AKP ភ្នំពេញ ថ្ងៃទី១៩ ខែសីហា ឆ្នាំ២០២៥ -- ប្រព័ន្ធផ្សព្វផ្សាយក្នុងស្រុកបានរាយការណ៍ថា សហរដ្ឋអាមេរិក និងកូរ៉េខាងត្បូងបានចាប់ផ្តើមសមយុទ្ធយោធាទ្រង់ទ្រាយធំប្រចាំឆ្នាំកាលពីថ្ងៃចន្ទ ដើម្បីពង្រឹងការត្រៀមខ្លួនការពាររបស់ពួកគេប្រឆាំងនឹងការគំរាមកំហែងរបស់កូរ៉េខាងជើង។

ប្រព័ន្ធផ្សព្វផ្សាយក្នុងស្រុកបានរាយការណ៍ថា សមយុទ្ធ Ulchi Freedom Shield (UFS) រយៈពេល ១១ថ្ងៃ ដែលដំណើរការរហូតដល់ថ្ងៃទី២៨ ខែសីហា ឆ្នាំ២០២៥ នេះ រួមមានសមយុទ្ធដើម្បីការពារការវាយប្រហារពីយន្តហោះគ្មានមនុស្សបើក (ដ្រូន) និងការវាយប្រហារតាមប្រព័ន្ធអ៊ីនធឺណិតជាដើម។

សមយុទ្ធនៅក្នុងឆ្នាំនេះនឹងប្រមូលផ្តុំកងទ័ពកូរ៉េខាងត្បូងប្រហែល១៨.០០០នាក់ និងចូលរួមសមយុទ្ធដែលរួមបញ្ចូលនូវការគំរាមកំហែងជាក់ស្តែងក្នុងគោលបំណងពង្រឹងសមត្ថភាពរបស់ប្រទេសទាំងពីរនៅទូទាំងដែនសមត្ថកិច្ចទាំងអស់។

ខណៈដែលសមយុទ្ធនេះនឹងត្រូវបានធ្វើឡើងក្នុងកម្រិតស្រដៀងគ្នាទៅនឹងឆ្នាំមុន ដូច្នេះប្រហែលជាពាក់កណ្តាលនៃសមយុទ្ធទីវាលចំនួន៤០ដែលបានគ្រោងទុកដំបូងនឹងត្រូវកំណត់ពេលដល់ខែកញ្ញា ដោយសារតែមានការព្រួយបារម្ភចំពោះកត្តាសីតុណ្ហភាពកំដៅខ្លាំង និងការខូចខាតដោយគ្រោះទឹកជំនន់នៅកន្លែងហ្វឹកហាត់មួយចំនួន។ នេះបើយោងតាមមន្ត្រីរបស់កូរ៉េខាងត្បូង។

ប្រទេសកូរ៉េ​ខាងជើង​បាន​កំណត់​លក្ខណៈ​សមយុទ្ធ​រួម​ជា​យូរ​មក​ហើយនេះ​ថា​ជា «សមយុទ្ធ» សម្រាប់​ការ​ឈ្លានពាន​ប្រឆាំង​នឹង​ខ្លួន ខណៈ​ដែល​សហរដ្ឋ​អាមេរិក និង​កូរ៉េ​ខាង​ត្បូង​បាន​សង្កត់​ធ្ងន់​ថា សមយុទ្ធ​នា​រដូវក្តៅនេះ ​គឺជាសមយុទ្ធការពារធម្មតាតែប៉ុណ្ណោះ។

សមយុទ្ធ UFS នឹងត្រូវធ្វើឡើងរួមជាមួយនឹងសមយុទ្ធការពារស៊ីវិលរយៈពេល ៤ថ្ងៃដែលដំណើរការរហូតដល់ថ្ងៃព្រហស្បតិ៍ ដោយប្រមូលផ្តុំជនស៊ីវិលប្រហែល ៥៨០.០០០នាក់។

សមយុទ្ធការពារជនស៊ីវិលប្រឆាំងការវាយឆ្មក់នឹងធ្វើឡើងនៅទូទាំងប្រទេសនៅថ្ងៃពុធ ជាផ្នែកមួយនៃសមយុទ្ធការពារស៊ីវិល៕

ដោយ៖ យា ចិន្ដាខន្ដី (ប្រភព៖ AA-AKP)