AKP ភ្នំពេញ ថ្ងៃទី១៩ ខែសីហា ឆ្នាំ២០២៥ -- សេចក្តីថ្លែងការណ៍ផ្លូវការមួយបាននិយាយថា ប្រទេសជប៉ុន និងអាល្លឺម៉ង់ កាលពីថ្ងៃចន្ទបានសន្យាជំរុញបន្ថែមទៀតនៃកិច្ចសហប្រតិបត្តិការសន្តិសុខទ្វេភាគី។

ការសន្យានេះត្រូវបានពិភាក្សាក្នុងអំឡុងពេលកិច្ចសន្ទនាយុទ្ធសាស្ត្រលើកទីមួយរបស់ភាគីទាំងពីរនៅទីក្រុងតូក្យូរបស់ប្រទេសជប៉ុន ដែលដឹកនាំដោយរដ្ឋមន្ត្រីការបរទេសជប៉ុន លោក តាកេស៊ី អ៊ីវ៉ាយ៉ា (Takeshi Iwaya)និងសមភាគីអាល្លឺម៉ង់ លោក ចូហាន់ វ៉ាដេផល (Johann Wadephul) ដែលកំពុងបំពេញទស្សនកិច្ចរយៈពេលបីថ្ងៃនៅប្រទេសជប៉ុន។

លោក អ៊ីវ៉ាយ៉ា បាននិយាយថា សណ្តាប់ធ្នាប់អន្តរជាតិកំពុងប្រឈមមុខនឹងបញ្ហាធ្ងន់ធ្ងរ ហើយតម្រូវការសម្រាប់កិច្ចសហប្រតិបត្តិការរវាងប្រទេសជប៉ុន និងអាល្លឺម៉ង់ក៏កំពុងកើនឡើងដែរ។ នេះបើយោងតាមសេចក្តីថ្លែងការណ៍ដែលបានចេញដោយក្រសួងការបរទេសជប៉ុន។

ភាគីទាំងពីរបានចាត់វិធានការជាច្រើន ដើម្បីជំរុញកិច្ចសហប្រតិបត្តិការផ្នែកសន្តិសុខ ហើយកិច្ចព្រមព្រៀងនៃការទិញ និងសេវាឆ្លងកាត់ទ្វេភាគីបានចូលជាធរមានកាលពីខែកក្កដាឆ្នាំមុន ដែលនឹងជួយសម្រួលដល់សមយុទ្ធរួមគ្នារវាងកងកម្លាំងស្វ័យការពារជប៉ុន និងយោធាអាល្លឺម៉ង់។

លោក វ៉ាដេផល បានប្រាប់លោក អ៊ីវ៉ាយ៉ា ថា «ប្រទេសជប៉ុន គឺជាដៃគូពិសេសនៅអាស៊ីដែលចែករំលែកនូវគុណតម្លៃ និងគោលការណ៍ដូចគ្នា»ដោយលោក វ៉ាដេផល បាននិយាយបន្ថែមថា ប្រទេសអាល្លឺម៉ង់មានបំណងធ្វើឱ្យកិច្ចសហប្រតិបត្តិការកាន់តែស៊ីជម្រៅបន្ថែមទៀត។

ប្រទេសជប៉ុន និង​អាល្លឺម៉ង់ ដែល​បាន​បង្កើត​ទំនាក់ទំនង​ការទូត​ក្នុង​ឆ្នាំ១៨៦១ ដែលជា​សមាជិក​នៃ​ក្រុមប្រទេស G7 និង G20 ក្នុងចំណោម​វេទិកា​ពហុភាគី​ផ្សេងៗទៀត។ ទំហំពាណិជ្ជកម្មរវាងប្រទេសទាំងពីរបានកើនឡើងដល់ជាង ៤៧ពាន់លានដុល្លារអាម៉េរិកក្នុងរយៈពេលប៉ុន្មានឆ្នាំចុងក្រោយនេះ។

សេចក្តីថ្លែងការណ៍នោះបាននិយាយបន្ថែមថា «រដ្ឋមន្ត្រីទាំងពីរបានឯកភាពគ្នាលើការពង្រឹងកិច្ចសន្ទនាទាក់ទងនឹងសន្តិសុខ និងការពង្រឹងកិច្ចសហប្រតិបត្តិការនៅក្នុងដែនអ៊ីនធឺណេត ដើម្បីសម្រេចបាននូវកិច្ចសហប្រតិបត្តិការទ្វេភាគីបន្ថែមទៀតនៅក្នុងវិស័យសន្តិសុខ»។

សេចក្តីថ្លែងការនោះបានបន្ថែមថា រដ្ឋមន្ត្រីការបរទេសទាំងពីរបានផ្លាស់ប្តូរទស្សនៈគ្នាអំពីស្ថានភាពនៅអ៊ុយក្រែន និងបានឯកភាពទៅលើការបន្តការសម្របសម្រួលយ៉ាងជិតស្និទ្ធ ដើម្បីសម្រេចបាននូវសន្តិភាពដ៏ត្រឹមត្រូវ និងយូរអង្វែង។

ពួកគេក៏បានផ្លាស់ប្តូរទស្សនៈស្តីពីស្ថានភាពនៅក្នុងតំបន់អាស៊ីប៉ាស៊ីហ្វិកកាផងដែរ រួមទាំងគោលនយោបាយឆ្ពោះទៅរកប្រទេសកូរ៉េខាងជើង ក៏ដូចជាស្ថានភាពនៅមជ្ឈិមបូព៌ា និងអាហ្វ្រិក៕

ដោយ៖ យា ចិន្ដាខន្ដី (ប្រភព៖ AA-AKP)