EN 
FR 
AR
CNទីភ្នាក់ងារអង្គការសហប្រជាជាតិ៖ ស្ត្រី និងក្មេងស្រីមួយលាននាក់នៅតំបន់ហ្គាហ្សាប្រឈមនឹងការអត់ឃ្លានយ៉ាងខ្លាំង
AKP ភ្នំពេញ ថ្ងៃទី១៨ ខែសីហា ឆ្នាំ២០២៥ -- ទីភ្នាក់ងារជំនួយ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីននៅជិតបូព៌ា(UNRWA) បាននិយាយកាលពីថ្ងៃសៅរ៍សប្តាហ៍មុននៅលើវេទិកាប្រព័ន្ធផ្សព្វផ្សាយសង្គមអ៊ិច (X) ថា ស្ត្រី និងក្មេងស្រីចំនួនមួយលាននាក់កំពុងប្រឈមនឹងការអត់ឃ្លាន អំពើហិង្សា និងការរំលោភបំពានយ៉ាងច្រើននៅតំបន់ហ្គាហ្សា។
ទីភ្នាក់ងារ UNRWA បាននិយាយថា «ភាពអត់ឃ្លានកំពុងរីករាលដាលយ៉ាងឆាប់រហ័សនៅក្នុងតំបន់ហ្គាហ្សា... ស្ត្រី និងក្មេងស្រីត្រូវបានបង្ខំឱ្យអនុវត្តយុទ្ធសាស្រ្តរស់រានមានជីវិតដ៏គ្រោះថ្នាក់ ដូចជាការចេញទៅរកអាហារ និងទឹក ដែលមានហានិភ័យខ្ពស់នៃការស្លាប់»។
វាបានជំរុញឱ្យដកចេញនៃការបិទផ្លូវរបស់អ៊ីស្រាអែលទៅលើតំបន់ហ្កាហ្សាដែលមានប្រជាជនជាង ២លាននាក់ និងនាំយកជំនួយមនុស្សធម៌ក្នុងទំហំធំ។
ការកត់សម្គាល់នេះបានធ្វើឡើងនៅពេលដែលអាជ្ញាធរសុខាភិបាលដែលមានមូលដ្ឋាននៅតំបន់ហ្គាហ្សាបានរាយការណ៍កាលពីថ្ងៃសៅរ៍ថា មានអ្នកស្លាប់ចំនួន ១១នាក់បន្ថែមទៀត រួមទាំងកុមារម្នាក់ផងដែរដោយសារគ្រោះទុរ្ភិក្ស និងកង្វះអាហារូបត្ថម្ភក្នុងរយៈពេល ២៤ម៉ោងកន្លងមក ដែលនាំឱ្យចំនួនអ្នកស្លាប់ទាក់ទងនឹងភាពអត់ឃ្លានមានសរុបដល់ទៅ ២៥១នាក់ ដោយក្នុងនោះមានកុមារ ១០៨នាក់។
ចំនួនមនុស្សសរុបដែលត្រូវបានសម្លាប់ដោយការវាយប្រហាររបស់អ៊ីស្រាអែលចាប់តាំងពីខែតុលា ឆ្នាំ២០២៣ មក បានកើនឡើងដល់៦១.៨០០នាក់ និងអ្នករបួសជាង ១៥៥.០០០នាក់។ នេះបើយោងតាមអាជ្ញាធរសុខាភិបាល៕
ដោយ៖ យា ចិន្ដាខន្ដី (ប្រភព៖ ឆាយណាដេលី)
