AKP កំពង់ធំ ថ្ងៃទី១៧ ខែសីហា ឆ្នាំ២០២៥-- ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងជាប្រធានក្រុមការងារចុះមូលដ្ឋានស្រុកស្ទោង បានអំពាវនាវពលរដ្ឋក្នុងមូលដ្ឋានសូមចូលរួម និងជឿជាក់ជាមួយក្រុមការងារដើម្បីរួមគ្នាអភិវឌ្ឍស្រុកស្ទោង ក្នុងឱកាសដែលឯកឧត្តម និងសហការីអញ្ជើញជួបសំណេះសំណាលសួរសុខទុក្ខ និងប្រគេនទៀនព្រះវស្សាជូនដល់ព្រះសង្ឃ អាចារ្យគណៈកម្មការវត្តទាំង៦នៅក្នុងឃុំទ្រា ស្រុកស្ទោង ខេត្តកំពង់ធំនាព្រឹកថ្ងៃទី១៧ ខែសីហា ឆ្នាំ ២០២៥។

ក្នុងឱកាសនោះដែរ ឯកឧត្តម ថោ ជេដ្ឋា បានពាំនាំនូវការផ្ដាំផ្ញើសួរសុខទុក្ខពីសំណាក់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលសម្ដេចទាំងទ្វេតែងតែគិតគូរយកចិត្តទុកដាក់ដល់សុខទុក្ខពុកម៉ែបងប្អូនប្រជាពលរដ្ឋនៅក្នុងមូលដ្ឋានគ្រប់ពេលវេលា។

ឯកឧត្តមបញ្ជាក់ថា ស្រុកស្ទោងជាស្រុកមួយកំពុងតែមានការរីកចម្រើនទៅលើវិស័យកសិកម្ម ជាពិសេសកំពុងកសាង ព្រមទាំងមានផែនការសម្រាប់កសាងបន្តនូវហេដ្ឋារចនាសម្ព័ន្ធ និងប្រព័ន្ធធារាសាស្ត្រ ដែលជាឃឿនក្នុងការលើកកម្ពស់សុខទុក្ខសុខុមាលភាព និងសេដ្ឋកិច្ចប្រជាពលរដ្ឋនៅក្នុងស្រុកឱ្យកាន់តែប្រសើរឡើងថែមទៀត។

ឯកឧត្តមរដ្ឋមន្ត្រីបានកោតសរសើរ និងដឹងគុណយ៉ាងជ្រាលជ្រៅបំផុតដល់វីរយុទ្ធជនដែលបានពលីសាច់ស្រស់ឈាមស្រស់ និងកំពុងការពារព្រំដែនប្រយុទ្ធតស៊ូការពារបូរណភាពដែនដីពីការឈ្លានពានរបស់ចោរសៀម ហើយបានអំពាវនាវដល់ប្រជាពលរដ្ឋក្នុងមូលដ្ឋានសូមជឿជាក់លើប្រមុខរាជរដ្ឋាភិបាល ក្នុងការដោះស្រាយបញ្ហាសង្គ្រាម ពីការបង្កអរិភាពឥតឈប់ឈរ របស់សៀមប្រកបដោយសន្តិវិធី និងឈរលើគោលការណ៍ច្បាប់អន្តរជាតិជាគោល។

សូមបញ្ជាក់ថា ឯកឧត្តមរដ្ឋមន្ត្រីបានប្រគេនដល់វត្តទាំង៦ក្នុង១វត្តទទួលបាននូវបច្ច័យចំនួន១លានរៀល ទៀនព្រះវស្សា១គូ សាដក១ ព្រមទាំងគ្រឿងឧបភោគបរិភោគ និងទេយ្យទានមួយចំនួនធំទៀត។ ទន្ទឹមនឹងនេះ ឯកឧត្តមនិងក្រុមការងារក៏បានអញ្ជើញជួបសំណេះសំណាលសួរសុខទុក្ខវីរកងទ័ព គ្រួសារយុទ្ធជនចំនួន៥នាក់ ដែលកំពុងសម្រាកព្យាបាលនៅមន្ទីរពេទ្យបង្អែកស្ទោង និងនៅគេហដ្ឋានដែលក្នុងម្នាក់ៗទទួលបាននូវថវិកា២លានរៀល ដោយឡែក លោកអនុសេនីយ៍ទោ សឹង្ហ សារួន ទទួលបានថវិកាចំនួន៤លានរៀល៕

ដោយ ស៊ុម វណ្ណា