AKP ព្រះសីហនុ ថ្ងៃទី១៦ ខែសីហា ឆ្នាំ២០២៥-- លោក សែជូ សិទ្ធិជោតិ លេខាធិការគណៈកម្មាធិការសាខា និងជាអនុប្រធានមន្ទីរសុខាភិបាលខេត្តព្រះសីហនុ បានបន្តដឹកនាំមន្រ្តីប្រតិបត្តិសាខា អ្នកស្មគ្រ័ចិត្ត អាជ្ញាធរមូលដ្ឋាន កាលពីថ្ងៃសុក្រ ទី១៥ ខែសីហា ឆ្នាំ២០២៥ ចុះធ្វើយុទ្ធនាការផ្សព្វផ្សាយ និងដាក់ថ្នាំអាល់ប៊ែត នៅក្នុងសង្កាត់ទាំង៥ ក្នុងក្រុងកំពង់សោម ខេត្តព្រះសីហនុ គឺចាប់ពីទី១៤ ដល់ថ្ងៃទី១៧ ខែសីហា ឆ្នាំ២០២៥ ហើយការបន្តចុះដាក់ថ្នាំអាល់ប៊ែតនៅតាមខ្នងផ្ទះនេះ គឺជាការចង្អុលបង្ហាញ និងការយកចិត្តទុកដាក់ពីឯកឧត្តម ម៉ាង ស៊ីណេត ប្រធានគណ:កម្មា ធិការសាខកាកបាទក្រហមកម្ពុជាខេត្តព្រះសីហនុ។

លោក សែជូ សិទ្ធិជោតិ បានឱ្យដឹងថា ក្នុងយុទ្ធនាការផ្សព្វផ្សាយ និងដាក់ថ្នាំអាល់ប៊ែតនេះ មានគោលបំណងការពារពីជំងឺគ្រុនឈាម និងជំងឺឈឺកគន់ហ្គន់យ៉ា (Chikunngunya) ហៅថាជំងឺគ្រុនឈីក ដែលមានការឆ្លងតាមរយៈមូសខ្លាញីខាំ ជាពិសេសយើងត្រូវសហការដាក់អាល់ប៊ែតនៅតាមគ្រប់ធុង ពាង អាង នៅតាមខ្នងផ្ទះរបស់បងប្អូនប្រជាពលរដ្ឋ។ ទន្ទឹមនោះក្រុមការងារក៏បានចែកខិតប័ណ្ណស្តីពីការបង្ការជំងឺគ្រុនឈាម គ្រុនឈីកថែមទៀតផង  ហើយយុទ្ធនាការនេះត្រូវបានធ្វើឡើងទៅតាមក្រុមនីមួយៗនៃភូមិទាំងអស់ក្នុងសង្កាត់នីមួយៗក្នុងក្រុងកំពង់កំសោម ដើម្បីឱ្យប្រជាពលរដ្ឋមានការយល់ដឹងពីបញ្ហាគ្រុនឈាម គ្រុនឈីក ព្រមទាំងចូលរួមអនុវត្តនូវវិធានការមួយចំនួនដូចជា៖

១. ត្រូវកម្ចាត់ដង្កូវទឹក មូសខ្លាដោយធានាថា មិនមានដង្កូវទឹក នៅក្នុងបរិវេណផ្ទះ តាមរយៈការកម្ទេចចោល និងលុបបំបាត់ចោលនូវរាល់វត្ថុដក់ទឹកទាំងឡាយណាដែលមិនប្រើប្រាស់ដូចជា សំបកកង់ឡាន ម៉ូតូ សំបកកំប៉ុង ធុង ក្រឡ ពាង អាង សំបកដប សំបកដូង និងវត្ថុអាចដក់ទឹកដទៃទៀតនៅជុំវិញបរិវេនផ្ទះរបស់លោកអ្នក ត្រូវលាងសម្អាតសម្ភារ ឬវត្ថុប្រើប្រាស់ផ្សេងៗសម្រាប់ស្ដុកទឹកឱបានពីរដងក្នុងមួយសប្ដាហ៍ ឬដាក់ថ្នាំអាល់ប៊ែត ចិញ្ចឹមត្រីប្រាំពីរពណ៌ ឬគ្របឱ្យបានត្រឹមត្រូវនូវពាង អាងទឹក ធុង ក្រឡ ថូផ្កា ចានទ្រជើងទូ ។ល។ ២. ត្រូវកម្ចាត់សត្វមូសខ្លា តាមរយៈរៀបចំសម្ភារក្នុងផ្ទះឱ្យមានសណ្ដាប់ធ្នាប់ ដើម្បីធ្វើយ៉ាងណាឱ្យមានពន្លឺចាំងចូលក្នុងផ្ទះបានល្អ លុបបំបាត់គម្ពោតព្រៃស៊ុបទ្រុបជុំវិញផ្ទះ និងចូលរួមសហការជាមួយភ្នាក់ងារសុខាភិបាលក្នុងករណីមានការបាញ់ថ្នាំសម្លាប់មូសជាដើម។ ៣. ត្រូវឱ្យកូនចៅរបស់យើងដេកក្នុងមុង (ទាំងថ្ងៃយប់) ស្លៀកពាក់ខោអាវវែង មិនត្រូវអង្គុយ ឬសំរាកនៅកន្លែងដែលមិនមានពន្លឺគ្រប់គ្រាន់នោះទេ។ ៤. ជំងឺគ្រុនឈាម និងគ្រុនឈីក បានចម្លងបងប្អូនប្រជាពលរដ្ឋមិនថាក្មេង ឬចាស់នោះទេ ដូច្នេះយើងត្រូវរូសរាន់ស្វែងរកសេវាថែទាំសុខភាពនៅជិតអ្នកបំផុតដូចជា មណ្ឌលសុខភាព និងមន្ទីរពេទ្យ ក្នុងករណីក្រុមគ្រួសារណាម្នាក់មានសញ្ញជំងឺ ដូចជាក្ដៅខ្លួន (ក្ដៅខ្លួនខ្លាំងភ្លាមៗ ៣៩អង្សាសេឡើង) និងសញ្ញាបន្ទាប់បន្សុំផ្សេងទៀត ដូចជាមុខក្រហម ឈឺក្បាល ឈឺក្រោមក្រឡង់ភ្នែក ឈឺសាច់ដុំ ឬសន្លាក់ ឈឺខ្លួន ស្នាមកន្ទួលក្រហមជា ដើម។ គ្រប់ករណីដែលមានការសង្ស័យជំងឺគ្រុនឈាម និងគ្រុនឈីក មិនត្រូវសាកល្បងព្យាបាលដោយខ្លួនឯង ឬការប្រើប្រាស់ថ្នាំប្រភេទ អាស្ពីរីន ឬអ៊ីប៉ុយព្រូហ្វែន ជាដាច់ខាត និងមិនត្រូវស្វែងរកសេវាថែទាំសុខភាពណាដែលមិនមានជំនាញវិជ្ជាជីវៈ ធ្វើការពិនិត្យព្យាបាល។

សូមបញ្ជាក់ថា យុទ្ធនាការផ្សព្វផ្សាយ និងចុះដាក់ថ្នាំអាល់ប៊ែតនៅតាមខ្នងផ្ទះប្រជាពលរដ្ឋនេះ គឺចាប់ពីថ្ងៃទី១៤ ដល់ថ្ងៃទី១៧ ខែសីហា ឆ្នាំ២០២៥ សម្រាប់សង្កាត់ទាំង៥នៃក្រុងកំពង់សោម ខេត្តព្រះសីហនុ ហើយសកម្មភាពនេះ និងបន្តទៅបណ្តាក្រុង-ស្រុកផ្សេងទៀត ដែលកំពុងមានកើតនូវជំងឺគ្រុនឈាម គ្រុនឈីក៕

ដោយ ងូ សុមុនី