AKP ភ្នំពេញ ថ្ងៃទី១៣ ខែសីហា ឆ្នាំ២០២៥ -- សេវាកម្មប្រឆាំងភេរវកម្មអ៊ីរ៉ាក់ (ICTS) បាននិយាយកាលពីថ្ងៃអង្គារថា កងកម្លាំងបានចាប់ខ្លួនក្រុមសកម្មប្រយុទ្ធរដ្ឋអ៊ីស្លាម (IS) ចំនួន ១១នាក់ក្នុងប្រតិបត្តិការជាបន្តបន្ទាប់នៅទូទាំងខេត្តជាច្រើន។

សេវាកម្ម ICTS បាននិយាយនៅក្នុងសេចក្តីថ្លែងការណ៍មួយថា ដោយបានធ្វើសកម្មភាពលើរបាយការណ៍ស៊ើបការណ៍ កងកម្លាំងបានធ្វើប្រតិបត្តិការជាច្រើន ហើយជនសង្ស័យត្រូវបានចាប់ខ្លួននៅក្នុងខេត្តនីនេវេហ៍ ខេត្តគៀគុក ខេត្តស៊ូឡាយម៉ានីយ៉ាហ៍ និងខេត្តសាឡាហ៊ូដឌីន។

លើសពីនេះ កងកម្លាំងបានរកឃើញ និងបំផ្លាញកន្លែងលាក់ខ្លួនរបស់ក្រុម IS រាប់សិបកន្លែង បន្ថែមពីលើការឈូសឆាយ និងបំផ្លាញផ្លូវរូងក្រោមដីជាច្រើន និងរូងភ្នំដែលមានសារធាតុផ្ទុះ។

ខណៈពេលដែលប្រទេសអ៊ីរ៉ាក់បានប្រកាសពីជ័យជម្នះលើក្រុម IS ក្នុងឆ្នាំ២០១៧ ក្រុមដែលនៅសេសសល់នៅតែបន្តធ្វើការវាយប្រហារប្រឆាំងនឹងកងកម្លាំងសន្តិសុខ និងជនស៊ីវិលនៅក្នុងទីក្រុង តំបន់វាលខ្សាច់ និងតំបន់ដាច់ស្រយាល៕

ដោយ៖ មូល មិនា (ប្រភព៖ ស៊ីនហួ)