយ​មាន​ឆន្ទៈ​ក្នុង​ការ​អភិវឌ្ឍ​ទំនាក់ទំនង​ជាមួយប្រទេស​ចិន និង​ប្រទេស​ធំៗ​ផ្សេងទៀត​ស្រប​គ្នា​ដើម្បី​រួមគ្នា​រក្សា​សន្តិភាព ស្ថិរភាពការអភិវឌ្ឍន៍ និង​វិបុលភាព​ក្នុង​តំបន់៕

ដោយ៖ មូល មិនា (ប្រភព៖ ភីបផលដេលី)