AKP ភ្នំពេញ ថ្ងៃទី១៩ ខែសីហា ឆ្នាំ២០២៥ -- បេសកជនពិសេសរបស់សហរដ្ឋអាមេរិកទទួលបន្ទុកស៊ីរី លោក ថម បារ៉ាក់ក៍ (Tom Barrack) បានជួបជាមួយប្រធានាធិបតីលីបង់ លោក ចូសេប អួន (Joseph Aoun)នៅក្នុងរដ្ឋធានីលីបង់កាលពីថ្ងៃចន្ទ។

ប្រធានាធិបតីលីបង់បាននិយាយនៅលើបណ្តាញសង្គមអ៊ិច (X) របស់សហរដ្ឋអាមេរិកថា បេសកជនរងសម្រាប់តំបន់មជ្ឈិមបូព៌ារបស់សហរដ្ឋអាមេរិក លោក ម៉ូហ្គែន អូថេហ្គូស (Morgan Ortagus) ក៏បានចូលរួមក្នុងកិច្ចប្រជុំនេះដែរ រួមជាមួយនឹងគណៈប្រតិភូអមដំណើរនៅឯវិមានបាអាបដា (Baabda) នៅភាគខាងកើតនៃទីក្រុងបេរុត។

លោក​ប្រធានាធិបតី​មិន​បាន​បង្ហាញ​ព័ត៌មាន​លម្អិត​បន្ថែម​ទៀត​ទាក់​ទង​នឹង​កិច្ច​ពិភាក្សា​នោះ​ទេ។

លោក បារ៉ាក់ក៍ ដែលបម្រើការជាឯកអគ្គរដ្ឋទូតសហរដ្ឋអាមេរិកប្រចាំនៅប្រទេសតួកគីផងដែរនោះ បានទៅដល់ទីក្រុងបេរុតកាលពីល្ងាចថ្ងៃអាទិត្យសម្រាប់ដំណើរទស្សនកិច្ចលើកទីបួនរបស់លោកចាប់តាំងពីខែមិថុនាមក។

ដំណើរទស្សនកិច្ចចុងក្រោយបង្អស់របស់បេសកជននេះធ្វើឡើងក្នុងរយៈពេល ១០ថ្ងៃបន្ទាប់ពីគណៈរដ្ឋមន្រ្តីរបស់ប្រទេសលីបង់បានអនុម័តទៅលើគោលបំណងនៃផែនទីបង្ហាញផ្លូវដែលលោកបានស្នើឡើងដែលជាចំណាត់ការដែលទាក់ទាញការប្រឆាំងយ៉ាងខ្លាំងពីក្រុមឧទ្ទាមហេសបូឡាហ៍ ដែលបានបដិសេធមិនព្រមទម្លាក់អាវុធចុះ។

សង្រ្គាមឆ្លងព្រំដែនរវាងអ៊ីស្រាអែល និងក្រុមហេសបូឡាហ៍ បានចាប់ផ្តើមនៅក្នុងខែតុលា ឆ្នាំ២០២៣ ហើយបានឈានទៅដល់សង្រ្គាមទ្រង់ទ្រាយធំនៅក្នុងខែកញ្ញា ឆ្នាំ២០២៤។ មនុស្សរហូតដល់ទៅ ៤.០០០នាក់រួមទាំងប្រធានក្រុមហេសបូឡាហ៍ លោក ហាសាន់ ណាស្រាល់ឡាហ៍ (Hasan Nasrallah) ត្រូវបានសម្លាប់ និងប្រហែល ១៧.០០០នាក់ផ្សេងទៀតបានរងរបួស។

បទ​ឈប់​បាញ់​ត្រូវ​បាន​សម្រេចកាលពី​ក្នុង​ខែ​វិច្ឆិកា ប៉ុន្តែ​កងកម្លាំង​អ៊ីស្រាអែល​បាន​ធ្វើ​ការ​វាយ​ប្រហារ​ស្ទើរតែ​រាល់​ថ្ងៃ​នៅ​ភាគ​ខាង​ត្បូង​ប្រទេស​លីបង់ ដោយ​អះអាង​ថា​មាន​គោល​ដៅ​លើ​សកម្មភាពរបស់ក្រុមឧទ្ទាម​ហេសបូឡាហ៍។

នៅក្រោមបទឈប់បាញ់នេះ អ៊ីស្រាអែលត្រូវបានគេសន្មត់ថានឹងដកខ្លួនទាំងស្រុងពីភាគខាងត្បូងនៃប្រទេសលីបង់នៅថ្ងៃទី២៦ ខែមករា ប៉ុន្តែថ្ងៃផុតកំណត់ត្រូវបានពន្យារពេលដល់ថ្ងៃទី១៨ ខែកុម្ភៈ បន្ទាប់ពីទីក្រុងតេលអាវីវបានបដិសេធមិនធ្វើតាម។ អ៊ីស្រាអែល​នៅតែ​រក្សា​វត្តមាន​យោធា​នៅ​ប៉ុស្តិ៍​ព្រំដែន​ចំនួន​ប្រាំ៕

ដោយ៖ យា ចិន្ដាខន្ដី (ប្រភព៖ AA-AKP)