AKP ភ្នំពេញ ថ្ងៃទី២៦ ខែសីហា ឆ្នាំ២០២៥ -- យោងតាមសេចក្តីថ្លែងការណ៍របស់ប្រធានាធិបតីអ៊ីរ៉ង់ បានឱ្យដឹងថា លោក ម៉ាសូដ ប៉េហ្សេសគីអាន (Masoud Pezeshkian) កាលពីថ្ងៃចន្ទបានអះអាងសារជាថ្មីពីការប្រឆាំងរបស់ប្រទេសអ៊ីរ៉ង់ចំពោះអាវុធនុយក្លេអ៊ែរក្នុងអំឡុងពេលសន្ទនាតាមទូរស័ព្ទជាមួយប្រធានាធិបតីរុស្ស៊ី លោក វ្លាឌីមៀ ពូទីន (Vladimir Putin) ។

លោក ប៉េហ្សេសគីអាន បានសន្យាថានឹងមើលការខុសត្រូវផ្ទាល់លើការបង្កើនល្បឿននៃការសាងសង់ផ្លូវដែក Rasht-Astara ជាតំណភ្ជាប់ដ៏សំខាន់នៅក្នុងច្រករបៀងដឹកជញ្ជូនអន្តរជាតិខាងជើង-ខាងត្បូងដែលតភ្ជាប់ឈូងសមុទ្រពែកជាមួយប្រទេសរុស្ស៊ី និងអាស៊ីកណ្តាល រួមជាមួយនឹងគម្រោងទ្វេភាគីផ្សេងទៀត។

លោក ប៉េហ្សេសគីអាន ក៏បានគូសបញ្ជាក់អំពីតួនាទីនៃវេទិកាពហុភាគីដូចជា សហភាពសេដ្ឋកិច្ចអឺរ៉ាស៊ី អង្គការសហប្រតិបត្តិការសៀងហៃ និងក្រុមប្រ៊ីកស៍ (BRICS) ក្នុងការបង្កើនកិច្ចសហប្រតិបត្តិការក្នុងចំណោមរដ្ឋជាសមាជិក ដើម្បីប្រឆាំងនឹងឯកតោភាគីនិយម។

ចំណែកឯលោក ពូទីន បានរៀបរាប់សង្ខេបប្រាប់លោក ប៉េហ្សេសគីអាន អំពីចំណុចសំខាន់ៗ និងលទ្ធផលនៃកិច្ចពិភាក្សានាពេលថ្មីៗនេះជាមួយប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) នៅរដ្ឋអាឡាស្កា ដោយលោកបាននិយាយថា ការពិភាក្សាបានបង្កើតលទ្ធផលវិជ្ជមានដែលអាចរួមចំណែកដល់ការដោះស្រាយជម្លោះនៅអ៊ុយក្រែន។

លោកបាននិយាយអំពីទំនាក់ទំនងរវាងទីក្រុងម៉ូស្គូ និងទីក្រុងតេអេរ៉ង់ថាជាការស្ថាបនា និងរីកចម្រើនជាលំដាប់ ដោយលោកបានលើកឡើងពីការកើនឡើងនៃសេដ្ឋកិច្ច ១១% នៅក្នុងពាណិជ្ជកម្មទ្វេភាគីនៅក្នុងឆមាសទីមួយនៃឆ្នាំនេះ។ លោក ពូទីន ក៏បានកត់សម្គាល់ពីវឌ្ឍនភាពលើគម្រោងរួមគ្នា រួមទាំងផ្លូវដែក Rasht-Astara និងកិច្ចសហប្រតិបត្តិការនៅរោងចក្រថាមពលនុយក្លេអ៊ែរ Bushehr ជាមួយនឹងការផ្ទេរឥន្ធនៈថ្មីសម្រាប់កន្លែងដែលកំពុងដំណើរការរួចហើយ។

លោក ពូទីន បានរំលឹកឡើងវិញនូវការគាំទ្រយ៉ាងម៉ឺងម៉ាត់របស់ប្រទេសរុស្ស៊ីចំពោះសិទ្ធិរបស់ប្រទេសអ៊ីរ៉ង់ក្នុងការចម្រាញ់សារធាតុអ៊ុយរ៉ាញ៉ូម ដោយហៅវាថាជាសារធាតុសំខាន់នៃកិច្ចសហប្រតិបត្តិការទ្វេភាគី៕

ដោយ៖ មូល មិនា (ប្រភព៖ ភីបផលដេលី)