AKP ភ្នំពេញ ថ្ងៃទី១៩ ខែសីហា ឆ្នាំ២០២៥ -- ការិយាល័យរបស់ឧបនាយករដ្ឋមន្ត្រីស្តីទីអាហ្វហ្គានីស្ថានទទួលបន្ទុកកិច្ចការសេដ្ឋកិច្ចបាននិយាយនៅក្នុងសេចក្តីថ្លែងការណ៍មួយកាលពីល្ងាចថ្ងៃអាទិត្យថា ប្រទេសអាហ្វហ្គានីស្ថានបានចុះហត្ថលេខាលើកិច្ចសន្យាដែលមានតម្លៃ ២៤៣លានដុល្លារអាម៉េរិកជាមួយប្រទេសអ៊ូសបេគីស្ថាន ដើម្បីអនុវត្តគម្រោងអគ្គិសនីសំខាន់ៗចំនួន ៤ ក្នុងគោលបំណងជំរុញការផ្គត់ផ្គង់ថាមពលរបស់ប្រទេស។

សេចក្តីថ្លែងការណ៍បានបន្ថែមថា ការចុះហត្ថលេខាលើកិច្ចសន្យានេះត្រូវបានត្រួតពិនិត្យដោយឧបនាយករដ្ឋមន្ត្រីស្តីទីអាហ្វហ្គានីស្ថានទទួលបន្ទុកកិច្ចការសេដ្ឋកិច្ច លោក មូលឡាហ៍ អាប់ឌុល ហ្គានី បារ៉ាដារ អាគុន (Mullah Abdul Ghani Baradar Akhund) និងរដ្ឋមន្ត្រីថាមពលអ៊ូសបេគីស្ថានលោក ជូរ៉ាប៊េក មៀហ្សាម៉ាហ៍មូដូវ (Jurabek Mirzamahmudov) ក៏ដូចជាមន្ត្រីរដ្ឋាភិបាលនៅក្នុងរដ្ឋធានីកាប៊ុលផងដែរ។

គម្រោង​ទាំង​នោះ​ត្រូវ​បាន​គេ​រំពឹង​ថា​នឹង​ត្រូវ​បញ្ចប់​ក្នុង​រយៈពេល១៨ខែ៕

ដោយ៖ មូល មិនា (ប្រភព៖ ស៊ីនហួ)