AKP ភ្នំពេញ ថ្ងៃទី១៩ ខែសីហា ឆ្នាំ២០២៥ -- ប្រព័ន្ធផ្សព្វផ្សាយរដ្ឋបានរាយការណ៍កាលពីថ្ងៃអាទិត្យ ដោយដកស្រង់សម្តីមន្ត្រីជាន់ខ្ពស់មួយរូបថារដ្ឋាភិបាលស្រីលង្កាគ្រោងនឹងចុះហត្ថលេខាលើកិច្ចព្រមព្រៀងពាណិជ្ជកម្មសេរី (FTAs) បន្ថែមទៀតជាមួយដៃគូបរទេស ដើម្បីធ្វើពិពិធកម្មទីផ្សារនាំចេញរបស់ខ្លួន និងជំរុញប្រាក់ចំណូលប្តូរប្រាក់បរទេស។

អនុរដ្ឋមន្ត្រីក្រសួងឧស្សាហកម្ម និងអភិវឌ្ឍន៍សហគ្រិន លោក ចាធូរ៉ាន់ហ្គា អាប៊េយស៊ីង ហេ (Chathuranga Abeysinghe) មានប្រសាសន៍ថាការធ្វើពិពិធកម្មទីផ្សារមានសារៈសំខាន់ណាស់ក្នុងការកសាងវិស័យនាំចេញដែលមានការប្រកួតប្រជែង និងភាពធន់។

លោកបានកត់សម្គាល់ថា ការពង្រីកភាពជាដៃគូពាណិជ្ជកម្មនឹងមិនត្រឹមតែជួយធ្វើពិពិធកម្មផលិតផលប៉ុណ្ណោះទេ ប៉ុន្តែថែមទាំងពង្រឹងការធ្វើសមាហរណកម្មទៅក្នុងសង្វាក់ផ្គត់ផ្គង់ពិភពលោក។ លោកបានមានប្រសាសន៍ថា រដ្ឋាភិបាលក៏បានផ្តោតលើការបង្កើនតម្លៃបន្ថែម និងការទទួលស្គាល់ម៉ាកយីហោឱ្យកាន់តែច្រើនផងដែរ។

លោក អាប៊េយស៊ីងហេ បានគូសបញ្ជាក់ថា ការនាំចេញសម្លៀកបំពាក់របស់ប្រទេសស្រីលង្ការកបានជាង ៥ប៊ីលានដុល្លារអាម៉េរិកក្នុងឆ្នាំ២០២៤។រដ្ឋាភិបាលមានគោលបំណងបង្កើនតួលេខនេះដល់ ៨ប៊ីលានដុល្លារអាម៉េរិកនៅឆ្នាំ២០៣០៕

ដោយ៖ មូល មិនា (ប្រភព៖ ស៊ីនហួ)