AKP ភ្នំពេញ ថ្ងៃទី២១ ខែសីហា ឆ្នាំ២០២៥ -- ប្រធានាធិបតីតួកគី លោក រេសេប តាយយីប អឺដូហ្គែន (Recep Tayyip Erdogan) បាននិយាយកាលពីថ្ងៃពុធថា ផែនការរបស់រដ្ឋាភិបាលរបស់លោក ណេតាន់យ៉ាហ៊ូ ក្នុងការដាក់តំបន់ហ្គាហ្សាស្រ្ទីបទាំងមូលឱ្យស្ថិតនៅក្រោមការគ្រប់គ្រងរបស់យោធាអ៊ីស្រាអែល គឺមិនអាចទទួលយកបាននោះទេ។

ក្នុងអំឡុងពេលនៃកិច្ចសន្ទនាតាមទូរស័ព្ទជាមួយនាយករដ្ឋមន្ត្រីហូឡង់លោក ឌីក ស្គូហ្វ (Dick Schoof) មេដឹកនាំទាំងពីរបានពិភាក្សាគ្នាអំពីទំនាក់ទំនងតួកគី-ហូឡង់ ក៏ដូចជាបញ្ហាក្នុងតំបន់ និងសកលលោក។ នេះបើយោងតាមការចុះផ្សាយរបស់នាយកដ្ឋានទំនាក់ទំនងនៅលើវេទិកាប្រព័ន្ធផ្សព្វផ្សាយសង្គម NSosyal របស់តួកគី។

លោក អឺដូហ្គែន បាននិយាយក្នុងអំឡុងពេលនៃការអំពាវនាវនោះថា វាជាការរីករាយណាស់ដែលឃើញភាពជាដៃគូរវាងតួកគី និងហូឡង់កាន់តែរឹងមាំ ហើយពួកគេនឹងបន្តចាត់វិធានការដើម្បីបង្កើនកិច្ចសហប្រតិបត្តិការរវាងប្រទេសទាំងពីរ ជាពិសេសក្នុងវិស័យការពារជាតិ។

លោកក៏បាននិយាយផងដែរថា តួកគីកំពុងធ្វើការឆ្ពោះទៅរកសន្តិភាពដ៏យុត្តិធ៌ម និងយូរអង្វែង ដើម្បីបញ្ចប់សង្រ្គាមអ៊ុយក្រែន និងរុស្ស៊ី ហើយបន្ថែមថា តួកគីដែលជាម្ចាស់ផ្ទះនៃដំណើរការអ៊ីស្តង់ប៊ុលនឹងបន្តកិច្ចខិតខំប្រឹងប្រែងរបស់ខ្លួន៕
ដោយ៖ យា ចិន្ដាខន្ដី (ប្រភព៖ AA-AKP)