AKP កំពង់ធំ ថ្ងៃទី១៧ ខែសីហា ឆ្នាំ២០២៥-- ឯកឧត្តម ឧត្តមសេនីយ៍ឯក មួង សុធា អគ្គស្នងការរងនគរបាលជាតិ បានដាក់ចេញទិសដៅ១៤ចំណុចដល់ថ្នាក់ដឹកនាំ និងកងកម្លាំងស្នងការដ្ឋាននគរបាលខេត្តកំពង់ធំយកទៅអនុវត្តឱ្យទទួលបានលទ្ធផលខ្ពស់ ក្នុងឱកាសអញ្ជើញជាតំណាងឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ក្នុងពិធីសំណេះសំណាល សួរសុខទុក្ខ និងត្រួតពិនិត្យសកម្មភាពការងារ នៅស្នងការដ្ឋាននគរបាលខេត្តកំពង់ធំ កាលពីថ្ងៃទី១៦ ខែសីហា ឆ្នាំ២០២៥។

ឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំ បានរាយការណ៍អំពីស្ថានភាព លក្ខណៈភូមិសាស្ត្រខេត្ត កិច្ចការងារ ការពារ សន្តិសុខសុវត្ថិភាព សណ្តាប់ធ្នាប់កិច្ចប្រតិបត្តិការ ព្រមទាំងរចនាសម្ព័ន្ធ ស្ថានភាពកងកម្លាំងនគរបាលខេត្តកំពង់ធំ និងបានលើកពីស្នាដៃ គុណបំណាច់របស់កងកម្លាំង រយៈពេលកន្លងមកសម្រេចបានជោគជ័យជាបន្តបន្ទាប់ ក្នុងបេសកកម្មការពារជាតិមាតុភូមិ នាឱកាសប្រារព្ធពិធីបុណ្យជាតិ និងអន្តរជាតិ ជាពិសេសខេត្តរៀបចំពិធីសំខាន់ៗ ក្រោមវត្តមានដ៏ខ្ពង់ខ្ពស់ពីសំណាក់ថ្នាក់ដឹកនាំនៃព្រះរាជាណាចក្រកម្ពុជា។

ក្នុងឱកាសនោះ ឯកឧត្តម ឧត្តមសេនីយ៍ឯក មួង សុធា អគ្គស្នងការរងនគរបាលជាតិ បានពាំនាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ឯកឧត្ដម នាយឧត្ដមសេនីយ៍ ស ថេត អគ្គស្នងការនគរបាលជាតិ ជូនចំពោះកងកម្លាំងនគរបាល ដែលលះបង់កម្លាំងកាយចិត្ត សេចក្ដីសុខផ្ទាល់ខ្លួនអនុវត្តតួនាទី ភារកិច្ច ការពារ រក្សាសន្តិសុខ សណ្តាប់ធ្នាប់ សុវត្ថិភាពសង្គមនិងការផ្តល់សេវាសាធារណៈជូនប្រជាពលរដ្ឋ ព្រមទាំងកោតសរសើរ ចំពោះស្នងការនគរបាលខេត្តកំពង់ធំ ដែលប្រមូលផ្ដុំកងកម្លាំង ប្រកបដោយភាពអង់អាចក្លាហាន និងបានត្រៀមលក្ខណៈរួចជាស្រេចចំពោះសម្ភារមធ្យោបាយ រង់ចាំអនុវត្តបទបញ្ជារបស់រាជរដ្ឋាភិបាល ការពាបូរណភាពរអធិបតេយ្យភាពទឹកដី នៃព្រះរាជាណាចក្រកម្ពុជា ចំពោះបញ្ហាជម្លោះព្រំដែន កម្ពុជា-ថៃ។

ឯកឧត្តមក៏បានផ្ដាំផ្ញើ និងដាក់ចេញនូវទិសដៅ១៤ចំណុចដល់ថ្នាក់ដឹកនាំ ព្រមទាំងកងកម្លាំងយកទៅអនុវត្ដឱ្យទទួលបានប្រសិទ្ធភាពខ្ពស់៖ ១. ត្រូវបន្តអនុវត្តផែនការសកម្មភាពឆ្នាំ២០២៥ របស់អគ្គស្នងការដ្ឋាននគរបាលជាតិ ប្រកបដោយស្មារតីទទួលខុសត្រូវខ្ពស់ព្រមទាំងត្រូវកំណត់កម្មវិធីដឹកនាំប្រជុំ ត្រួតពិនិត្យដោះស្រាយការងាររបស់អង្គភាពចំណុះតាមកាលកំណត់ឬតាមភាពចាំបាច់នៃការងារ។ ២. បន្តជំរុញការអនុវត្តគោលនយោបាយភូមិ-ឃុំ-សង្កាត់មានសុវត្ថិភាពនៅ មូលដ្ឋានឱ្យកាន់តែសកម្មស៊ីជម្រៅនិងមានប្រសិទ្ធភាពបន្ថែមទៀត។ ត្រូវយកចិត្តទុកដាក់ទទួលពាក្យបណ្តឹងរបស់ពលរដ្ឋនិងចុះអន្តរាគមន៍ឱ្យបានទាន់ ពេលវេលានិងត្រូវមានការតាមដាន ត្រួតពិនិត្យការអនុវត្តនៅមូលដ្ឋានដើម្បីផ្តល់ការគាំទ្រលើកទឹកចិត្តដល់មន្រ្តីប៉ុស្តិ៍នគរបាលរដ្ឋបាល ប៉ុស្តិ៍នគរបាលរដ្ឋបាលនិងអធិការដ្ឋាន ដែលអនុវត្តសកម្ម។ ត្រូវជំរុញការចុះបង្ក្រាបបទល្មើឆបោកតាមអនឡាញ ការលេង ល្បែងអនឡាញ និងល្បែងស៊ីសងខុសច្បាប់ នៅតាមទីតាំងនានា ក្នុងដែនសមត្ថកិច្ច របស់ខ្លួនហើយជនបរទេសដែលរកឃើញត្រូវធ្វើការចាត់បញ្ជូនទៅអគ្គនាយដ្ឋានអន្តោប្រវេសន៍តាមនីតិវិធីឱ្យបានឆាប់ដើម្បីបណ្តេញចេញ។ចំណែកឯកជនល្មើសត្រូវកសាងសំណុំរឿងបញ្ជូនទៅតុលាការ តាមនីតិវីធី។ ៣. រៀបចំផែនការត្រួតពិនិត្យ និងឆែកឆេរអាវុធគ្រឿងផ្ទុះនិងគ្រាប់រំសេវ បែបចំហនិងតាមបែបរដ្ឋបាលក្នុងដែនសមត្ថកិច្ចរបស់ខ្លួន ដោយកំណត់ពេលវេលា និងទីតាំងត្រួតពិនិត្យឱ្យបានច្បាស់លាស់ និងត្រូវស្នើសុំគោលការណ៍ពិនិត្យនិងសម្រេចលើផែនការនេះពីគណៈបញ្ជាការឯកភាពរដ្ឋបាលខេត្ត មុនចាត់តាំងអនុវត្ត។ ៤. ពង្រឹងការត្រួតពិនិត្យនិងរៀបចំសណ្តាប់ធ្នាប់ចរាចរណ៍ឱ្យបានរៀបរយល្អ ប៉ុន្តែយកវិធានការអប់រំនិងវិធានការរដ្ឋបាលជាធំ ជាជាងការផាកពិន័យ"អនុវត្ត ដោយភាពបត់បែន រស់រវើកបញ្ចៀសឱ្យបានរាល់សកម្មភាពអសកម្មដែលនាំឱ្យមានការរិះគន់ពីសាធារណៈមតិ"។ ៥. លុបបំបាត់ឱ្យបាននូវរាល់សកម្មភាពរបស់ក្មេងទំនើង ដែលបង្កភាពភ័យ ខ្លាច និងក្តីព្រួយបារម្ភរបស់ប្រជាពលរដ្ឋ ជាពិសេសនៅរដូវបុណ្យកាន់បិណ្ឌ និងបុណ្យភ្ជុំបិណ្ឌនាពេលខាងមុខ។ ៦. បង្កើនវិធានការគ្រប់គ្រងមនុស្ស ជាពិសេសប្រជាពលរដ្ឋដែលវិលមកពីប្រទេសថៃ "មានបញ្ជីគ្រប់គ្រង និងតាមដានសកម្មភាពឱ្យបានហ្មត់ចត់" ព្រមទាំងជួយផ្សព្វផ្សាយអំពីទីផ្សារការងារដែលរៀបចំដោយក្រសួងការងារ និងបណ្តុះបណ្តាល វិជ្ជាជីវៈ។ ៧. បន្តយកចិត្តទុកដាក់ខ្ពស់ក្នុងការពង្រឹងវិន័យ និងការគោរពក្រមសីល មើលធម៌។ ៨. ត្រូវបន្តពង្រឹងការគ្រប់គ្រងកម្លាំងឱ្យបានហ្មត់ចត់ តាមរយៈការគ្រប់គ្រងបញ្ជីវត្តមានឬការប្រជុំជួរការត្រួតពិនិត្យការគ្រងឯកសណ្ឋាននិងពាក់សញ្ញាសម្គាល់នគរបាលជាតិឱ្យបានត្រឹមត្រូវ តាមការកំណត់ ការកំណត់ក្នុងបទវិន័យនគរបាលជាតិនិងបទប្បញ្ញត្តិពាក់ព័ន្ធ។ ៩.ផ្សព្វផ្សាយអប់រំនិងណែនាំ ដល់ប្រជាពលរដ្ឋ កុំឱ្យមានការរើសអើង ដែលអាចបង្កឱ្យមានទំនាស់ជាតិសាសន៍ទៅវិញទៅមកធ្ងន់ធ្ងរជាពិសេសត្រូវជៀសវាងនៅរាល់ការផ្សព្វផ្សាយព័ត៌មានបញ្ចេញមតិបង្ហោះរូបភាពឬធ្វើកម្មភាពដោយខ្វះការពិចារណាដែលធ្វើឱ្យប៉ះពាល់ដល់ការអនុវត្តបទឈប់បាញ់ នឹងប៉ះពាល់ដល់ការ រកទទួលទានរបស់បងប្អូនប្រជាពរដ្ឋខ្មែរដែលមានសញ្ញាសម្គាល់ជារបស់ថៃ។ ១០. ត្រូវចូលរួមចំណែកក្នុងការអប់រំ នឹងពន្យល់ប្រជាពលរដ្ឋនៅតាម ភូមិសាស្ត្រក្នុងដែនសមត្ថកិច្ចរបស់ខ្លួនឱ្យបានយល់អំពីជំហរ គោលនយោបាយយុទ្ធ សាស្ត្ររបស់រាជរដ្ឋាភិបាល ក្នុងការដោះស្រាយជម្លោះព្រំដែនកម្ពុជា-ថៃ ដោយត្រូវរក្សា ឱ្យបានដាច់ខាតនូវភាពថ្លៃថ្នូរអត់ធ្មត់តាមបទបញ្ជារបស់រដ្ឋាភិបាល បំពេញកាតព្វកិច្ច ការពារអធិបតេយ្យបូរណភាពទឹកដីនៃយើងទាំងអស់គ្នាប្រកបដោយ ជោគជ័យ។ ១១. អនុវត្តឱ្យបានខ្ជាប់ខ្លួន សេចក្តីជូនដំណឹងរបស់ក្រសួងមហាផ្ទៃ ទាក់ទង នឹងការបង្ហោះ Drones។ ១២. ត្រូវធ្វើបច្ចុប្បន្នភាព Drones និងធ្វើចំណាត់ថ្នាក់តាមប្រភេទនៃ Drones ក្នុងមូលដ្ឋានរបស់ខ្លួន រាជធានី ខេត្ត របស់ខ្លួនឱ្យបានច្បាស់លាស់។ ១៣. ធ្វើរបាយការណ៍ប្រចាំថ្ងៃអំពីបង្ហោះDronesទាំងការបង្ហោះក្នុងស្រុកទាំងមកពីខាងក្រៅ ដោយត្រូវស្រាវជ្រាវរកប្រភព និងរកម្ចាស់ តាមលទ្ធភាពដែលអាចធ្វើទៅបាន និង១៤. ក្រៅពីការដឹកនាំប្រតិភូចុះសុខទុក្ខ ឧបត្ថម្ភ គាំទ្រជួរមុខប៉ុណ្ណោះទេ ស្នងការដ្ឋាន ក៏ត្រូវរៀបចំបង្កើតឱ្យមានកងអនុសេនាតូច ដោយត្រៀមលក្ខណៈសម្បត្តិ រួចជាស្រេចដើម្បីគាំទ្រដល់សមរភូមិមុខថែមទៀត ក្នុងករណីចាំបាច់ឬមានតម្រូវការ។ សកម្មភាពទាំងនេះ បានបង្ហាញអំពីសុឆន្ទៈរបស់កងកម្លាំង ក្នុងនាមគ្រួសារ នគរបាលជាតិ រួមគ្នាទប់ទល់នូវមហិច្ឆតាឈ្លានពានរបស់សត្រូវ។

ទន្ទឹមនឹងនេះ ឯកឧត្ដមបានប្រគល់អំណោយដែលជាការឧបត្ថម្ភដ៏ថ្លៃថ្លារបស់ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងលោកជំទាវ ស ស៊ីណា ដល់ស្នងការដ្ឋាននគរបាលខេត្តកំពង់ធំ រួមមាន ថវិកាចំនួន១៦លានរៀល អង្ករចំនួន០៤តោន ទឹកបរិសុទ្ធ២០០កេស មី៥០កេស និងត្រីខចំនួន២០កេស៕

ដោយ ស៊ុម វណ្ណា (ប្រភព៖ ស្នងការដ្ឋាននគរបាលខេត្តកំពង់ធំ)