AKP ភ្នំពេញ ថ្ងៃទី២២ ខែសីហា ឆ្នាំ២០២៥--ឯកឧត្តម កែ ប៊ុនខៀង រដ្ឋលេខាធិការ តំណាងដ៏ខ្ពង់ខ្ពស់ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡាបានលើកឡើងថា ការរៀបចំទិវាកីឡាអាស៊ាន គឺជាការបំផុសឱ្យប្រជាជនកម្ពុជា ក៏ដូចប្រជាជនក្នុងសហគមន៍អាស៊ានទាំងមូលចូលរួមលេងកីឡាគ្រប់ប្រភេទ ដើម្បីលើកកម្ពស់សុខភាពប្រជាជន រឹតចំណងមិត្តភាព សាមគ្គីភាព និងទំនាក់ទំនងគ្នា និងលើកកម្ពស់វិស័យកីឡារដ្ឋសមាជិកអាស៊ានផងដែរ។

នេះជាការលើកឡើងរបស់តំណាងរដ្ឋមន្ត្រី ក្នុងទិវាកីឡាអាស៊ានឆ្នាំ២០២៥ ក្រោមប្រធានបទ “កីឡាជាទូតសន្តិភាព”  ដែលរៀបចំឡើងនៅក្នុងបរិវេណពហុកីឡដ្ឋានជាតិអូឡាំពិក នៅព្រឹកថ្ងៃទី២២ ខែសីហា ឆ្នាំ២០២៥ ដោយមានការចូលរួមលេងកីឡាជាង ៥០០នាក់។

ឯកឧត្តម កែ ប៊ុនខៀង បានគូសបញ្ជាក់ថា ការរៀបចំទិវាកីឡាអាស៊ាននេះត្រូវបានប្រារព្ធធ្វើឡើង ក្នុងគោលបំណងដើម្បីឱ្យប្រជាជនយល់ដឹងអំពីអាស៊ាន លើកកម្ពស់របៀបរស់នៅរបស់ប្រជាជនអាស៊ាន ប្រកបដោយសុខភាពល្អ សុខដុមនីយកម្ម តាមបាវចនា “អាស៊ានចក្ខុវិស័យតែមួយ អត្តសញ្ញាណតែមួយ និងសហគមន៍តែមួយ (One Vision, One Identity, One Community) និងដើម្បីពង្រឹង លើកកម្ពស់វិស័យកីឡានៅក្នុងប្រទេសសមាជិកអាស៊ានទាំងមូល។ រាជភិបាលកម្ពុជាបានអនុញ្ញាតជាគោលការណ៍ជូនក្រសួងអប់រំ យុវជន និងកីឡាឱ្យរៀបចំទិវាកីឡាអាស៊ាន ASEAN SPORTS DAY ជារៀងរាល់ឆ្នាំ ចាប់ពីឆ្នាំ២០១៧ រហូតមក។

កីឡាបានដើរតួយ៉ាងសំខាន់ នៅក្នុងការផ្សារភ្ជាប់ទំនាក់ទំនង សង្គមវប្បធម៌ ទាំងនៅក្នុងតំបន់ និងនៅក្នុងពិភពលោក។ បច្ចុប្បន្ន ពិភពលោកបានទទួលស្គាល់ថាកីឡា គឺជាឧបករណ៍មួយដ៏សំខាន់ ក្នុងការទំនាក់ទំនងមិត្តភាព សាមគ្គីភាព ដោយមិនប្រកាន់និន្នាការនយោបាយ ជាតិ សាសនា ពណ៌សម្បុរ និងដើម្បីលើកកម្ពស់សុខភាព ប្រសិទ្ធិភាពការងារ និងការរស់នៅប្រកបដោយភាពសុខដុមនីយកម្ម។ នៅក្នុងសហគមន៍អាស៊ានមានការរៀបចំព្រឹត្តិការណ៍ការប្រកួតកីឡាអាស៊ីអាគ្នេយ៍ (ស៊ីហ្គេម) គឺជាព្រឹត្តិការណ៍ប្រកួតពហុកីឡា ដែលមានការចូលរួមពីបណ្ដាប្រទេសនៅក្នុងតំបន់អាស៊ីអាគ្នេយ៍ចំនួន១១។ ជាមួយគ្នានេះ រាជរដ្ឋាភិបាលបានអនុញ្ញាតជាគោលការណ៍រៀបចំព្រឹត្តិការណ៍នៃការប្រកួតកីឡាយុវជនអាស៊ីអាគ្នេយ៍ នៅឆ្នាំ២០២៦ និងការប្រកួតកីឡាយុវជនអាស៊ីនៅឆ្នាំ២០២៩។ 

ជាមួយគ្នានេះ លោក ប៉ែន វុទ្ធី ប្រធាននាយកដ្ឋានកីឡាជំនាញ និងកីឡាមហាជនបានជម្រាបជូនថា ទិវាកីឡាអាស៊ាន “ASEAN Sports Day” ឆ្នាំ២០២៥នេះបានរៀបចំប្រភេទកីឡាដូចជា ហាត់ប្រាណតាមចង្វាក់ភ្លេង បុរស-នារី កីឡាបាល់ទះ បុរស-នារី កីឡាបាល់បោះ បុរស-នារី និងការហាត់ប្រាណជាមួយឧបករណ៍។ សមាសភាព ចូលរួម រួមមាន៖ មន្ត្រី កីឡាករ កីឡាការិនីមកពីសហព័ន្ធកីឡាជាតិ មហាជន គណៈកម្មការរៀបចំទិវាសមាសភាពថ្នាក់ដឹកនាំក្រសួង ថ្នាក់ដឹកនាំអគ្គនាយកកីឡា បុគ្គលិកអប់រំនៃនាយកដ្ឋានជំនាញ អង្គភាពពាក់ព័ន្ធ សហព័ន្ធកីឡាជាតិ សរុបចំនួន ៥៥០នាក់៕

ដោយ ហេង ណាលីន