AKP ភ្នំពេញ ថ្ងៃទី១២ ខែសីហា ឆ្នាំ២០២៥ -- កូរ៉េខាងត្បូង និងវៀតណាមបានសន្យាពង្រឹងទំនាក់ទំនងសេដ្ឋកិច្ចឱ្យកាន់តែស៊ីជម្រៅជាមួយនឹងគោលដៅដែលមានមហិច្ឆតាពង្រីកពាណិជ្ជកម្មទ្វេភាគីឱ្យបានដល់ ១៥០ពាន់លានដុល្លារអាម៉េរិក ដោយប្តេជ្ញាបន្តកិច្ចសហប្រតិបត្តិការបន្ថែមទៀតក្នុងវិស័យហេដ្ឋារចនាសម្ព័ន្ធ បច្ចេកវិទ្យា និងថាមពលនុយក្លេអ៊ែរទ្រង់ទ្រាយធំរបស់ប្រទេសទាំងពីរ។ ពួកគេក៏បានព្រមព្រៀងគ្នាក្នុងការពង្រីកវិសាលភាពនៃកិច្ចសហប្រតិបត្តិការទៅក្នុងវិស័យសំខាន់ៗមួយចំនួននាពេលអនាគតដូចជាបញ្ញាសិប្បនិម្មិត (AI) ផ្លូវរថភ្លើងល្បឿនលឿន ថាមពលកកើតឡើងវិញ និងសារធាតុរ៉ែសំខាន់ៗជាដើម។

កិច្ចព្រមព្រៀងនេះបានកើតឡើងក្នុងអំឡុងពេលនៃកិច្ចប្រជុំកំពូលទ្វេភាគីក្នុងទីក្រុងសេអ៊ូលកាលពីថ្ងៃចន្ទរវាងលោកប្រធានាធិបតី លី ជែម្យុង(Lee Jae Myung) និងលោក តូ ឡាំ (To Lam) អគ្គលេខាធិការបក្សកុម្មុយនិស្តវៀតណាម ដែលបានបំពេញទស្សនកិច្ចផ្លូវរដ្ឋរយៈពេលបួនថ្ងៃទៅកាន់ទីក្រុងសេអ៊ូលចាប់តាំងពីថ្ងៃអាទិត្យមក។ នេះ​ជា​ដំណើរ​ទស្សនកិច្ច​ផ្លូវរដ្ឋ​លើក​ដំបូង​ដែល​រដ្ឋបាលរបស់​លោក លី ទទួល​បាន ​ចាប់​តាំង​ពីការ​ចូល​កាន់​តំណែងកាលពី​ដើម​ខែ​មិថុនាមក។

លោក លី បាននិយាយក្នុងអំឡុងពេលនៃសន្និសីទសារព័ត៌មានរួមគ្នាមួយនៅការិយាល័យប្រធានាធិបតីក្នុងទីក្រុងសេអ៊ូលថា «ការប្រារព្ធខួបលើកទី១០ នៃកិច្ចព្រមព្រៀងពាណិជ្ជកម្មសេរីកូរ៉េខាងត្បូង-វៀតណាមនៅក្នុងឆ្នាំនេះ ប្រទេសទាំងពីរបានព្រមព្រៀងគ្នាក្នុងការបង្កើនកិច្ចខិតខំប្រឹងប្រែងដើម្បីឈានដល់គោលដៅពាណិជ្ជកម្ម ១៥០ពាន់លានដុល្លារអាម៉េរិកនៅត្រឹមឆ្នាំ២០៣០»៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)