AKP ភ្នំពេញ ថ្ងៃទី១៥ ខែសីហា ឆ្នាំ២០២៥ -- អង្គការក្រុមគ្រូពេទ្យគ្មានព្រំដែន (MSF) បាននិយាយកាលពីថ្ងៃព្រហស្បតិ៍ថា មនុស្សយ៉ាងហោចណាស់ ៤០នាក់បានស្លាប់នៅក្នុងតំបន់ដាហ្វ័ររបស់ប្រទេសស៊ូដង់ នៅក្នុងការផ្ទុះឡើងនៃជំងឺអាសន្នរោគដ៏អាក្រក់បំផុតរបស់ប្រទេសនេះក្នុងរយៈពេលប៉ុន្មានឆ្នាំកន្លងមកនេះ។

អង្គការសប្បុរសធម៌ផ្នែកវេជ្ជសាស្រ្តមួយនេះបាននិយាយថា តំបន់ភាគខាងលិចដ៏ធំដែលជាសមរភូមិដ៏សំខាន់មួយក្នុងរយៈពេលជាងពីរឆ្នាំនៃការប្រយុទ្ធគ្នារវាងកងទ័ពធម្មតា និងកងកម្លាំងគាំទ្ររហ័សប៉ារ៉ាយោធា បានរងការវាយប្រហារយ៉ាងធ្ងន់ធ្ងរបំផុតដោយបានផ្ទុះឡើងកាលពីឆ្នាំមុន។

អង្គការ MSF បាននិយាយនៅក្នុងសេចក្តីថ្លែងការណ៍មួយថា «នៅពេលដែលសង្រ្គាមនេះបានកើតឡើង ប្រជាជននៅស៊ូដង់ឥឡូវនេះកំពុងជួបប្រទះនូវការផ្ទុះឡើងនៃជំងឺអាសន្នរោគដ៏អាក្រក់បំផុតដែលប្រទេសនេះជួបប្រទះក្នុងរយៈពេលប៉ុន្មានឆ្នាំកន្លងមកនេះ»។

សេចក្តីថ្លែងការណ៍នោះបាននិយាយថា «នៅក្នុងតំបន់ដាហ្វ័រតែមួយនោះ ក្រុមការងាររបស់អង្គការ MSF បានព្យាបាលអ្នកជំងឺជាង ២.៣០០នាក់ និងកត់ត្រាករណីស្លាប់ចំនួន ៤០នាក់នៅក្នុងសប្តាហ៍មុន»។

អង្គការមិនមែនរដ្ឋាភិបាលមួយនេះបាននិយាយថា ករណីស្លាប់ទាក់ទងនឹងជំងឺអាសន្នរោគមានចំនួន ២.៤៧០នាក់ ដែលត្រូវបានរាយការណ៍ចាប់ពីដើមឆ្នាំនេះរហូតដល់ថ្ងៃទី១១ ខែសីហា ក្នុងចំណោមករណីសង្ស័យចំនួន ៩៩.៧០០នាក់។

ជំងឺអាសន្នរោគ គឺជាការឆ្លងមេរោគពោះវៀនស្រួចស្រាវ ដែលឆ្លងតាមរយៈអាហារ និងទឹកដែលមានមេរោគ និងបាក់តេរី ដែលជារឿយៗចេញមកពីលាមក ដែលវាបណ្តាលឱ្យមានជំងឺរាគធ្ងន់ធ្ងរ ក្អួត និងរមួលសាច់ដុំ។

អង្គការ MSF បាននិយាយថា ការផ្លាស់ទីលំនៅដ៏ច្រើនរបស់ជនស៊ីវិលដែលបង្កឡើងដោយសារសង្រ្គាមនៅក្នុងប្រទេសស៊ូដង់ បានធ្វើឱ្យជំងឺនេះផ្ទុះឡើងកាន់តែខ្លាំងឡើង ដោយសារមិនមានទឹកស្អាតសម្រាប់បរិភាគ និងមិនមានវិធានការអនាម័យសំខាន់ៗ ដូចជាការលាងសម្អាតចានឱ្យបានស្អាត និងអាហារជាដើម។

អង្គការ MSF បាននិយាយថា «យោងតាមអង្គការសហប្រជាជាតិ បានឱ្យដឹងថា ស្ថានភាព គឺធ្ងន់ធ្ងរបំផុតនៅក្នុងតំបន់តាវីឡា នៅក្នុងរដ្ឋដាហ្វ័រខាងជើង ដែលនៅទីនោះមានមនុស្ស ៣៨០.០០០នាក់បានភៀសខ្លួនដើម្បីគេចចេញពីការប្រយុទ្ធដែលកំពុងតែបន្តនៅជុំវិញទីក្រុងអ៊ែល-ហ្វាស័រ»៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)