AKP ភ្នំពេញ ថ្ងៃទី២០ ខែសីហា ឆ្នាំ២០២៥ -- សហភាពទេសចរណ៍ប៊ុលហ្គារី (BTU) នឹងរៀបចំព្រឹត្តិការណ៍មួយសម្រាប់អ្នកស្រឡាញ់ការឡើងភ្នំរាប់រយនាក់ ដោយចាប់ផ្តើមពីមហោស្រពជាតិអ៊ីវ៉ាន់ វ៉ាហ្សូវ រហូតដល់ភ្នំឈើនី វីរ៉ាហ៍ ដើម្បីអបអរសាទរខួប ១៣០ឆ្នាំនៃការរៀបចំទេសចរណ៍នៅក្នុងប្រទេសប៊ុលហ្គារី។ សហភាព BTU បាននិយាយកាលពីថ្ងៃចន្ទថាព្រឹត្តិកាណ៍ឡើងភ្នំនេះត្រូវបានបំផុសគំនិតឡើងដោយផ្លូវដែលលោក អាឡេកូ កុនស្តេនទីណូវ (Aleko Konstantinov) បានធ្វើកាលពី ១៣០ឆ្នាំមុននៅពេលដែលលោកបានផ្តួចផ្តើមរៀបចំទេសចរណ៍នៅក្នុងប្រទេសប៊ុលហ្គារី។

ការប្រារព្ធខួបនេះនឹងប្រព្រឹត្តទៅចាប់ពីថ្ងៃទី២៧ ដល់ថ្ងៃទី៣១ខែសីហា ឆ្នាំ២០២៥ នៅទីក្រុងសូហ្វីយ៉ា និងនៅលើភ្នំវីតូស្សា ហើយនឹងរួមបញ្ចូលគ្នានូវពិធីរំលឹក ក្បួនដង្ហែ ការប្រកួតកីឡា និងការប្រគុំតន្ត្រី។ ពិធី​នេះ​នឹង​ចាប់​ផ្តើម​នៅ​ថ្ងៃ​ទី២៧ ខែ​សីហា ដោយ​មាន​ពិធី​ដាក់​កម្រង​ផ្កា​នៅវេលា​ម៉ោង ៥:៣០នាទីល្ងាចនៅ​កន្លែង​គោរព​វិញ្ញាណក្ខន្ធ​នៅ​មុខ​មហោស្រព​ជាតិអ៊ីវ៉ាន់ វ៉ាហ្សូវ។

នៅថ្ងៃទី៣០ ខែសីហា ឆ្នាំ២០២៥ ការប្រគុំតន្ត្រីដែលមានការចូលរួមពីDesi Dobreva និង Diana Express នឹងប្រព្រឹត្តទៅនៅពេលល្ងាចនៅមុខវិមានវប្បធម៌ជាតិ ហើយនៅថ្ងៃទី៣១ ខែសីហា ព្រឹត្តិការណ៍រត់វីតូស្សាឆ្នាំ២០២៥ នឹងចាប់ផ្តើមនៅកន្លែងដដែលនោះ និងបញ្ចប់នៅលើភ្នំឈើនីវីរ៉ាហ៍៕
ដោយ៖ យា ចិន្ដាខន្ដី (ប្រភព៖ BTA)