AKP ភ្នំពេញ ថ្ងៃទី១៣ ខែសីហា ឆ្នាំ២០២៥ -- យោធាបាននិយាយកាលពីថ្ងៃអង្គារថា កងកម្លាំងសន្តិសុខប៉ាគីស្ថានបានសម្លាប់ក្រុមសកម្មប្រយុទ្ធចំនួន ៥០នាក់ក្នុងអំឡុងពេលប្រតិបត្តិការរយៈពេល ៤ថ្ងៃនៅខេត្តបាឡូជីស្ថាន ភាគនិរតីរបស់ប្រទេសនេះ។

ភ្នាក់ងារទំនាក់ទំនងសាធារណៈអន្តរសេវាកម្ម (ISPR) ដែលជាប្រព័ន្ធផ្សព្វផ្សាយរបស់កងទ័ពប៉ាគីស្ថានបាននិយាយនៅក្នុងសេចក្តីថ្លែងការណ៍មួយថា សកម្មភាពចុងក្រោយនេះត្រូវបានធ្វើឡើងនៅយប់ថ្ងៃទី១០ ខែសីហា និងព្រឹកថ្ងៃទី១១ ខែសីហា នៅក្នុងស្រុកហ្សូប ដែលក្នុងនោះភេរវករ ៣នាក់ត្រូវបានសម្លាប់។

យោងតាមសេចក្តីថ្លែងការណ៍បានឱ្យដឹងថា ការចូលរួមប្រតិបត្តិការមួយទៀតបានកើតឡើងចាប់ពីថ្ងៃទី៧ ខែសីហា ដល់ថ្ងៃទី៩ ខែសីហា ដែលក្នុងនោះពួកសកម្មប្រយុទ្ធ ៤៧នាក់ត្រូវបានសម្លាប់។ សេចក្តីថ្លែងការណ៍បាននិយាយថា អាវុធ គ្រាប់រំសេវ និងគ្រឿងផ្ទុះត្រូវបានរកឃើញពីក្រុមសកម្មប្រយុទ្ធដែលត្រូវបានសម្លាប់នោះ៕

ដោយ៖ មូល មិនា (ប្រភព៖ ស៊ីនហួ)