AKP ភ្នំពេញ ថ្ងៃទី១៤ ខែសីហា ឆ្នាំ២០២៥ -- ឧបនាយករដ្ឋមន្ត្រីចិន លោក លុយ គូចុង (Liu Guozhong) កាលពីថ្ងៃព្រហស្បតិ៍បានសង្កត់ធ្ងន់ទៅលើតម្រូវការសម្រាប់កិច្ចខិតខំប្រឹងប្រែងដើម្បីបង្កើនការស្រាវជ្រាវជាមូលដ្ឋាន និងសមត្ថភាពនវានុវត្តន៍បច្ចេកវិទ្យាក្នុងវិស័យឱសថ។

លោក លុយ ដែលជាសមាជិកការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិនផងដែរនោះ បានទៅទស្សនកិច្ចនៅសាលាវិទ្យាសាស្ត្រឱសថនៃសាកលវិទ្យាល័យប៉េកាំង ដើម្បីស្វែងយល់អំពីការស្រាវជ្រាវ និងការអភិវឌ្ឍផ្នែកវេជ្ជសាស្ត្រ ក៏ដូចជាការសាងសង់ និងប្រតិបត្តិការនៃមន្ទីរពិសោធន៍សំខាន់ៗ ព្រមទាំងបានស្តាប់យោបល់ពីភាគីពាក់ព័ន្ធនានានៅក្នុងសន្និសីទមួយផងដែរ។

លោក លុយ បាននិយាយថា កិច្ចខិតខំប្រឹងប្រែងគួរតែត្រូវបានធ្វើឡើងដើម្បីពង្រឹងការស្រាវជ្រាវរួមគ្នា និងការអនុវត្តគោលនយោបាយផ្តោតទៅលើសុខភាពប្រជាជន និងជំរុញការអភិវឌ្ឍឱសថប្រកបដោយនវានុវត្តន៍ និងបរិក្ខារពេទ្យ ដោយផ្តល់ការគាំទ្រយ៉ាងរឹងមាំដើម្បីជំរុញគំនិតផ្តួចផ្តើមសុខភាពប្រទេសចិន។

ដោយកត់សម្គាល់ពីសន្ទុះវិជ្ជមាននៃនវានុវត្តន៍ឱសថរបស់ប្រទេសចិនក្នុងប៉ុន្មានឆ្នាំថ្មីៗនេះ លោក លុយ បានអំពាវនាវឱ្យមានកិច្ចខិតខំប្រឹងប្រែងស្រាវជ្រាវរួមគ្នាពីសហគ្រាស សាកលវិទ្យាល័យ ស្ថាប័នស្រាវជ្រាវ និងស្ថាប័នវេជ្ជសាស្ត្រ និងសម្រាប់ការប្រើប្រាស់ពេញលេញនៃបច្ចេកវិទ្យាថ្មីៗ ដូចជាបញ្ញាសិប្បនិម្មិត និងទិន្នន័យធំ ដើម្បីពន្លឿនការអភិវឌ្ឍមូលដ្ឋានទិន្នន័យជីវិត និងសុខភាព។

លោកក៏បានជំរុញឱ្យមានកិច្ចខិតខំប្រឹងប្រែងពង្រីកការបើកចំហកម្រិតខ្ពស់ និងធ្វើឱ្យការផ្លាស់ប្តូរ និងកិច្ចសហប្រតិបត្តិការអន្តរជាតិកាន់តែស៊ីជម្រៅលើវិស័យបច្ចេកវិទ្យាឱសថ ដើម្បីការពារសុខភាព និងសុខុមាលភាពរបស់ប្រជាជនឱ្យកាន់តែប្រសើរឡើង៕

ដោយ៖ យា ចិន្ដាខន្ដី (ប្រភព៖ ឆាយណាដេលី)