AKP ភ្នំពេញ ថ្ងៃទី១៩ ខែសីហា ឆ្នាំ២០២៥ -- ប្រទេស​ចិន ​បាន​និយាយ​កាលពី​ថ្ងៃ​ចន្ទ​ថា ខ្លួន​រីករាយ​ដែល​ឃើញ​សហរដ្ឋអាមេរិក ​និង​រុស្ស៊ី​ពង្រឹង​ទំនាក់ទំនង​ទ្វេភាគី ​បន្ទាប់ពី​ប្រធានាធិបតីរុស្ស៊ី លោក ​វ្ល៉ា​ឌី​មៀ ពូ​ទីន(Vladimir Putin) និង​ប្រធានាធិបតីសហរដ្ឋអាមេរិក លោក ​ដូ​ណា​ល់ ត្រាំ(Donald Trump) បាន​ជួបប្រជុំ​គ្នា​នៅរដ្ឋ​អា​ឡា​ស្កា​។

អ្នកនាំពាក្យក្រសួងការបរទេសចិន លោកស្រី ម៉ៅ នីង (Mao Ning)បានប្រាប់អ្នកសារព័ត៌មាននៅទីក្រុងប៉េកាំងថា ប្រទេសចិនរីករាយដែលបានឃើញការបន្តការចូលរួមរបស់រុស្ស៊ី និងសហរដ្ឋអាមេរិកដើម្បីបង្កើនទំនាក់ទំនងរបស់ពួកគេ និងលើកកម្ពស់ការដោះស្រាយនយោបាយរបស់អ៊ុយក្រែន។

ទាក់ទងនឹង​វិបត្តិ​អ៊ុយក្រែន លោកស្រី ​ម៉ៅ​ បាន​និយាយ​ថា រដ្ឋាភិបាល​ក្រុង​ប៉េកាំង «គាំទ្រ» ចំពោះដំណោះស្រាយ​នយោបាយ​នៃ​សង្រ្គាម។

លោក ត្រាំ និងលោក ពូទីន បានបើកកិច្ចប្រជុំបិទទ្វាររយៈពេល៣ម៉ោងកាលពីថ្ងៃសុក្រសប្តាហ៍មុននៅទីក្រុងអេនចូរ៉េកនៃរដ្ឋអាឡាស្កាដោយលោក ពូទីន បាននិយាយថា ពួកគេបានឈានដល់ «ការយល់ដឹងហើយ»។

បន្ទាប់ពីកិច្ចប្រជុំកំពូលនោះ លោក ត្រាំ បានប្រាប់សារព័ត៌មាន Fox News ថា ចំណុចសំខាន់ៗត្រូវបានព្រមព្រៀងគ្នា ដោយនៅសល់តែធាតុតូចៗប៉ុណ្ណោះ។

លោកស្រី ម៉ៅ បានឆ្លើយតបនៅពេលដែលត្រូវបានសួរអំពីកិច្ចប្រជុំដែលបានគ្រោងទុករបស់លោក ត្រាំ ជាមួយប្រធានាធិបតីអ៊ុយក្រែន លោកវ៉ូឡូឌីមៀ ហ្សេលេនស្គី (Volodymyr Zelenskyy) និងបណ្តាមេដឹកនាំនៅអឺរ៉ុបនៅឯសេតវិមាននៅពេលបន្ទាប់នោះថា «យើងរំពឹងថា ភាគីពាក់ព័ន្ធទាំងអស់នឹងចូលរួមក្នុងកិច្ចចរចាសន្តិភាពសម្រាប់កិច្ចព្រមព្រៀងយូរអង្វែងដែលភាគីទាំងអស់ទទួលយក»។

ចំពោះប្រទេសចិនដែលត្រូវបានចាត់ទុកថាជាអ្នកធានាសន្តិសុខដែលរំពឹងទុកសម្រាប់អ៊ុយក្រែន លោកស្រី ម៉ៅ បាននិយាយថា «ជំហររបស់យើងចំពោះអ៊ុយក្រែន គឺស្រប និងច្បាស់លាស់។ យើងនឹងបន្តលើកកម្ពស់សន្តិសុខនយោបាយនៅក្នុងវិបត្តិអ៊ុយក្រែន»៕

ដោយ៖ យា ចិន្ដាខន្ដី (ប្រភព៖ AA-AKP)