AKP ភ្នំពេញ ថ្ងៃទី១៨ ខែសីហា ឆ្នាំ២០២៥ -- ប្រធានាធិបតីឥណ្ឌូណេស៊ីលោក ប្រាបូវ៉ូ ស៊ូប៊ីអាន់តូ (Prabowo Subianto) បានកំណត់ទិសដៅកំណើនសេដ្ឋកិច្ច ៥,៤% នៅក្នុងឆ្នាំ២០២៦ ជាមួយនឹងអតិផរណានៅកម្រិត២,៥% និងសូចនាករម៉ាក្រូសេដ្ឋកិច្ចដែលមានស្ថិរភាព។

ថ្លែងនៅក្នុងសម័យប្រជុំសភាតំណាងរាស្រ្តនៅទីក្រុងហ្សាកាតាកាលពីសប្តាហ៍មុន លោក ប្រាបូវ៉ូ បាននិយាយថា សុទិដ្ឋិនិយមនេះ គឺផ្អែកលើការគ្រប់គ្រងហិរញ្ញវត្ថុដ៏ល្អ គួបផ្សំនឹងការរៀបចំរចនាសម្ព័ន្ធសេដ្ឋកិច្ច និងការកែលម្អផលិតភាព។ លោក​ក៏​បាន​កំណត់​គោល​ដៅ​សម្រាប់​អត្រា​ការ​ប្រាក់ដែលត្រូវ​រក្សា​នៅ​ក្នុង​រង្វង់ ​៦,៩% ផងដែរ។

លោកក៏បានសង្កត់ធ្ងន់ផងដែរអំពីគោលដៅនៃតុល្យភាពថវិកាជាតិនៅត្រឹមឆ្នាំ២០២៧ ឬឆ្នាំ២០២៨ ដោយបញ្ចប់ឱនភាពសារពើពន្ធដែលអូសបន្លាយក្នុងរយៈពេលប៉ុន្មានឆ្នាំថ្មីៗនេះ។ នេះ​ត្រូវ​បាន​គេ​ចាត់​ទុក​ថា​ជា​ចំណុច​របត់​មួយ​ក្នុង​ការ​ពង្រឹង​ហិរញ្ញវត្ថុ​សាធារណៈ ការ​បន្ធូរបន្ថយ​សម្ពាធ​បំណុល និង​ការ​ពង្រឹង​សមត្ថភាព​ក្នុង​ការ​វិនិយោគ​ក្នុង​វិស័យ​អាទិភាព។

រដ្ឋាភិបាលឥណ្ឌូណេស៊ីរំពឹងថានឹងកាត់បន្ថយអត្រាអ្នកអត់ការងារធ្វើមកនៅត្រឹមពី ៤,៤៤% ទៅ ៤,៩៦% និងអត្រាភាពក្រីក្រមកនៅត្រឹមពី៦,៥% ទៅ ៧,៥% នៅត្រឹមឆ្នាំ២០២៦៕

ដោយ៖ យា ចិន្ដាខន្ដី (ប្រភព៖ VNA)