AKP ភ្នំពេញ ថ្ងៃទី១៥ ខែសីហា ឆ្នាំ២០២៥ -- រដ្ឋមន្ត្រីការបរទេសចិន លោក វ៉ាង យី (Wang Yi) បានជួបជាមួយរដ្ឋមន្ត្រីក្រសួងការបរទេសឡាវ លោក ថងសាវ៉ាន់ ភូមិវិហាន (Thongsavanh Phomvihane) នៅទីក្រុងអាននីង ខេត្តយ៉ុនណាន កាលពីថ្ងៃព្រហស្បតិ៍។

លោក វ៉ាង ជាសមាជិកនៃការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិន បាននិយាយថា ប្រទេសចិនមានឆន្ទៈក្នុងការធ្វើការជាមួយប្រទេសឡាវ ដើម្បីអនុវត្តការឯកភាពដ៏សំខាន់ដែលមេដឹកនាំកំពូលនៃគណបក្សទាំងពីរ និងប្រទេសទាំងពីរ ពង្រឹងទំនាក់ទំនងជាយុទ្ធសាស្ត្រ និងធ្វើឱ្យស៊ីជម្រៅនូវកិច្ចសហប្រតិបត្តិការផ្តល់ផលប្រយោជន៍ទៅវិញទៅមក។

លោក វ៉ាង បាននិយាយថា ប្រទេសចិនបានត្រៀមខ្លួនរួចជាស្រេចក្នុងការចែករំលែកអត្ថប្រយោជន៍នៃទីផ្សារដ៏ធំរបស់ខ្លួនជាមួយប្រទេសឡាវ លើកទឹកចិត្តសហគ្រាសចិនបន្ថែមទៀតដើម្បីបណ្តាក់ទុននៅក្នុងប្រទេសឡាវ ការពារសន្តិសុខ និងស្ថិរភាពនៃសង្វាក់ផ្គត់ផ្គង់ឧស្សាហកម្ម និងការផ្គត់ផ្គង់ និងធ្វើការជាមួយប្រទេសឡាវដើម្បីទប់ទល់នឹងការបង្ខិតបង្ខំ និងការគំរាមកំហែងផ្នែកសេដ្ឋកិច្ច។

លោក វ៉ាង បានបន្ថែមថា ប្រទេសចិនស្វាគមន៍ប្រទេសឡាវដែលបានចូលរួមជាមួយអង្គការសហប្រតិបត្តិការសៀងហៃ (SCO) ហើយទន្ទឹងរង់ចាំប្រទេសឡាវក្នុងការរួមចំណែកក្នុងការអភិវឌ្ឍអង្គការ SCO។

លោក ថងសាវ៉ាន់ ដែលកំពុងស្នាក់នៅក្នុងប្រទេសចិនសម្រាប់កិច្ចប្រជុំរដ្ឋមន្ត្រីការបរទេស Lancang-Mekong Cooperation (LMC) លើកទី១០ បាននិយាយថា ភាគី និងរដ្ឋាភិបាលឡាវយកចិត្តទុកដាក់យ៉ាងខ្លាំងក្នុងការអភិវឌ្ឍទំនាក់ទំនងជាមួយប្រទេសចិន ហើយសង្ឃឹមថានឹងជំរុញការកសាងសហគមន៍ឡាវ-ចិន ជាមួយនឹងអនាគតរួមគ្នាឱ្យកាន់តែស៊ីជម្រៅ និងសម្រេចបាននូវវឌ្ឍនភាពរឹងមាំបន្ថែមទៀត។

លោក ថងសាវ៉ាន់ បានថ្លែងអំណរគុណដល់ប្រទេសចិនដែលបានគាំទ្រប្រទេសឡាវក្នុងការក្លាយជាដៃគូសន្ទនារបស់អង្គការ SCO។ លោក​បាន​បន្ថែម​ថា ប្រទេស​ឡាវ​មាន​ឆន្ទៈ​ក្នុង​ការ​រក្សា​ទំនាក់​ទំនង​យ៉ាង​ជិត​ស្និទ្ធ ​និង​ការ​សម្របសម្រួល​ជាមួយ​ប្រទេស​ចិន​ដើម្បី​រួម​គ្នា​ការពារ​​យុត្តិធម៌​អន្តរជាតិ៕

ដោយ៖ មូល មិនា (ប្រភព៖ ភីបផលដេលី)