AKP ភ្នំពេញ ថ្ងៃទី២៥ ខែសីហា ឆ្នាំ២០២៥--ឯកឧត្តម ឡាំង អូណា ប្រធានសហព័ន្ធកីឡាឡើងភ្នំកម្ពុជាបានកោតសរសើរ និងវាយតម្លៃខ្ពស់ចំពោះការខិតខំរួមគ្នាជំរុញឱ្យការប្រកួតកីឡាឡើងភ្នំ ជ្រើសរើសជើងឯកថ្នាក់ជាតិប្រចាំឆ្នាំ២០២៥បានបញ្ចប់ដោយជោគជ័យ។

នេះជាការវាយតម្លៃរបស់ឯកឧត្តម ឡាំង អូណា ក្នុងឱកាសបិទការប្រកួតកីឡាឡើងភ្នំ ជើងឯកថ្នាក់ជាតិ ដែលបានបិទបញ្ចប់ កាលពីយប់ថ្ងៃទី២៤ ខែសីហា ឆ្នាំ២០២៥ នៅ Le Club រាជធានីភ្នំពេញ បន្ទាប់ពីបានដំណើរការប្រកួតយ៉ាងស្វិតស្វាញរយៈពេល៣ថ្ងៃ។ ពិធីបិទការប្រកួតនេះទទួលបានការអញ្ជើញផ្តល់កិត្តិយសពីឯកឧត្តម ប៊ូ ជុំសេរី អនុរដ្ឋលេខាធិការ ក្រសួងអប់រំ យុវជន និងកីឡា និងឯកឧត្តម តែម ម៉ឺន តំណាងឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា។

ប្រធានសហព័ន្ធបានកោតសរសើរចំពោះគណៈកម្មការរៀបចំការប្រកួត និងកីឡាករ កីឡាការិនីបានសហការគ្នាយ៉ាងល្អប្រសើរធ្វើឱ្យដំណើរការប្រកួតដំណើរការដោយរលូន ព្រមទំាងកាត់ក្តីដោយយុត្តិធម៌ ប្រកាន់ភ្ជាប់ក្រមសីលធម៌ជាអាជ្ញាកណ្តាល និងចៅក្រម ដើម្បីស្វែងរកធនធានឆ្នើមៗ ត្រៀមចូលរួមការប្រកួតកម្រិតអន្តរជាតិនានា នាពេលខាងមុខ។

ជាមួយគ្នានេះ ឯកឧត្តម ប៊ូ ជុំសេរី អនុរដ្ឋលេខាធិការ ក្រសួងអប់រំ យុវជន និងកីឡាក៏បានកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងរបស់ឯកឧត្តម ឡាំង អូណា និងសមាជិកប្រតិបត្តិទំាងអស់ ព្រមទាំងមន្ត្រីអាជ្ញាកណ្តាល ចៅក្រម គ្រូបង្វឹក កីឡាករ កីឡាការិនី ដែលប្រឹងប្រែងរួមចំណែកអភិឌ្ឍន៍ប្រភេទកីឡាអូឡាំពិកមួយនេះឱ្យមានការរីកចម្រើន។ អនុរដ្ឋលេខាធិការបន្ថែមថា ការប្រកួតនេះដើម្បីជ្រើសរើសកីឡាករ កីឡាការិនីឆ្នើមៗ ដើម្បីត្រៀមចូលរួមការប្រកួតកីឡាអន្តរជាតិ នាពេលខាងមុខ ជាពិសេសត្រៀមឆ្ពោះទៅទទួលរៀបចំធ្វើម្ចាស់ផ្ទះ ការប្រកួតកីឡាយុវជនអាស៊ី នាឆ្នាំ២០២៩ នៅកម្ពុជាផងដែរ។

បើតាមលោក ស៊ឹម រ៉ន បានជម្រាបជូនថា ការប្រកួតជើងឯកឆ្នាំនេះមានកីឡាករ-កីឡាការិនីចូលរួម ៦១ នាក់ ក្នុងនោះកីឡាការិនី ១៨នាក់មកពីក្លឹបកីឡាឡើងភ្នំចំនួន។ ឆ្លងកាត់ការប្រកួតរយៈពេល៣ថ្ងៃ គណៈកម្មការបច្ចេកទេសបានសម្រិតសម្រាំងបានម្ចាស់ជ័យលាភីលើ១៧វិញ្ញាសា ក្នុងនោះមានវិញ្ញាសាល្បឿនចែកជា៤វិញ្ញាសាតូចៗកម្រិតអាយុ១៣ឆ្នាំចុះ ដល់អាយុ២០ឆ្នាំឡើង, វិញ្ញាសា Top Rope and Lead មាន៦វិញ្ញាសាពីកម្រិតអាយុ១៣ឆ្នាំចុះ ដល់២០ឆ្នាំឡើង, វិញ្ញាសា Boulder មានវិញ្ញាសាកម្រិតអាយុ១៤ឆ្នាំចុះ ដល់វិញ្ញាសាកម្រិតបុរស-នារីអាយុ២០ឆ្នាំឡើង៕

ដោយ ហេង ណាលីន