AKP ភ្នំពេញ ថ្ងៃទី១៥ ខែសីហា ឆ្នាំ២០២៥ -- រដ្ឋាភិបាលអាល្លឺម៉ង់បាននិយាយថា ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី (Volodymyr Zelenskyy) ធ្វើទស្សនកិច្ចទៅកាន់ទីក្រុងប៊ែកឡាំងកាលពីថ្ងៃពុធ ដើម្បីចូលរួមជាមួយអធិការបតីអាល្លឺម៉ង់ លោក ហ្រ្វៀដរីច មើស (Friedrich Merz) សម្រាប់កិច្ចពិភាក្សាជាមួយមេដឹកនាំអឺរ៉ុប និងសហរដ្ឋអាមេរិក នៅមុនកិច្ចប្រជុំកំពូលត្រាំ-ពូទីន (Trump-Putin) នៅចុងសប្តាហ៍នេះ។

លោក មើស បានកោះប្រជុំជាបន្តបន្ទាប់នៃកិច្ចប្រជុំនិម្មិតកាលពីថ្ងៃពុធក្នុងការប៉ុនប៉ងដើម្បីឱ្យសំឡេងរបស់មេដឹកនាំអឺរ៉ុប និងអ៊ុយក្រែនត្រូវបានឮមុនពេលកិច្ចប្រជុំកំពូល។

លោក ហ្សេលេនស្គី គ្រោងនឹងជួបជាមួយមេដឹកនាំអ៊ឺរ៉ុបជាមុន ដើម្បីរៀបចំសម្រាប់ការសន្ទនាតាមទូរស័ព្ទមួយជាមួយប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) និងអនុប្រធានាធិបតី លោក ជេឌី វែនស៍ (JD Vance) នៅប្រហែលមួយម៉ោងក្រោយមក។

កាលពីថ្ងៃពុធ លោក មើស បានសន្យាថានឹងជួយដល់អ៊ុយក្រែនអភិវឌ្ឍន៍ប្រព័ន្ធមីស៊ីលរយៈចម្ងាយឆ្ងាយរបស់ខ្លួន ដែលនឹងរួចផុតពីការកម្រិតដោយលោកខាងលិចទៅលើការប្រើប្រាស់ និងគោលដៅរបស់វា នៅពេលដែលរដ្ឋាភិបាលទីក្រុងគៀវប្រយុទ្ធដើម្បីប្រឆាំងនឹងការឈ្លានពានរបស់រុស្ស៊ី។

លោក ហ្សេលេនស្គី បានទៅទស្សនកិច្ចទីក្រុងប៊ែកឡាំងលើកចុងក្រោយកាលពីចុងខែឧសភា។

លោក ត្រាំ បាននិយាយថា លោកចង់មើលថា តើប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) មានការយកចិត្តទុកដាក់ចំពោះការបញ្ចប់សង្រ្គាមដែរឬទេ? ឥឡូវនេះ នៅក្នុងឆ្នាំទីបួនរបស់ខ្លួនហើយ ដោយលោកបានពណ៌នាអំពីកិច្ចប្រជុំកំពូលនៅថ្ងៃសុក្រនេះថា ជាកិច្ចប្រជុំមួយដែលោកអាចវាយតម្លៃបានពីចេតនារបស់មេដឹកនាំរុស្ស៊ី៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)