AKP កំពង់ឆ្នាំង ថ្ងៃទី១៧ ខែសីហា ឆ្នាំ២០២៥-- សម្តេចមហាមន្ត្រី គុយ សុផល ឧបនាយករដ្ឋមន្ត្រី និងជារដ្ឋមន្ត្រីក្រសួងព្រះបរមរាជវាំង នៅតែបន្តទទួលជំនួយពីសប្បុរសជននានា ដើម្បីចុះទៅជួបសំណេះសំណាល និងសួរសុខទុក្ខ វីរកងទ័ពជួរមុខ បងប្អូនជនភៀសសឹក និងផ្ដល់អំណោយឧបត្ថម្ភជូនដល់គ្រួសារកងទ័ពនៅស្រុកបរិបូណ៌ ខេត្តកំពង់ឆ្នាំង កាលពីថ្ងៃទី១៦ ខែសីហា ឆ្នាំ២០២៥ doyមានការចូលរួមពីឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ឯកឧត្តម ស៊ីវ រុន ប្រធានក្រុមប្រឹក្សាខេត្តកំពង់ឆ្នាំង លោក លោកស្រី និងសប្បុរសជនផងដែរ។ 

នៅក្នុងឱកាសនោះ សម្តេចមហាមន្ត្រី គុយ សុផល បានលើកឡើងថា នេះជាទឹកចិត្តអ្នកនៅខាងក្រោយ ជួយឧបត្ថម្ភដល់សមរភូមិមុខ ខណៈពេលដែលប្រទេសជាតិកំពុងមានសង្គ្រាមជាមួយប្រទេសជិតខាង ដែលមានបំណងឈ្លានពានមកលើបូរណភាពទឹកដីនៃប្រទេសកម្ពុជា។ គ្រឿងឧបភោគបរិភោគ និងថវិកាទាំងនេះ តិចតួចក៏ពិតមែន ក៏ប៉ុន្តែក៏ចង់បង្ហាញអំពីការគាំទ្រ និងជួយសម្រាលដល់កងទ័ពជួរមុខ ជនភៀសសឹកនៅព្រំដែន និងដល់គ្រួសារកងទ័ពផងដែរ ។

ទន្ទឹមនឹងនេះ សម្តេចមហាមន្ត្រីបានបន្តថា ពួកយើងខ្ញុំក៏ដូចជាបងប្អូនប្រជាពលរដ្ឋខ្មែរទាំងអស់ដែលបានបន្តគាំទ្រនិងផ្ដល់ការលើកទឹកចិត្តដល់វីរយុទ្ធជន វីរនគរបាលជាតិ ដែលកំពុងឈរជើង និងធ្វើប្រតិបត្តិការយ៉ាងសកម្មក្នុងការការពារបូរណភាពទឹកដីខ្មែរ សូមបន្តនូវស្មារតីរួបរួមជាតិក្នុងនាមជាខ្មែរតែមួយ ដើម្បីការពារបូរណភាពទឹកដីរបស់យើង។ 

ជាមួយគ្នានេះដែរ សម្តេចមហាមន្ត្រីបានបញ្ជាក់ទៀតថា ការចូលរួមឧបត្ថម្ភគាំទ្រដល់កងទ័ពជួរមុខ និងជនភៀសសឹកនៅតំបន់ព្រំដែនកម្ពុជា-ថៃ។ អាជ្ញាធរគ្រប់លំដាប់ថ្នាក់ រដ្ឋបាលថ្នាក់ខេត្ត សូមអំពាវនាវដល់សប្បុរសជនទាំងអស់ ចូលរួមជាមួយរដ្ឋបាលខេត្តជួយបឧបត្ថម្ភជា ថវិកា សម្ភារប្រើប្រាស់ សម្ភារបរិក្ខាពេទ្យ គ្រឿងទេស ថ្នាំមូស និងគ្រឿងឧបភោគបរិភោគផ្សេងៗ តាមលទ្ធភាព ដើម្បីរួមចំណែកក្នុងការគាំទ្រ និងលើកទឹកចិត្តដល់វីរៈកងទ័ពជួរមុខ ដែលកំពុងបំពេញបេសកកម្មដ៏ឧត្តុងឧត្តម ការពារបូរណភាពទឹកដី និងអធិបតេយ្យជាតិ ឧបត្ថម្ភដល់ជនភៀសសឹកនិងគ្រួសារកងទ័ព ដែលកំពុងត្រូវការជំនួយ។

សម្តេចមហាមន្ត្រី ឯកឧត្តមអភិបាលខត្ត ឯកឧត្តមប្រធានក្រុមប្រឹក្សាខេត្ត សប្បុរសជន និងមន្ត្រីអមដំណើរ បានឧបត្ថម្ភដល់ជនភៀសសឹក និងគ្រួសារកងទ័ពចំនួន៦៧គ្រួសារ ឧបត្ថម្ភជូនប្រជាពលរដ្ឋជួបការលំបាកចំនួន៥០គ្រួសារ និងគ្រួសារអតីតយុទ្ធជនចំនួន៥០គ្រួសារទៀតផងដែរ៕

ដោយ បៃ ស៊ីថុន