AKP ភ្នំពេញ ថ្ងៃទី១៥ ខែសីហា ឆ្នាំ២០២៥ -- ប្រធានាធិបតីលីបង់ លោក ចូសេប អាអូន (Joseph Aoun) បានប្រាប់អគ្គលេខាធិការក្រុមប្រឹក្សាសន្តិសុខជាតិកំពូលរបស់អ៊ីរ៉ង់ លោក អាលី ឡារីចានី (Ali Larijani) កាលពីថ្ងៃពុធថា ប្រទេសលីបង់មានឆន្ទៈក្នុងការសហការជាមួយប្រទេសអ៊ីរ៉ង់ក្នុងការកំណត់ដែនអធិបតេយ្យភាព និងការគោរពគ្នាទៅវិញទៅមក ហើយបដិសេធរាល់ការជ្រៀតជ្រែកណាមួយនៅក្នុងកិច្ចការផ្ទៃក្នុងរបស់ខ្លួន។

យោង​តាម​សេចក្តី​ថ្លែងការណ៍​របស់​ប្រធានាធិបតី​លីបង់ បានឱ្យដឹងថា លោក អាអូន បាន​និយាយ​អំឡុង​ពេល​ជួប​ជាមួយ​លោក ឡារីចានី ថា​ «​យើង​បដិសេធ​រាល់​កិច្ចអន្តរាគមន៍​ក្នុង​កិច្ចការ​ផ្ទៃក្នុង​របស់​យើង​ពី​ភាគី​ណា​មួយ​។ លោក អាអូន បានបន្ថែមថា «ប្រទេសលីបង់មិនដែលជ្រៀតជ្រែកកិច្ចការរបស់រដ្ឋផ្សេងឡើយ ហើយគោរពនូវភាពជាក់លាក់របស់ពួកគេ និងមិនទទួលយកនរណាម្នាក់ដែលជ្រៀតជ្រែកក្នុងកិច្ចការរបស់ខ្លួនឡើយ»។

លោកប្រធានាធិបតីបានគូសបញ្ជាក់ថា បញ្ហាប្រឈមពីអ៊ីស្រាអែល ឬប្រទេសផ្សេងទៀត គឺជាបញ្ហាប្រឈមសម្រាប់ប្រជាជនលីបង់ទាំងអស់ មិនមែនត្រឹមតែមួយក្រុមនោះទេ ហើយការរួបរួមជាតិគឺជាអាវុធដ៏ខ្លាំងក្លាបំផុតក្នុងការប្រឈមមុខនឹងការគំរាមកំហែងបែបនេះ។

ចំណែកឯលោក ឡារីចានី បានបន្តការសួរសុខទុក្ខរបស់ប្រធានាធិបតីអ៊ីរ៉ង់ និងបានអញ្ជើញលោក អាអូន ឱ្យធ្វើទស្សនកិច្ចទៅកាន់ទីក្រុងតេអេរ៉ង់។ លោកបានរំលឹកឡើងវិញនូវការគាំទ្ររបស់ប្រទេសអ៊ីរ៉ង់ចំពោះស្ថាប័នធម្មនុញ្ញរបស់ប្រទេសលីបង់ ដោយលោកបានបញ្ជាក់ថា សុន្ទរកថារបស់លោកនៅពេលមកដល់ទីក្រុងបៃរូតបានឆ្លុះបញ្ចាំងពីជំហរផ្លូវការរបស់ប្រទេសអ៊ីរ៉ង់ និងបានស្នើបង្កើតមូលនិធិកសាងឡើងវិញសម្រាប់តំបន់ដែលរងការខូចខាតដោយការវាយប្រហាររបស់អ៊ីស្រាអែល។

លោក ឡារីចានី បានសង្កត់ធ្ងន់លើបំណងប្រាថ្នារបស់ប្រទេសអ៊ីរ៉ង់ក្នុងការរក្សាទំនាក់ទំនងរឹងមាំជាមួយប្រទេសលីបង់ និងជួយទំនុកបម្រុងប្រសិនបើមានការស្នើសុំណាមួយពីរដ្ឋាភិបាលលីបង់៕

ដោយ៖ មូល មិនា (ប្រភព៖ ស៊ីនហួ)