AKP ភ្នំពេញ ថ្ងៃទី២១ ខែសីហា ឆ្នាំ២០២៥ -- ទីភ្នាក់ងារជំនួយ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីននៅមជ្ឈិមបូព៌ា (UNRWA) បាននិយាយកាលពីថ្ងៃទី២០ ខែសីហា ឆ្នាំ២០២៥ ថាទីភ្នាក់ងារនេះបានបាត់បង់បុគ្គលិករបស់ខ្លួនប្រមាណជិត ៣៦០នាក់នៅក្នុងតំបន់ហ្គាហ្សាដោយសារតែការឈ្លានពានរបស់អ៊ីស្រាអែល។

ស្នងការទីភ្នាក់ងារ UNRWA លោក ហ្វីលីព ឡាស់ហ្សារីនី (Philippe Lazzarini) បានសរសេរនៅលើបណ្តាញសង្គមអ៊ិច (X) ថា នៅពេលដែលយើងប្រារព្ធទិវាមនុស្សធម៌ពិភពលោកកាលពីថ្ងៃអង្គារ យើងបានឧទ្ទិសដល់បុគ្គលិកជួរមុខរបស់យើងនៅតំបន់ហ្គាហ្សា។

មន្ត្រីរូបនេះបានសរសេរនៅលើបណ្តាញសង្គមថា បុគ្គលិករបស់យើងជាច្រើននាក់បានស្លាប់នៅក្នុងការបម្រើការងារ ហើយរាប់រយនាក់បានរងរបួស និងជិត ៥០នាក់ត្រូវបានចាប់ខ្លួន ហើយពួកគេជាច្រើននាក់បានទទួលរងការធ្វើទារុណកម្មមុនពេលត្រូវបានដោះលែង។

យើងបានលះបង់ខ្ពស់ ហើយទោះ​ជា​យ៉ាង​ណាក៏ដោយ បុគ្គលិក​របស់​យើងមិន​ចុះ​ចាញ់​ឡើយ បើទោះ​បី​ជា​ពួកគេ​ជួប​ប្រទះ​នឹងស្ថានភាពដ៏លំបាកជា​ប្រចាំ​ថ្ងៃ​ក៏​ដោយ។

លោក ឡាស់ហ្សារីនី ក៏បានគោរពដល់ក្រុមការងារនៅក្នុងតំបន់ដែលកំពុងបន្តផ្តល់សេវាកម្មផងដែរ ជាពិសេសការអប់រំ និងការថែទាំសុខភាពបឋម ចំពេលដែលមានបញ្ហាប្រឈមដ៏ធំធេង។

ស្នងការរូបនោះបាននិយាយថា ខណៈដែលទីភ្នាក់ងារ UNRWA ប្រឈមមុខនឹងការគំរាមកំហែងដែលមានស្រាប់ ក្រុមការងាររបស់យើងសមនឹងទទួលបានការគាំទ្រ ការគោរព និងការកោតសរសើរ ដោយលោកស្នងការបាននិយាយដោយយោងទៅលើវិធានការដែលធ្វើឡើងដោយរដ្ឋាភិបាលអ៊ីស្រាអែលប្រឆាំងនឹងទីភ្នាក់ងារអង្គការសហប្រជាជាតិនោះ។

ពួកគេប្តេជ្ញាបន្តការងាររបស់ពួកគេរហូតដល់ដំណោះស្រាយត្រឹមត្រូវត្រូវបានរកឃើញចំពោះស្ថានភាពជនភៀសខ្លួនប៉ាឡេស្ទីន។

លោក​បាន​បន្ត​ថា វា​ជា​ការ​ចាំ​បាច់ណាស់​សម្រាប់​ជម្លោះ​ដែល​មាន​រយៈ​ពេល​រាប់​ទសវត្សរ៍​នេះ​ដើម្បី​បញ្ចប់​ដោយ​មធ្យោបាយ​ការទូត និង​សន្តិភាព៕

ដោយ៖ យា ចិន្ដាខន្ដី (ប្រភព៖ ប្រេនសាឡាទីណា)