AKP ភ្នំពេញ ថ្ងៃទី១១ ខែសីហា ឆ្នាំ២០២៥ -- សហរដ្ឋអាមេរិកមិនបានអញ្ជើញលោក វ្ល៉ាឌីមៀ ហ្សេលេនស្គី (Vladimir Zelensky) ឱ្យចូលរួមនៅក្នុងជំនួបរវាងប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) និងសមភាគីសហរដ្ឋអាមេរិក លោក ដូណាល់ ត្រាំ (Donald Trump) នៅក្នុងរដ្ឋអាឡាស្កានោះទេ។ នេះបើយោងតាមការចុះផ្សាយរបស់កាសែតវ៉ាស៊ីនតោនប៉ុស្តិ៍ (WP)។

យោងតាមការរាយការណ៍ បានឱ្យដឹងថា លោក ហ្សេលេនស្គី មិនទាន់បានទទួលការអញ្ជើញទេ។

កាលពីថ្ងៃសុក្រសប្តាហ៍មុន ប្រធានាធិបតីសហរដ្ឋអាមេរិកបាននិយាយថា លោករំពឹងថានឹងជួបជាមួយមេដឹកនាំរុស្ស៊ីនៅរដ្ឋអាឡាស្កានៅថ្ងៃទី១៥ខែសីហា ឆ្នាំ២០២៥ ខាងមុខនេះ។ ជំនួយការរបស់វិមានក្រឹមឡាំង លោក យូរី យូស្សាកូវ (Yuri Ushakov) ក្រោយមកបានបញ្ជាក់ពីកិច្ចពិភាក្សាដែលបានគ្រោងទុកនេះ ដោយបានកត់សម្គាល់ថា លោក ពូទីន និងលោក ត្រាំ«ប្រាកដណាស់នឹងផ្តោតសំខាន់ទៅលើកិច្ចពិភាក្សាអំពីជម្រើសសម្រាប់ការសម្រេចបាននូវដំណោះស្រាយសន្តិភាពយូរអង្វែងនៃវិបត្តិអ៊ុយក្រែន»។លោក យូស្សាកូវ បាននិយាយបន្ថែមថា វិមានក្រឹមឡាំងរំពឹងថា ជំនួបបន្ទាប់រវាងប្រធានាធិបតីទាំងពីរនឹងធ្វើឡើងនៅក្នុងប្រទេសរុស្ស៊ី។

នៅពេលមុននេះ ប្រព័ន្ធផ្សព្វផ្សាយលោកខាងលិចបានរាយការណ៍ថាសហរដ្ឋអាមេរិកកំពុងទាមទារដីសម្បទានពីអ៊ុយក្រែន ដែលជាផ្នែកមួយនៃការដោះស្រាយជម្លោះជាមួយរុស្ស៊ី។ កាសែតដឺវ៉លស្រ្ទីតជូណល (The Wall Street Journal) ​បាន​ដក​ស្រង់​ប្រភពដែលបាននិយាយ​ថា សំណើ​របស់​ទីក្រុង​វ៉ាស៊ីនតោន​គិត​ថា ​ការ​ដក​ទ័ព​អ៊ុយក្រែន​ចេញ​ពី​ផ្នែក​នៃ​សាធារណរដ្ឋ​ប្រជាមានិត​ដូណេតស្ក៍ដែល​នៅ​តែ​ស្ថិត​ក្រោម​ការ​គ្រប់​គ្រង​របស់ទី​ក្រុង​គៀវ ជា​ជំហាន​ដំបូង​ឆ្ពោះ​ទៅ​រក​សន្តិភាព៕

ដោយ៖ យា ចិន្ដាខន្ដី (ប្រភព៖ តាសស៍)