AKP ភ្នំពេញ ថ្ងៃទី២០ ខែសីហា ឆ្នាំ២០២៥ -- បន្ទាប់ពីការដំឡើងប្រព័ន្ធថាមពលពន្លឺព្រះអាទិត្យថ្មីសម្រាប់ថាមពលស្អាតនៅសហគ្រាសក្រុងសម្រាប់ការកែច្នៃកាកសំណល់ (MEWT) ក្នុងទីក្រុងសូហ្វីយ៉ា បានសន្សំថវិកា ២០០.០០០ BGN សម្រាប់ការចំណាយថ្លៃអគ្គិសនី។ នេះបើយោងតាមមជ្ឈមណ្ឌលសារព័ត៌មានរបស់ទីក្រុងសូហ្វីយ៉ាបានប្រកាសកាលពីថ្ងៃចន្ទ។នៅក្នុងខែមេសា ខែឧសភា និងខែមិថុនា ប្រព័ន្ធថាមពលពន្លឺព្រះអាទិត្យគ្របដណ្តប់ជាមធ្យម ២៥% នៃការប្រើប្រាស់ថាមពលសរុបរបស់សហគ្រាសមួយនេះ។

សាលាក្រុងសូហ្វីយ៉ាបានបន្ថែមថា ប្រព័ន្ធនេះមានម៉ូឌុលថាមពលចំនួន៣.៣៥៦ ដែលមានសមត្ថភាពផលិតថាមពលបាន ១.៨៦២គីឡូវ៉ាត់ក្នុងមួយម៉ោង ហើយរួមចំណែកដល់ការសម្រេចបាននូវកម្រិតសូន្យនៃការបំភាយកាបូន។ គំនិតផ្តួចផ្តើមនេះ គឺជាផ្នែកមួយនៃគោលដៅទូលំទូលាយរបស់ទីក្រុងសូហ្វីយ៉ា ដើម្បីកាត់បន្ថយការបំភាយឧស្ម័នផ្ទះកញ្ចក់ឱ្យបាន ៣០% នៅត្រឹមឆ្នាំ២០៣០ បន្ទាប់ពីការដាក់បញ្ចូលទីក្រុងនេះទៅក្នុងគំនិតផ្តួចផ្តើម«ទីក្រុងអព្យាក្រឹតអាកាសធាតុ និងឆ្លាតវៃទាំង១០០ នាពេលអនាគត» របស់សហភាពអឺរ៉ុប។

សាលាក្រុងបានបន្ថែមថា នៅដើមដំបូងនៃអាណត្តិរបស់អភិបាលក្រុងលោក វ៉ាស់ស៊ីល ធ័រហ្សីវ (Vassil Terziev) ហើយបន្ទាប់ពីការជំនួសប្រធានរោងចក្រប្រព្រឹត្តិកម្មសំណល់នោះ ប្រតិបត្តិការ និងកិច្ចសន្យាសម្រាប់កាកសំណល់ដែលអាចកែច្នៃឡើងវិញបាន និង RDF (ប្រេងឥន្ធនៈដែលបានមកពីការបដិសេធ) ត្រូវបានស្ដារឡើងវិញ។ ក្នុងរយៈពេលមួយឆ្នាំកន្លះកន្លងមកនេះ សហគ្រាស MEWT បានបង្ហាញពីភាពប្រសើរឡើងជាលំដាប់ទាំងក្នុងផលិតកម្ម និងប្រតិបត្តិការហិរញ្ញវត្ថុ។

យោងតាមសាលាក្រុង បានឱ្យដឹងថា ប្រាក់ចំណូលពីការលក់សម្ភារៈកែច្នៃបានកើនឡើងដល់ជិតប្រមាណ ១,៥លាន BGN នៅក្នុងឆ្នាំ២០២៤ដែលកើនឡើងបាន ១៩៥% បើធៀបនឹងឆ្នាំ២០២៣។ នៅឆមាសទីមួយនៃឆ្នាំ២០២៥ ថវិកាជាង ៩៤០.០០០ BGN ត្រូវបានបង្កើតឡើងសម្រាប់ថវិការបស់ទីក្រុង ដែលច្រើនជាងចំនួនប្រាំដងនៃចំនួនដែលប្រមូលបានក្នុងរយៈពេលដូចគ្នាកាលពីឆ្នាំ២០២៤។ RDF ប្រមាណជតិ ៥១.០០០តោនត្រូវបានផលិត និងនាំចេញក្នុងអំឡុងពេលប្រាំមួយខែដំបូងនៃឆ្នាំ២០២៥ដែលកើនឡើង ៥៤% ធៀបនឹងរយៈពេលដូចគ្នាកាលពីក្នុងឆ្នាំ២០២៤។កាកសំណល់នៅកន្លែងចាក់សំរាមកំពុងថយចុះ។ ចាប់ពីខែមករាដល់ខែមិថុនាឆ្នាំ២០២៥ មានសំរាមតែជាង ២៨.០០០តោនប៉ុណ្ណោះដែលត្រូវបានយកទោចាក់ចោលដែលតិចជាង ៣០% ធៀបនឹងឆ្នាំមុន និងតិចជាងពាក់កណ្តាលនៃបរិមាណនៅក្នុងឆ្នាំ២០២៣។

សាលាក្រុងក៏បានប្រកាសផងដែរថា ការដំឡើងថាមពលពន្លឺព្រះអាទិត្យថ្មីត្រូវបានគេរំពឹងថានឹងត្រូវបានដាក់ឱ្យដំណើរការនៅសួនសត្វសូហ្វីយ៉ាក្នុងរយៈពេលប៉ុន្មានសប្តាហ៍ខាងមុខនេះ៕
ដោយ៖ យា ចិន្ដាខន្ដី (ប្រភព៖ BTA)