AKP ភ្នំពេញ ថ្ងៃទី១១ ខែសីហា ឆ្នាំ២០២៥ -- ប្រទេសឥណ្ឌូណេស៊ី និងនូវែលសេឡង់ មានបំណងជំរុញពាណិជ្ជកម្មទ្វេភាគីឱ្យបានដល់ ៦ពាន់លានដុល្លារនូវែលសេឡង់ (៣,៦ពាន់លានដុល្លារអាម៉េរិក) នៅត្រឹមឆ្នាំ២០២៩ដែលជាការកើនឡើងពីគោលដៅឆ្នាំ២០២៤ ចំនួន ៤ពាន់លានដុល្លារនូវែលសេឡង់។ នេះបើយោងតាមសារព័ត៌មាន Antara។

រដ្ឋមន្រ្តីក្រសួងសម្របសម្រួលកិច្ចការសេដ្ឋកិច្ចឥណ្ឌូណេស៊ី លោក អ៊ែរឡាងហ្គា ហាតាតូ (Airlangga Hartarto) បានថ្លែងកាលពីសប្តាហ៍មុនថាកិច្ចសហប្រតិបត្តិការនេះត្រូវបានគូសបញ្ជាក់នៅក្នុងផែនការសកម្មភាពនៃភាពជាដៃគូគ្រប់ជ្រុងជ្រោយឥណ្ឌូណេស៊ី-នូវែលសេឡង់ឆ្នាំ២០២៥-២០២៩។

លោកបានបញ្ជាក់ថា កិច្ចសហប្រតិបត្តិការពាណិជ្ជកម្មនេះស្ថិតក្នុងចំណោមប្រធានបទដែលត្រូវបានពិភាក្សាជាមួយរដ្ឋមន្ត្រីក្រសួងពាណិជ្ជកម្ម និងវិនិយោគរបស់ប្រទេសនូវែលសេឡង់ ក្នុងអំឡុងពេលនៃកិច្ចប្រជុំកាលពីពេលថ្មីៗនេះ។

ប្រទេសទាំងពីរបានជំរុញឱ្យមានការអនុវត្តភ្លាមៗនៃផែនការសកម្មភាពនេះ ដើម្បីពង្រឹងកិច្ចសហការដែលមានផលប្រយោជន៍ទៅវិញទៅមកក្នុងវិស័យពាណិជ្ជកម្ម និងវិនិយោគ។

មេដឹកនាំទាំងពីរបានលើកឡើងអំពីសារៈសំខាន់នៃការដោះស្រាយបញ្ហាជុំវិញផលិតផលសាកវប្បកម្ម សត្វ និងការនាំចូលផលិតផលសត្វ ដែលបច្ចុប្បន្នកំពុងត្រូវបានដោះស្រាយនៅអង្គការពាណិជ្ជកម្មពិភពលោក(WTO)។

លោក ហាតាតូ បាននិយាយបន្ថែមថា តាមរយៈការដោះស្រាយបញ្ហាទាំងនេះ ប្រទេសឥណ្ឌូណេស៊ី និងនូវែលសេឡង់អាចផ្តោតសំខាន់ទៅលើគំនិតផ្តួចផ្តើមយុទ្ធសាស្ត្រផ្សេងទៀត ដែលធ្វើឱ្យមានកិច្ចសហប្រតិបត្តិការសេដ្ឋកិច្ចកាន់តែប្រសើរឡើង។

លោករដ្ឋមន្ត្រីក្រសួងសម្របសម្រួលបានជម្រាបជូនថា ដើម្បីជំរុញសន្តិសុខស្បៀង និងបំពេញតម្រូវការអាហារូបត្ថម្ភជាតិប្រកបដោយនិរន្តរភាព រដ្ឋាភិបាលឥណ្ឌូណេស៊ីក៏បានជំរុញឱ្យប្រទេសនូវែលសេឡង់ពង្រីកការវិនិយោគរបស់ខ្លួនក្នុងវិស័យកែច្នៃទឹកដោះគោផងដែរ។

ពាណិជ្ជកម្មសរុបរវាងប្រទេសទាំងពីរក្នុងឆមាសទីមួយនៃឆ្នាំ២០២៥មានតម្លៃ ៩៦៣,២៣លានដុល្លារអាម៉េរិក ដែលកើនឡើង ២១,៥៦% បើធៀបនឹងចំនួន ៧៩២,៣៩លានដុល្លារអាម៉េរិកក្នុងរយៈពេលដូចគ្នាកាលពីឆ្នាំមុន។ ក្នុង​ចំនួន​នេះ ការ​នាំ​ចេញ​របស់​ឥណ្ឌូណេស៊ី​ទៅកាន់​នូវែលសេឡង់​មាន​ចំនួន​សរុប ៣៧៤,៨៩លាន​ដុល្លារអាម៉េរិក ខណៈដែល​ការ​នាំ​ចូល​មាន​ចំនួន ៥៨៨,៣៥លាន​ដុល្លារអាម៉េរិក៕

ដោយ៖ យា ចិន្ដាខន្ដី (ប្រភព៖ VNA)